Gikan sa Among mga Magbabasa

Siyensiya ug Diyos Naikag ako sa pagbasa sa seryeng “Makatabang ba Kanimo ang Siyensiya sa Pagpangita sa Diyos?” (Hunyo 22, 2004) Gipadad-an nako ug kopya ang akong kinamanghorang isigka-humabdos nga lalaki, nga usa ka nukleyar nga pisiko. Husto gayod ang giingon sa artikulo nga, taliwala sa mga siyentipiko, kusog ang pagpit-os nga mahimong ateyista (dili motuo sa Diyos). Sa akong hunahuna ang ateyismo nahimo nang relihiyon sa mga siyentipiko tungod sa dayag nga pagtuis sa Bibliya sa mga tawong dogmatiko sa relihiyon. Salamat kaayo sa paghatag ninyo ug pagtagad niini nga mga topiko.

A. B., Tinipong Bansa

Usa na usab kini ka maayo kaayo nga serye. Tungod sa ekselenteng mga hulagway, mas nasabtan namo ang upat ka pangunang pisikal nga mga puwersa nga nagpaposible sa kinabuhi sa atong yuta. Ug ang inyong mga pangutana sa mga relihiyonista nagpadayag sa ilang huyang nga integridad ug pagkadili-mapaubsanon. Salamat alang niining tibuok serye sa mga artikulo.

F. W., Tinipong Bansa

Concorde Ako 16 anyos, ug buot nakong magpasalamat kaninyo alang sa artikulong “Ang Concorde Mihimo sa Kataposang Paglupad Niini.” (Hunyo 22, 2004) Sukad sa pagkabata, naikag na ako niining tulin-molupad nga ayroplano. Makapahingangha ang mga butang nga magama sa tawo tungod sa kinaadman ug kaalam nga gihatag sa Diyos kaniya.

T.D.C., Pransiya

Nakasakay ako kaniadto sa Concorde. Nalingaw ako ilabina sa pagtan-aw sa “pagsubang” sa adlaw sa kasadpan sa dihang migikan kami sa London sa ngitngit nga kagabhion ug human sa tulo lang ka oras mitugpa na sa New York sa hayag kaayong kahaponon!

R. M., Tinipong Bansa

Maabusohon nga Trato Salamat sa artikulong “Mga Batan-on Nangutana . . . Sa Unsang Paagi Akong Masanta ang Akong Trato sa Pagmaltratar Kanako?” (Hunyo 22, 2004) Ang among relasyon sa akong trato kaniadto nakapameligro kanako sa pisikal ug emosyonal. Nahadlok ako sa akong trato, mao nga nagpadayon ang maabusohong relasyon. Maayo na lang, nakahimo ako sa pagpakigbulag kaniya sa tabang sa akong mga ginikanan, sa Kristohanong mga ansiyano, ug ni Jehova nga Diyos. Kining artikuloha mapuslanon alang sa mga tawong nanginahanglan gayod ug tabang.

J. A., Tinipong Bansa

Ako naglaom nga kining artikuloha makatabang sa usa nga dili maminyo ug lalaki nga nagmaltratar kaniya. Ang pagpasipala, pagpasakit sa emosyon, ug pagdagmal angay gayong isalikway sa sinugdanan pa lang! Akong nakat-onan kini nga leksiyon sa mapait nga paagi.

T. G., Canada

Nagbag-o nga Superbisor Lima ka tuig ako nga nagtrabaho ilalom sa usa ka malumo, mabination nga superbisor. Dayon gibaligya ang kompaniya ug lahi na nga superbisor ang gipadumala. Akoy nahimo niyang pahungawanan sa iyang mapasipad-ong sinultihan. Adlaw-adlaw akong gipakaulawan, giinsulto, ug gibakakan. Ako naguol kaayo ug tensiyonado. Dayon akong nadawat ang Mayo 8, 2004, nga isyu sa seryeng “Gihasi Diha sa Trabahoan​—Unsay Imong Mahimo?” Nagbutang ako ug kopya diha sa iyang lamesa nga dali niyang makita ug mabasa kon gusto niya. Iya kining gibasa. Sukad niadto nausab pag-ayo ang iyang batasan. Dili na ko niya hasion. Miingon pa gani siya nga miuswag ang akong trabaho. Pagkadakong kahupayan!

K.D.A., Côte d’Ivoire

Pagkamamingawon Talagsaon kaayo ang serye nga “Nag-inusara Apan Dili Mamingawon.” (Hunyo 8, 2004) Nalipay ako ilabina sa mga sugyot nga gilista diha sa kahon sa panid 7, “Kon Unsaon Nimo Pagbuntog sa Kamingaw.” Napadapat na nako ang daghan niini nga mga sugyot, ug nahibalo ko nga madasig gayod niini ang uban.

E. M., Tinipong Bansa