Kon Unsay Gisaad sa “Bugtong Matuod nga Diyos”

GIBUTANG ni Jehova nga Diyos ang unang tawhanong magtiayon diha sa usa ka paraisong yuta​—ang tanaman sa Eden. Iya silang gisugo sa pagpanganak ug sa ‘paggahom sa yuta,’ nga naglangkit sa pagpasangkad sa ilang Paraisong pinuy-anan samtang ang ilang pamilya nagkadako. (Genesis 1:26-28; 2:15) Ang katuyoan ba sa Diyos nga ang mga tawo magkalipay sa usa ka yutan-ong paraiso matuman gayod?

Sa pagkatinuod, matuman kini! Sumala sa tagna sa Bibliya, “lamyon gayod [ni Jehova] ang kamatayon hangtod sa kahangtoran” ug “magpahid sa mga luha gikan sa tanang nawong.” Inigkatuman niini, “ang usa tinong moingon: ‘Tan-awa! Kini mao ang atong Diyos. Kita naglaom diha kaniya, ug siya magluwas kanato. Kini mao si Jehova. Kita naglaom diha kaniya. Magmalipayon kita ug magmaya diha sa iyang kaluwasan.’”​—Isaias 25:​8, 9.

Gihubit sa kataposang basahon sa Bibliya ang kahimtang sa yuta human nga kining presenteng kalibotan, o sistema sa mga butang ubos sa pagmando ni Satanas, pagawagtangon. Bahin sa “bag-ong yuta” nga gilangkoban sa mga tawo nga nahigugma sa Diyos, ang Bibliya miingon: “Ang tolda sa Diyos anaa uban sa mga tawo, ug siya mopuyo uban kanila, ug sila mahimong iyang mga katawhan. Ug ang Diyos makig-uban kanila. Ug iyang pagapahiran ang tanang luha gikan sa ilang mga mata, ug  ang kamatayon mawala na, ni may pagbangotan ni pagtiyabaw ni may kasakit pa.”​—Pinadayag 21:1-4.

Kahibulongan gayod nga mga saad! Makatuo ba kita niana? Tagda kon sa unsang paagi ang haladnong kamatayon ni Jesus ug ang mga milagro nga iyang gihimo nagtaganag pasukaranan sa pagsalig nga tumanon sa Diyos ang tanan Niyang mga saad.​—2 Corinto 1:20.

Gihatag ni Jesus ang Iyang Kinabuhi Ingong Lukat

Sa dihang nahaylo ni Satanas si Adan sa pagsupak sa Diyos ug sa pagpakasala, ang tanang kaliwat ni Adan nakapanunod sa iyang sala. “Ingon nga ang sala misulod sa kalibotan pinaagi sa usa ka tawo ug ang kamatayon pinaagi sa sala,” ang Bibliya miingon, “ang kamatayon mikaylap sa tanang tawo tungod kay silang tanan nakasala man.” Apan ang teksto sa Bibliya nagpadayon: “Pinaagi sa pagkamasinugtanon sa usa ka persona [ang hingpit nga tawong si Jesus] daghan ang mahimong matarong.” (Roma 5:​12, 19) Ingon sa gipakita sa unang artikulo niini nga serye, si Jesus mao ang “kataposang Adan,”​—ang usa nga “gikan sa langit”​—ang usa nga naghatag sa iyang kinabuhi ingong “usa ka lukat baylo sa daghan.”​—1 Corinto 15:​45, 47; Mateo 20:28.

Busa ang tanan nga magpasundayag ug pagtuo kang Jesus makadawat ug “kagawasan [sa sala] pinaagi sa lukat” ug makatagamtam ug kinabuhing walay kataposan. (Efeso 1:7; Juan 3:36) Nalipay gayod kita nga gihigugma pag-ayo ni Jehova nga Diyos ang kalibotan sa katawhan nga tungod niana iyang gihatag ang iyang Anak ingong atong Manluluwas! (Lucas 2:10-12; Juan 3:16) Ang pagsusi sa gibuhat ni Jesus alang sa nag-antos nga katawhan sa unang siglo mohatag ug katin-awan bahin sa umaabot. Ug ang gihimo ni Jesus kahibulongan gayod!

Pasiunang Talan-awon sa Bag-ong Kalibotan

Naayo ni Jesus ang tanang nagsakit ug nagdaot nga mga tawo nga gidala ngadto kaniya. Walay usa nga wala niya mapasig-uli sa kahimsog, bisag unsa pay ilang balatian. Dugang pa, siya milagrosong nagpakaon ug libolibong tawo uban sa pipila lang ka buok isda ug tinapay, ug dili lang usa ka higayon nga gihimo niya kana.​—Mateo 14:14-22; 15:30-38.

Sa dihang gipasig-uli ni Jesus ang panan-aw sa usa ka lalaking natawong buta, ang mga silingan ug mga kaila mituo sa maong milagro, apan ang Hudiyong relihiyosong mga lider nagduhaduha. Busa ang tawo kansang panan-aw napasig-uli nangatarongan kanila: “Sukad sa kakaraanan wala pay gidungog nga may nagpabuka sa mga mata sa usa nga natawo nga buta. Kon kining tawhana dili gikan sa Diyos, siya wala gayoy arang mahimo.”​—Juan 9:​32, 33.

Panahon sa ministeryo ni Jesus, ang iyang ig-agaw nga si Juan Bawtista, kinsa napriso, nagpadalag mga mensahero aron sa pagtino sa mga taho bahin kang Jesus. “Niadtong taknaa,” ang Bibliya nag-ingon, si Jesus ‘nag-ayo sa mga sakit ug sa grabeng mga balatian ug sa daotang mga espiritu, ug ang daghang buta gihatagan sa pabor nga makakita.’ Dayon giingnan ni Jesus ang mga mensahero: “Itaho kang Juan ang inyong nakita ug nadungog: ang mga buta makakita na, ang mga bakol makalakaw na, ug ang mga sanlahon ginahinloan ug ang mga bungol makadungog na, ang mga patay gipamangon, ang mga kabos ginasangyawan sa maayong balita.”​—Lucas 7:18-22.

Hunahunaa kini: Kon adunay maayong butang nga nahitabo sa miagi, dili ba kana maghatag kanimog pasalig nga kana mahimong mahitabo pag-usab? Pinaagi sa iyang mga milagro, gipakita ni Jesus sa gamayng sukod kon unsay iyang himoon sa dakong sukod panahon sa iyang pagmando ingong Hari sa Gingharian sa Diyos. Ang iyang mga milagro nagsilbing pamatuod nga siya gipadala sa Diyos ug nga siya gayod maoy Anak sa Diyos.

Sa panahon sa pagmando sa Gingharian sa Diyos, aduna na unyay literal nga katumanan ang mga tagna bahin sa kahibulongang mga butang. Ingon sa gitagna, ang mga buta makakita na, ang mga bungol makadungog na, ang mga bakol manglukso sama sa osa, ug wala nay magkasakit. Aduna na usab unyay pakigdait ug kasegurohan sa tanang dapit sa yuta. Bisan ang mga hayop nga peligroso karon dili na unya mangunsa sa tawo.​—Isaias 9:​6, 7; 11:6-9; 33:24; 35:​5, 6; 65:17-25.

Gusto ba nimong mabuhi sa walay kataposan ilalom sa pagmando sa Gingharian sa Diyos, ubos sa maong mga kahimtang? Gipakita ni Jesus kon unsa ang angay nimong buhaton sa dihang miingon siya sa iyang pag-ampo ngadto sa iyang amahan: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Hinaot dili nimo tugotan nga dunay mopugong kanimo sa pagpadayon sa pagkuha sa maong nagahatag-kinabuhi nga kahibalo.

[Hulagway sa panid 10]

Kini ang gisaad sa Diyos alang sa yuta