Gikan sa Among mga Magbabasa

Bata nga Nadaot ang Nawong Natandog kaayo ako sa eksperyensiya ni Mailyn. (“Usa ka Bag-ong Nawong Alang Kang Mailyn,” Mayo 22, 2004) Nakadasig kanako ang pagbasa kon sa unsang paagi kining 11-anyos nga bata nakigbisog sa usa ka grabeng kahimtang apan bisan pa niana, nakig-estorya sa uban bahin sa iyang binase-sa-Bibliya nga paglaom.

M. B., Italya

Ang positibong tinamdan ni Mailyn ug sa iyang pamilya nakapadasig kaayo kanako. Sa kalibotan karon, ang media naghatag ug sobrang pagpasiugda sa personal nga panagway. Makapaluya kini. Gusto nakong masayod si Mailyn nga nakita gayod nako ang iyang tinuod nga katahom. Naglaom ko nga makaduyog sa iyang kalipay sa dihang hatagan na siya ni Jehova ug bag-ong nawong sa Iyang bag-ong kalibotan. Ang iyang pagtuo nakapalig-on kanako.

M. S.,Tinipong Bansa

Ang akong usa ka suso hapit nang kuhaon pinaagig operasyon. Gikinahanglan ang kalig-on ug kaisog nga dili maguol pag-ayo sa dihang ang imong panagway maapektohan sa sakit. Ang kaisog ug pagkapositibo ni Mailyn nakapalig-on kanako. Gusto nakong sultihan si Mailyn: Pag-ayoayo. Para nako matahom ka!

G. R., Pransiya

Bungi ako sukad sa akong pagkatawo. Ang ubang mga bata sa eskuylahan motutok nako. Luwaan pa gani ako sa uban. Nagtuo ko nga ang nakatabang nako nga makabaton ug kaisog ug pagsalig sa kaugalingon mao ang gitudlo sa akong inahan kanako gikan sa Bibliya. Bisan karon, sa edad nga 31, maguol gihapon ko sa akong panagway. Busa natandog kaayo ako sa kasinatian ni Mailyn. Nasayod ko nga sa tabang ni Jehova, atong mabuntog ang bisan unsang mga kalisdanan nga atong maatubang.

T. S., Japan

Gipamatud-an kanako ni Mailyn nga dili ang atong panagway ang makahatag ug kalipay ug katagbawan. Mabatonan lamang nato kini kon kita nag-alagad ug nahigugma sa atong Diyos. Ang panig-ingnan ni Mailyn nagsilbing inspirasyon kanako.

A. T., Pilipinas

Pagmaltratar sa Trato Mapasalamaton ako sa artikulong “Mga Batan-on Nangutana . . . Nganong Gimaltratar Niya Ako?” (Mayo 22, 2004) Gimaltratar ako sa akong trato. Kon dunay problema, kanunay siyang moingon nga ako ang sad-an. Nagdako ako diha sa usa ka pamilya diin ang kapintasan ug mapasipad-ong sinultihan naandan na, busa morag normal lang kanako ang iyang panggawi. Malipayon na ako karon nga nakigbulag ko niya; nakita nako nga dili siya maayong pamanhonon.

Ngalan wala ibutyag, Belize

Gibutyag sa maong artikulo ang akong gibati. Sa wala pa ako maminyo, ug karon nga minyo na, akong naagian ang mga kahimtang nga inyong gihubit. Nawad-an akog pagtahod sa kaugalingon tungod sa mental ug emosyonal nga kapintas nga akong naagoman. Hinaot ang maong artikulo makapalihok sa daghan sa pagsusi sa ilang relasyon samtang sila managtrato pa lang. Maalamon gayod nga magkailhanay ang usag usa sa dili pa magminyo, aron malikayan ang maong mga problema.

M. M., Alemanya

Mopanaw nga mga Liso Salamat sa pagpatik sa artikulong “Usa ka Liso nga Magpaanod-anod sa Kadagatan.” (Mayo 22, 2004) Sa miaging pipila ka tuig, nakapunit ko ug usa niining mga lisoha diha sa baybay duol sa akong balay, apan wala koy kalibotan nga liso diay kadto. Sa akong pagbasa sa maong artikulo, nahingangha ako sa paghunahuna nga nakapunit ako ug usa ka liso nga tingali naggikan pa sa Sentral o Kasadpang Aprika! Daghan kaayong salamat sa pagpatik sa maong makaiikag nga mga artikulo.

M. K., Japan