Gikan sa Among mga Magbabasa

Mga Bata—Dali ra Nahamtong? Ang serye nga “Mga Bata—Dali ra ba Silang Nahamtong?” (Abril 22, 2003) maayo kaayong pagkasulat. Kini nakatabang nako sa pagsabot kon nganong nakasinati akog pipila ka problema. Masulub-on ang panahon sa akong pagkabata, ug kinahanglang mouyon ako nga ang dalan sa kaalam mao ang pagtugot sa mga bata nga motubo sumala sa kaugalingong gikusgon.

S. M., Japan

Kining seryeha nakatandog gayod sa akong kasingkasing. Gimatuto ako diha sa usa ka panimalay nga usa ray ginikanan. Subsob akong dili makatulog sa magabii nga maminaw sa pagbakho sa akong inahan tungod sa iyang mga kabalaka. Kon dili pa tungod sa Kristohanong kongregasyon, wala ko masayod kon unsa na kahay nahitabo nako. Salamat sa inyong mahigugmaong mga paningkamot sa pagpakaon kanamo sa espirituwal.

D. B., Tinipong Bansa

Ako 11 anyos, ug gusto gyod nakong mohamtong dayon. Kining seryeha nagpakita nako sa kahinungdanon sa pagpabili sa panahon sa akong pagkabata samtang anaa pa ako niana.

G. M., Tinipong Bansa

Makasimpatiya ko sa sugilanon ni Carmen ug sa iyang igsoong babaye diha sa artikulo. Bisan tuod wala ko molayas sa balay sama sa ilang gihimo, aduna koy abusadong mga amaama ug mapinasagdanong inahan. Tungod kay ang akong mga ginikanan dunay problema sa pag-abuso sa droga, napugos ko sa pagmatuto sa akong mga manghod nga lalaki, nga nagsugod sa dihang diyes anyos pa lang ko! Siyempre, nakahatag usab nakog suliran ang problema sa akong mga ginikanan. Mapasalamaton ko kang Jehova hangtod sa hangtod tungod sa tabang nga akong nadawat sulod sa daghang tuig.

D. S., Tinipong Bansa

Hedgehog Ako ang pangulong ehekutibo sa British Hedgehog Preservation Society, ug nalingaw ko sa pagbasa sa nindot nga artikulo nga “Tunokong Tuyom sa Kamad-an.” (Abril 22, 2003) Nindot kaayo kining pagkasulat ug tukma gayod ang impormasyon—dili sama sa daghang artikulo sa ubang mga publikasyon.

F. V., Britanya

Daghan kaayong salamat sa magasing Pagmata! Kanunay kong ingnon sa akong inahan nga basahon ang maong mga magasin. Sa dihang makasugod na kog basa, usahay magsige na lang kog basa sulod sa usa ka oras o kapin pa. Daghan kinig mga artikulo nga akong nagustohan, sama sa “Tunokong Tuyom sa Kamad-an.” Ako 15 anyos. Padayona ang maayo kaayong buluhaton!

K. G., Tinipong Bansa

Pagsagop Salamat sa tukma-sa-panahong artikulo nga “Mga Batan-on Nangutana . . . Ngano man nga Gipasagop Ko?” (Abril 22, 2003) Kinahanglang ipasagop sa akong anak nga babaye ang iyang anak tungod sa iyang mga kahimtang, ug kini nakatugaw pag-ayo sa akong konsensiya. Kining impormasyona miabot gayod sa hustong panahon. Gipadala ko ang maong artikulo ngadto sa akong anak nga babaye.

E. D., Guyana

Nagsulat ako aron sa pagpasalamat kaninyo sa tukma-sa-panahong mga artikulo bahin sa pagsagop diha sa Abril 22 ug Mayo 22 nga mga gula. Ang akong bana ug ako di pa dugayng nagsagop ug masuso pa nga batang lalaki. Sa ngadtongadto, gamiton namo kining duha ka artikulo sa pagtabang sa among anak aron siya mahibalo ug makasabot nga siya gihigugma pag-ayo ni Jehova nga Diyos, sa iyang Papa, ug nako.

S. R., Tinipong Bansa

Daghan kaayong salamat sa artikulo bahin sa pagsagop. Ako 47 anyos ug nakigbisog pa gihapon bahin niini. Ang mga ginikanan nga nagsagop kanako—nga akong gitahod ug gihigugma pag-ayo—wala makatagana sa akong mga panginahanglan sa gugma ug pagmahal. Wala gayod ako gaksa o hagki sukad, bisan pag gihangyo ko kini. Ang maong pagsalikway lisod kaayo alang nako. Bisan pa niana, ang maong artikulo makapahupay ug makapadasig kaayo.

D. H., Tinipong Bansa