Ang Hunahuna sa Bibliya

Sayop ba nga Mahimong Ambisyoso?

“UNSA ba goy daotan sa kabantog, katigayonan ug gahom?” Kining pangutanaha gipatik diha sa usa ka taho gikan sa usa ka relihiyosong asosasyon ilalom sa ulohang “Ethical Dilemmas” (“Mga Suliran Labot sa Moral nga mga Prinsipyo”). Ang maong asoy naghisgot sa gisulti sa Diyos ngadto kang Abraham: “Maghimo ako ug usa ka dakong nasod gikan kanimo ug ako magpanalangin kanimo ug ako magpadako sa imong ngalan.”​—Genesis 12:2.

Bisan tuod kini nag-ingon nga ang “ambisyon dili angayng pangagpason kon kini makadaot sa uban,” ang taho nagkutlo sa usa ka iladong rabbi sa unang siglo, nga nag-ingon: “Kon dili ako maningkamot, kinsa may maningkamot para kanako?” ug dayon mihinapos: “Walay laing maningkamot sa pagkab-ot sa atong labing maarangan aron magmalamposon sa kinabuhi kon dili kita ra usab.” Angay bang malisdan sa pagdesisyon kadtong nagtinguha sa pag-alagad sa Diyos kon ang ambisyon uyon ba o dili sa moral nga mga prinsipyo? Unsay nalangkit sa pagkab-ot sa atong labing maarangan? Sayop ba nga mahimong ambisyoso? Unsay hunahuna sa Bibliya bahin niini?

Ambisyoso ba si Abraham?

Si Abraham gipaila diha sa Bibliya ingong usa ka talagsaong tawo sa pagtuo. (Hebreohanon 11:​8, 17) Si Abraham wala dasiga sa Diyos nga mahimong ambisyoso pinaagi sa pagsaad nga Siya mohimog usa ka dakong nasod gikan kaniya ug himoong dako ang iyang ngalan. Gisulti sa Diyos ang iyang katuyoan sa pagpanalangin sa katawhan pinaagi kang Abraham, usa ka katuyoan nga mas hinungdanon pa kay sa mga ambisyon lamang sa tawo.​—Galacia 3:14.

Sa pagpakita sa iyang debosyon ngadto sa Diyos, gibiyaan ni Abraham ang lagmit hamugaway ug dagaya nga estilo sa kinabuhi didto sa Ur. (Genesis 11:31) Sa ulahi, aron motunhay ang pakigdait, kinabubut-ong gibuhian ni Abraham ang gahom ug awtoridad sa dihang gitanyag niya ang kinamaayohang bahin sa yuta nga kapuy-an ngadto sa iyang pag-umangkon nga si Lot. (Genesis 13:​8, 9) Walay rekord diha sa Bibliya nga naghubit kang Abraham ingong ambisyoso nga tawo. Hinunoa, ang iyang pagtuo, pagkamasinugtanon, ug pagkamapainubsanon mao ang nakapasuod kaniya sa Diyos ingong tinuod nga “higala.”​—Isaias 41:8.

Usa ka Lahing Panglantaw sa Katungdanan, Kabantog, ug Gahom

Ang ambisyon gihubit ingong usa ka “mainitong pagtinguha ug katungdanan, kabantog, o gahom.” Sa karaang mga panahon, nabatonan ni Haring Solomon ang katungdanan, kabantog, ug gahom, uban ang dakong bahandi. (Ecclesiastes 2:3-9) Apan, makaiikag nga sa sinugdan wala niya tinguhaa pag-ayo kining mga butanga. Sa dihang napanunod ni Solomon ang pagkahari, giingnan siya sa Diyos sa pagpangayog bisan unsa nga iyang gusto. Si Solomon  mapainubsanong nangayo ug masinugtanong kasingkasing ug pagsabot nga gikinahanglan sa pagmando sa piniling katawhan sa Diyos. (1 Hari 3:5-9) Sa ulahi, human hubita sa bug-os ang bahandi ug gahom nga iyang nabatonan, si Solomon miingon nga “ang tanan kakawangan ug usa ka paggukod sa hangin.”​—Ecclesiastes 2:11.

Aduna bay gisulti si Solomon bahin sa mga tawo nga nagapangab-ot sa ilang labing maayong maarangan? Sa usa ka paagi aduna siyay gisulti bahin niana. Human masusi ang daghan niyang mga kasinatian sa kinabuhi, ang iyang nahinapos mao: “Kahadloki ang matuod nga Diyos ug tumana ang iyang mga sugo. Kay kini mao ang tibuok nga obligasyon sa tawo.” (Ecclesiastes 12:13) Makab-ot sa mga tawo ang ilang labing maayong maarangan, dili pinaagi sa pagkab-ot ug katungdanan, bahandi, kabantog, o gahom, kondili pinaagi sa pagtuman sa kabubut-on sa Diyos.

Ang Pagkamapainubsanon Motultol sa Kabayawan

Tinuod, walay daotan sa makasaranganong paghigugma sa kaugalingon. Ang Bibliya nagsugo kanato sa paghigugma sa atong silingan sama sa atong kaugalingon. (Mateo 22:39) Natural lamang ang pagtinguhag kaharuhay ug kalipay. Apan ang Kasulatan nagdasig usab ug pagkakugihan, pagkamapainubsanon, ug pagkamakasaranganon. (Proverbio 15:33; Ecclesiastes 3:13; Miqueas 6:8) Ang mga tawong matinud-anon ug kasaligan ug kugihan kasagarang mamatikdan, makakita ug maayong trabaho, ug makaangkon ug pagtahod. Dayag nga ang pagsunod niining dalana mas maayo pa kay sa pagpahimulos sa uban alang sa personal nga kaayohan o pagpakig-indig sa uban alang sa katungdanan.

Gipasidan-an ni Jesus ang iyang mga mamiminaw batok sa pagpili ug dungganong dapit diha sa kombira sa kasal. Gitambagan niya sila sa pag-adto sa kinaubsang dapit ug maghulat nga ang tag-iya sa balay maoy mosulti kanila sa pagbalhin ngadto sa dungganong dapit. Tin-aw nga nagsulti sa prinsipyong nalangkit, si Jesus miingon: “Ang matag usa nga magabayaw sa iyang kaugalingon igapaubos ug siya nga nagapaubos sa iyang kaugalingon igabayaw.”​—Lucas 14:7-11.

Ang Tinuod nga mga Kristohanon Dili Mangambisyon

Ang Bibliya nagpaila nga ang pagkaambisyoso adunay kalambigitan sa tawhanong pagkadili-hingpit. (Santiago 4:​5, 6) Sa usa ka higayon, si apostol Juan nahimong ambisyoso. Gitinguha gayod niya ang usa ka katungdanan nga, uban sa iyang igsoong lalaki, may kaisog niyang gipangayo kang Jesus ang prominente kaayong dapit sa Gingharian. (Marcos 10:37) Sa ulahi giusab ni Juan ang iyang tinamdan. Gani, sa iyang ikatulong sulat, iyang gibadlong si Diotrefes, nga, matod pa niya, “gustong makabaton sa unang dapit.” (3 Juan 9, 10) Gisunod gayod sa mga Kristohanon karon ang mga pulong ni Jesus ug nagmapainubsanon sila, samtang nagsunod sa panig-ingnan sa tigulang nga apostol nga si Juan, kinsa nakakat-on sa pagsalikway sa ambisyosong mga kiling.

Hinunoa, realistikanhon ang pag-ingon nga ang mga katakos, abilidad, maayong mga binuhatan, ug kakugi sa usa ka tawo dili gayod makagarantiya nga mahimo siyang inila. Usahay gantihan sila sa ilang mga isigkatawo, ug usahay dili. (Proverbio 22:29; Ecclesiastes 10:7) Dunay panahon nga kadtong dili kaayo kuwalipikado mao hinuoy mahatagag dagkong mga katungdanan, samtang ang mga indibiduwal nga mas takos unta dili mamatikdan. Niining dili-hingpit nga kalibotan, may mga panahon nga kadtong nakakab-ot ug katungdanan ug gahom dili mao ang labing kuwalipikado.

Ang matuod nga mga Kristohanon dili angayng malisdan sa pagdesisyon kon ang pagpangambisyon uyon ba o dili sa moral nga mga prinsipyo. Ang ilang nabansay-sa-Bibliya nga tanlag nagtabang kanila nga dili mangambisyon. Sila maningkamot lamang kutob sa ilang maarangan diha sa tanang kahimtang, alang sa kahimayaan sa Diyos, ug magtugyan sa sangpotanan ngadto kaniya. (1 Corinto 10:31) Ang mga Kristohanon maningkamot sa pagbuhat kutob sa ilang maarangan pinaagi sa pagkahadlok sa Diyos ug pagtuman sa iyang mga sugo.

[Hulagway sa panid 12, 13]

Gidasig ba sa Diyos si Abraham nga mahimong ambisyoso?