‘Maayo pag Gihimo Unta Dayon Nako Kini’

Adunay maayong katarongan kon nganong gitawag kining batasana ug pagkaadik. Nakaplagan sa usa ka surbi sa Tinipong Bansa nga ang mga batang lalaki diha sa ikawalong ang-ang sa elementarya (nag-edad ug mga 13 anyos) migugol sa aberids ug mga 23 ka oras sa usa ka semana sa pagdulag mga dula sa video. Naadik usab ang daghang hingkod ug pangedaron. Matikdi ang usa ka Kristohanon nga ginganlag Charles.* “Para nako, ang mga dula sa video maoy usa ka paagi aron malikayan ang mga problema o responsabilidad ug marelaks ang hunahuna,” matod pa niya. “Apan naadik ako sa mga dula sa video sama nga ang mga tawo naadik sa droga o alkoholikong ilimnon.”

Miingon si Charles nga nagsige na siyag dula sa 11 anyos pa siya. “Wala ko magdulag demonyohanon o mapintasong mga dula,” matod niya, “apan sobra ra kaayo ang panahon nga akong gigugol sa pagdula. Dihay mga semana nga ang gipunayan lamang nakog hunahuna, diha man sa eskuylahan o samtang nakigbahin sa Kristohanong mga kalihokan, maoy kon unsaon nako pagsulbad ang usa ka problema sa dula.”

Si Charles natandog sa seryeng “Elektronikong Mga Dula​—Aduna bay Makadaot nga mga Bahin?” sa Disyembre 22, 2002 nga Pagmata! “Human nakog basa niadto, gipaningkamotan nakong malimitahan ang akong pagdula,” siya miingon. “Apan human molabay ang pipila ka higayon, mibalik na usab ako sa pagdula sama kaniadto.”

Panahon sa panagtratohay ug sa mubong panahon human maminyo, namenosan ni Charles ang iyang pagdula. “Apan unya,” siya miingon, “migawas ang usa ka bag-ong dula nga dugay na nakong gipaabot. Nangutang ako aron makapalit ug usa ka kompiyuter nga maoy gikinahanglan aron madula ang maong dula sa video. Kadto ang labing makahurot-ug-panahon nga dula sa video nga akong nadula sukad. Gikawat niini ang akong panahon alang kang Jehova. Napasagdan usab nako ang akong asawa.” Sa wala madugay naamgohan ni Charles nga kinahanglang molihok siya dayon. “Nakahukom ako sa pagdaot sa tanan nakong mga dula sa video,” siya miingon. “Giwagtang nako kini gikan sa akong kompiyuter ug gipanglabay ang tanan sa basurahan.”

Nagmahay ba si Charles sa iyang desisyon? Wala gayod! “Dili nako ikahubit sa mga pulong ang akong gibati human nako himoa kadto,” siya miingon. “Migaan pag-ayo ang akong gibati. Gibati nakong mas nasuod kang Jehova sukad masukad, ug kanunay na akong nakigsulti kaniya diha sa pag-ampo. Nahatagan ko na gayod ug dugang pagtagad ang akong asawa. Mapasalamaton gayod ako nga nabuntog ko na ang akong pagkaadik. Nagmahay lang ako nga wala dayon nako himoa kini.”

[Footnote]

Giusab ang ngalan.