Nakat-onan Niya Kini Gikan sa Pagmata!

SI Perla, usa ka otso-anyos nga batang babaye, nagtungha sa ikaduhang grado sa estado sa Veracruz sa Mexico. Usa ka adlaw niana, ang iyang magtutudlo nangutana kon kinsay nasayod sa gitas-on sa balyena. Sa primero walay mitubag. Dayon giisa ni Perla ang iyang kamot ug miingon, “Ang abohon nga balyena adunay gitas-on nga mga 14 metros ug motimbang ug 16 ka tonelada.”

Ang magtutudlo nahingangha, ug siya nangutana, “Diin nimo kana makat-oni?”

“Gikan sa magasing Pagmata!,” matod niya. “Kon mosugot ka, ipakita nako kini kanimo.” Naandan ni Perla ang pagdala ug bag-ong mga gula sa Pagmata! sa iyang bag aron ipaambit sa uban. Naatol nga dala niya ang Septiyembre 8, 2003, nga gula nga adunay artikulo nga “Usa ka Makaiikag Kaayong Pagtan-awg Abohong mga Balyena.”

Ang magtutudlo ni Perla nalipay nga makadawat ug kopya niining magasina. Wala lang niya kini basaha kondili gusto usab niya kining tipigan. Ang ubang mga estudyante gusto usab ug kopya, busa si Perla mikuhag mga kopya alang sa siyam kanila. Si Perla gidayeg pag-ayo sa iyang magtutudlo, kinsa ginahatagan niya ug kopya sa Pagmata! matag duha ka semana.

Wala madugay human niini nga kasinatian, si Perla mitambong ug distritong kombensiyon sa mga Saksi ni Jehova. Sa wala pa mibiya si Perla, ang iyang magtutudlo miingon nga malipay siyang makadawat ug gasa gikan sa kombensiyon. Busa gihatagan siya ni Perla ug kopya sa libro nga Pagkakat-on Gikan sa Dakong Magtutudlo, nga giluwatan niadtong maong ting-init.

Sa ulahi, giingnan sa magtutudlo ang pipila sa iyang mga estudyante, “Si Perla maoy maayo nga panig-ingnan sanglit wala lang siya nagpakitag kaikag sa iyang mga tun-anan sa eskuylahan kondili nagtuon usab ug ubang mapuslanong materyal ug nagpaambit pa niana kanato.”