Paghatag ug Paghupay Panahon sa Makapasubong Panghitabo

Si Dolores Gómez, nga usa sa mga Saksi ni Jehova diha sa gamayng lungsod duol sa Barcelona, Espanya, nag-edad ug 44 anyos sa dihang giingnan siya sa iyang doktor nga siya dunay tumor sa utok. Siya gitagalan nga mabuhi ug walo ka bulan na lang sa iyang doktor. Ang iyang mga isigka-Kristohanon kanunay nga nagpasundayag sa ilang gugma kang Dolores. Sa ulahing mga adlaw una pa sa iyang kamatayon, ang iyang mga paryente, nga dili mga Saksi, nangabot gikan sa nagkalainlaing rehiyon sa Espanya.

Ang mga Saksi sa maong dapit nag-atiman kanila, nga nagtagana kanila ug puy-anan, pagkaon, sakyanan, ug uban pang gikinahanglan. Tungod sa lig-ong pagtuo ug dignidad ni Dolores hangtod sa iyang kamatayon, lakip sa pagkamaabiabihon sa mga Saksi sa maong dapit, natandog ang kasingkasing sa iyang pamilya. Ang mosunod nga sulat nagpahayag sa ilang pagbati.

“Kini nga sulat maoy para sa grupo sa mga lalaki ug babaye kinsa nagsangyaw dili lamang pinaagi sa pagsulti sa ilang gugma sa isigkatawo kondili pinaagi usab sa lihok nga sinserong nagpahayag sa ilang pagbati. Among nasinati kini nga gugma diha sa dili malimtang panghitabo sa among kinabuhi, sa dihang nakaagom ug makamatay nga sakit ang among manghod nga si Loli [Dolores].

“Busa, kaming tanan (iyang mga paryente gikan sa lagyong mga dapit sa Espanya) nga naguol usab sa maong kamatayon, buot magpahayag sa among kinasingkasing nga pagpasalamat ug pagmahal alang kaninyo nga miduyog kaniya sa iyang kalipay ug kagul-anan, sa iyang kalamposan ug kasakitan, hangtod sa kataposang yugto sa iyang paglungtad dinhi sa yuta.

“Buot usab namong mahibaloan ninyo nga among naeksperyensiyahan ang kinadak-ang pagpasundayag sa gugma ug panaghiusa. Kami mobalik sa among mga puy-anan ug sa among mga pamilya ug mga obligasyon, apan kami dili na sama kaniadto tungod kay kami natandog pag-ayo sa gugma ni Loli ug sa inyong gugma ug kini nagpalig-on kanamo nga padayong mabuhi adlaw-adlaw.

“Kami manamilit uban ang mainit nga pagbati ug kinasingkasing nga pagpasalamat. Hangtod sa sunod natong panagkita, mga higala, hinaot lipayon kamo ni Jehova.”

Gipirmahan sa pamilya ug mga igsoon ni Dolores Gómez

[Mga hulagway sa panid 31]

Pipila sa mga Saksi sa maong dapit