Gikan sa Among mga Magbabasa

Mga Kagaw nga Dili Madutlag Tambal Maikagon kaayo akong nagbasa sa inyong magasin. Ilabinang nagustohan nako ang serye nga “Mga Kagaw nga Dili Madutlag Tambal​—Usa ka Tibuok-Kalibotang Kapeligrohan.” (Oktubre 22, 2003) Gusto gayod nakong makabaton sa inyong mga magasin sa umaabot ug magtuon usab sa Bibliya uban sa mga Saksi ni Jehova.

Y. G., Rusya

Anino sa mga Ginikanan Daghang salamat sa artikulong “Mga Batan-on Nangutana . . . Sa Unsang Paagi Makagawas Ako sa Anino sa Akong mga Ginikanan?” (Oktubre 22, 2003) Ang akong amahan ansiyano sa usa ka kongregasyon sa mga Saksi ni Jehova, ug ako kanunayng giisip nga ehemplo nga angayng sundogon. Nakahunahuna ko nga morebelde aron makabaton ug kaugalingong personalidad. Tungod niining artikuloha, akong nakat-onan nga ako rang basolan sa ulahi ang pagbuhat niana. Karon akong nasabtan nga kinahanglan kong himoon ang akong bahin diha sa kongregasyon ug molihok sa natural nga paagi.

L. D., Pransiya

Ako nakasabot sa gibati sa mga batan-on nga gikutlo diha sa artikulo. Kaniadto, nabalaka ko pag-ayo nga ang kongregasyon dakog gidahom kanako tungod kay ilado man ang akong amahan ug uyoan. Ang akong apelyido samag tatak sa usa ka produkto nga nagsunodsunod kanako bisan asa ako moadto. Sa dihang dili nako makab-ot ang ilang gidahom, mobati kog kapakyasan. Apan karon akong nakat-onan nga ang labing hinungdanong butang maoy kon sa unsang paagi kita gilantaw ni Jehova.

S. S., Japan

Ngalan sa Diyos Sa tuig 1983, gipalitan nakog libro ang akong mga anak mahitungod sa Hawaii. Kini naghisgot nga, niadtong mga tuig 1800, ang asawa sa usa ka pangulo sa tribo nagpamatuod bahin sa iyang Diyos, si Jehova. Niadtong panahona talagsaon kaayo sa Slovakia, nga usa ka sosyalistang nasod kanhi, nga makabasa ug ngalan sa Diyos diha sa pinatik nga literatura. Ug sulod sa daghang katuigan kini maoy usa ka tanghaga alang kanamo kon sa unsang paagi nahibaloan sa asawa sa pangulo sa tribo ang ngalan sa Diyos sa iyang panahon. Busa, sa dihang gibasa namo ang artikulo nga “Ang Ngalan ni Jehova sa mga Isla sa Pasipiko” (Oktubre 22, 2003), nalipay kami sa pagkasayod sa katin-awan.

E. G., Slovakia

Misyonaryo sa Aprika Nalingaw ko sa sugilanon sa kinabuhi ni Ernest Pandachuk, “Ang Akong Pundasyon Alang sa Makahuloganong Kinabuhi.” (Oktubre 22, 2003) Ako nag-atubang ug nagkalainlaing mga problema, sama sa pagmatuto sa akong anak nga lalaki nga akoako ra ug pagsagubang sa dili-maayong panglawas. Apan ang akong mga problema gamay ra kon itandi sa problema nga gisagubang sa pipila nato ka Kristohanong mga igsoon sa Aprika. Ang maong artikulo nakatandog sa akong kasingkasing ug nagtukmod kanako sa pagpamalandong sa gisaad ni Jesus diha sa Mateo 6:​33 nga atimanon ni Jehova kadtong nangita pag-una sa Gingharian.

M. C., Rusya

Pagpaniid sa Kalibotan Gusto nakong magpasalamat sa seksiyon nga “Pagpaniid sa Kalibotan.” Kini maoy una nakong basahon diha sa magasin, ug maghinamhinam ko kanunay sa pagtan-aw sa mga ilustrasyon. Ang mga drowing magdasig kanako sa pagbasa bahin sa mga ulohan nga kasagaran dili nako magustohan​—sama sa balita bahin sa “Banhaan nga mga Isda,” diha sa gula sa Oktubre 22, 2003. Pagkamakapahimuot!

N. N., Tinipong Bansa

Diha sa balita sa “Pagpaniid sa Kalibotan” nga “Pagpanalipod Batok sa mga Lamok” (Agosto 8, 2003), kamo naghisgot sa usa ka taho nga nagrekomendar sa pagtomar ug “300 miligramo nga bitamina B₁ kada adlaw.” Ang pagtomar niining gidaghanona adlaw-adlaw makadaot gayod sa lawas.

H. M., Japan

Ang “Pagmata!” nagtubag: Ang mga awtoridad wala magkauyon kon unsa ka daghang bitamina B1 (thiamine) ang makadaot. Ang uban nagrekomendar sa pagtomar ug ingon ka gamay sa  1.1 miligramo. Apan, ang taho nga gipatik sa World Health Organization nag-ingon nga sumala sa pipila ka taho, “ang pagtomar ug 500 mg kada adlaw sulod sa usa ka bulan nakaplagang dili makahilo.” Tinuod man kini o dili, kini sa walay duhaduha nagkinahanglan pag dugang panukiduki.