Pagbusal sa Kabayo ug sa Dila
Pagbusal sa Kabayo ug sa Dila
“Ang kabayo ginaandam alang sa adlaw sa gubat,” matod sa maalamong Haring Solomon sa karaang Israel. (Proverbio 21:31) Ang nagkabayo nga kasundalohan dugay nang nagdulag hinungdanong papel sa pagdaog diha sa mga gubat. Sukad pa sa karaang kapanahonan ang kasundalohan daan nang naggamit ug busal aron sa pagkontrolar sa kaisog ug kusog sa kabayo.
Ang busal, saysay pa sa Encyclopædia Britannica, “maoy usa ka hugpong sa mga estrap aron ang bokado mohaom nga lig-on diha sa baba sa mananap ug sa ingon maseguro ang pagkontrolar sa tawo pinaagi sa mga renda.” Halos walay kalainan ang karaan ug moderno nga mga busal, ug kini napamatud-ang mapuslanon sa pagmanso ug pagsakay ug mga kabayo.
Ang amahan ni Solomon, si Haring David, nagtumong sa kahinungdanon sa busal sa dihang siya misulat: “Ayaw kamo pagpanig-ingon sa usa ka kabayo o sa mula nga walay pagsabot, kansang kaliksi pagapugngan sa busal o sa renda.” (Salmo 32:9) Sa dihang ang kabayo mamanso, kini mahimong usa ka matinumanong kauban. Si Alejandrong Bantogan nagpangga pag-ayo sa iyang kabayo nga si Bucephalus mao nga iyang gihingalan kini sa usa ka siyudad sa India isip handomanan sa maong kabayo.
Bisan tuod ang mga tawo malamposong nakamanso ug mga kabayo sulod sa daghang milenyo, ang pagbusal sa atong di-hingpit nga kinaiya maoy laing butang. “Kitang tanan mangapandol sa makadaghan,” matod sa Kristohanong tinun-an nga si Santiago. “Kon adunay dili mapandol sa pulong, siya usa ka tawong hingpit, nga makahimo usab sa pagrenda sa iyang tibuok lawas.” (Santiago 3:2) Sa tinuoray, kinsa kanato ang makaingon nga wala pa gayod siya makasulti ug binuang, makasakit, o masuk-anon nga pulong?
Nan, nganong maningkamot man kita pagbusal sa atong badlonganong dila, kon ‘walay usa sa mga tawo ang makamanso niini’? (Santiago 3:8) Aw, ang mga tawo andam sa paggugol ug panahon ug kahago sa pagmanso sa usa ka kabayo kay sila nahibalo nga ang nabansay nga mananap magmapuslanon. Sa samang paagi, kon mas maayo ang pagmanso, o pagkontrolar nato sa atong dila, kini magmapuslanon pa gayod.
Ang mabinationg mga pulong makapahupay ug makapadasig sa atong mga higala, kaubanan sa trabaho, ug mga paryente. (Proverbio 12:18) Ang maong mga pulong mas makapahimuot sa kinabuhi alang sa mga tawong anaa sa atong palibot. Apan, ang way-busal nga dila makapasamok. “Bantayi ang imong . . . dila ug ipalingkawas ang imong kaugalingon sa kasamok,” ang Bibliya nagpasidaan. (Proverbio 21:23, The New English Bible) Kon kita molampos gayod sa pagbusal sa atong dila, matabangan nato ang atong kaugalingon ug kadtong maminaw kanato. a
[Footnote]
a Makapaikag, ang Bibliya nagpahinumdom sa mga Kristohanon nga ang ilang sinultihan nalangkit pag-ayo sa ilang pagsimba. Kini nag-ingon: “Kon may tawo nga naghunahuna nga siya usa ka debotadong magsisimba apan dili magbusal sa iyang dila, hinunoa nagpadayon sa paglimbong sa iyang kaugalingong kasingkasing, ang dagway sa pagsimba niining tawhana walay kapuslanan.”—Santiago 1:26.
[Hulagway sa panid 31]
Alejandrong Bantogan
[Credit Line]
Alinari/Art Resource, NY