Gikan sa Among mga Magbabasa

Sobra nga Pagkatambok Nakadayeg gayod ako kaninyo tungod sa inyong serye nga “Sobra nga Pagkatambok​—Unsay Solusyon?” (Nobyembre 8, 2004) Nakunhoran ang akong timbang ug 50 kilos pinaagi sa akong gihimong programa sa pagkaog mas makapahimsog nga pagkaon ug pag-ehersisyo adlaw-adlaw. Sukad mius-os ang akong timbang, mas makalahutay na ako, mao nga mas daghan na akog panahong magugol sa kanataran nga dili mobati ug sobrang kakapoy.

M. E., Tinipong Bansa

Hapit na akong mag-50 anyos ug nagsugod na ako sa paghatag ug dakong pagtagad sa akong panglawas, apan wala nako tagda ang akong sobra nga pagkatambok. Karon porsigido na ako nga magpaniwang. Gisugdan dayon nako kini. Kini nga serye nakapalig-on sa akong pagsalig nga si Jehova nahingawa sa matag usa kanato.

H. S., Japan

Salamat sa hustong impormasyon bahin sa sobra nga pagkatambok. Karong adlawa akong gisugdan ang akong programa sa ehersisyo ug naghikay ug bag-ong programa maylabot sa pagkaon. Kapin na sa 30 ka tuig nga ako nagbasa sa inyong magasin, ug kini dako kaayog natabang sa akong kinabuhi!

N. J., Tinipong Bansa

Ang akong timbang maoy 160 kilos. Sumala sa tsart sa panid 5, angay unta nga 76 kilos lang ako. Daghan pa akog kinahanglang buhaton aron mous-os kining akong timbang. Nasayod ako nga kining artikuloha ug ang mga eksperyensiya dinhi makatabang.

W. O., Tinipong Bansa

Nalipay ako sa pagkahibalo nga si Jehova ug ang iyang organisasyon may kahingawa sa atong panglawas. Apan, usa ka butang nga nakapabalaka kanako mao ang tsart sa panid 5. Ang ubang mga doktor mogamit ug tsart nga nagpakitag kinaubsan ug kinatas-ang timbang sa lawas sa tawo. Dako akog lawas, busa ang akong timbang lahi kay sa tawong gamay ug lawas apan parehas ra nako ka taas.

C. S., Tinipong Bansa

Ang “Pagmata!” nagtubag: Salamat niini nga impormasyon. Ang makita sa panid 5 maoy usa lang ka matang sa tsart nga makatabang sa tawo sa pagtino sa iyang hustong timbang. Wala sa among hunahuna nga pakasaypon ang ubang mga tsart.

Gipabanaag niini nga serye ang komon nga panglantaw nga ang mga tawong niwang malamposon, samtang ang tawong sobrag timbang dili malamposon. Ang akong sobra nga pagkatambok nagpasabot ba nga ako tapolan, walay motibasyon, ug walay pulos?

I. J., Alemanya

Sa akong hunahuna inyong nakalimtan ang sikolohikal nga bahin niining problemaha. Tinuod, kinahanglang pakigbisogan ang sobrang pagkatambok, apan komosta kon ang usa wala molampos sa iyang paningkamot. Unsay iyang bation?

Y. Z., Rusya

Basin ang ubang mga magbabasa maghunahuna nga niwang lang nga mga tawo ang gihigugma ni Jehova o nga ang mga tawo lang nga “normal” ug timbang ang mahimong mga Saksi ni Jehova.

R. B., Alemanya

Ang “Pagmata!” nagtubag: Ang tulo ka magbabasa sa ibabaw nagpatungha ug mga punto nga wala hisgoti sa among serye. Tinuod, ang sobrang pagkatambok dunay daghang hinungdan nga tingali walay labot sa pagpatuyang ug kaon. Pananglitan, ang ubang mga tambal makapatambok sa usa ka tawo. Ang tambok nga kaliwat mahimong hinungdan usab kon nganong ang uban maglisod sa pagpaniwang. Kon unsa man ugaling ang hinungdan, wala sa among hunahuna nga sabton sa uban nga ang mga lalaki ug babaye lamang nga husto ug timbang ang dalawaton sa Diyos. Hinaot nga ang among serye nakahatag ug motibasyon ug mapuslanong mga sugyot alang kang bisan kinsa nga gustong magsunod ug usa ka programa sa pagkaog makapahimsog nga pagkaon ug pag-ehersisyo​—ug moniwang tungod niini. Kining mga programaha makaluwas ug kinabuhi. Gikasubo namo nga nakahatag kinig sayop nga pagsabot.