“Ang Paglakaw Uban sa Diyos Magdalag mga Panalangin Karon ug sa Walay Kataposan”

ANG kinabuhi kanunayng gitandi sa usa ka panaw. Mibati ka ba sukad, sama sa kadaghanan, nga ang imong kinabuhi daw nawad-ag direksiyon? Kita nailalom sa grabeng mga pagpit-os niining kalibotana. Samtang ang kapintasan ug imoralidad sa atong komunidad nagkagrabe, lagmit makaagom kita ug mga kalisdanan tungod sa mga hinungdan nga dili nato makontrolar. Sa unsang paagi nato mahuptan ang atong panimbang nianang gubot nga mga panahon? Sa unsang paagi kita makapabiling naglakaw diha sa maayong dalan sa kinabuhi?

Ang Bibliya nagtaganag kahibulongan ug makahupay nga tubag. Gipakita niini nga aduna kitay talagsaong kahigayonan​—kita makalakaw uban sa Diyos. Ang uban basin mangyam-id nianang ideyaha. Kon buot hunahunaon, sa unsang paagi makalakaw ang ubos nga tawo uban sa labing gamhanan nga Maglalalang sa uniberso? Gipakita sa Bibliya nga posible kana. Sa pagkatinuod, ang paglakaw uban sa Diyos nagpasabot nga mabatonan sa usa ang labing maayo ug labing malipayon nga kinabuhi nga posible niining masamok nga kalibotan. Apan unsay nalangkit niini? Ug unsang mga panalangin ang moresulta tungod niana?

Kining mga pangutanaha pagatubagon sa usa ka makapatandog nga pakigpulong, “Ang Paglakaw Uban sa Diyos Magdalag mga Panalangin Karon ug sa Walay Kataposan.” Kining maong publikong pakigpulong ipahayag sa distritong mga kombensiyon sa mga Saksi ni Jehova sugod sa Nobyembre 19. Daghan nianang maong mga kombensiyon ang gipahigayon ug ipahigayon pa sa tibuok kalibotan. Aron mahibaloan ang dapit nga duol kanimo, kontaka ang mga Saksi ni Jehova sa inyong lugar o pagsulat sa mga magpapatik niining magasina.