Nakakita Ka na ba Sukad ug Stilt Palm?

TINAMPO SA MAGSUSULAT SA PAGMATA! SA PERU

ANG mga stilt palm komon kaayo diha sa ubang bahin sa kalibotan. Apan nganong ang palma daw aduna may mga tukon? Tungod kini kay ang pangunang gamot niini mohunong na sa pagtubo inig-abot sa tinong gitas-on, samtang ang ubang parte sa tanom mopadayon pa sa pagtubo. Busa, ang buko niini magpatunghag dugang mga gamot, nga motugkad sa yuta ug morag mga tukon tan-awon.

Ang mga stilt palm dili lang kay makaiikag nga mga tanom. Kini magsilbing silonganan sa gagmayng mga hayop nga motago ilalom sa mga gamot niini. Mapuslanon usab kini alang sa tawo. Gamiton sa mga molupyo sa ubang nasod ang kahoy niini sa pagtukod ug mga balay, maingon man sa paghimog salog, ug gamiton nila ang mga dahon sa paghimog pawod nga atop, paggamag silhig, ug paglalag mga basket. Ang mga tawo nga layo sa tropikanhon nga bagang kalasangan tingalig nakagamit na ug usa ka nindot nga baston o nakatunob na ug lig-ong salog nga baldosa nga hinimo sa kahoy sa mga stilt palm, nga adunay nindot nga grano nga lugom ug kolor.

Sama sa kadaghanang palma, ang mga stilt palm maoy tinubdan usab sa pagkaon. Kadaghanan adunay lamian nga ubod. Ikasubo, tungod kay nahimong pinangita kini nga talagsaong pagkaon, ang ubang matang sa palma gipamutol aron lang kakuhaag humok, lamian nga ubod, nga biyaan na lang ang ubang parte sa kahoy nga magkatag sa yuta.

[Mga hulagway sa panid 31]

Ang mga stilt palm maoy tinubdan sa daghang mapuslanong mga produkto