Ilang Nakat-onan nga ang Diyos Nahigugma Kanila

Ang uban malisdan sa pagtuo nga si bisan kinsa​—bisan ang Diyos​—mahigugma gayod kanila. Busa human mabasa ang librong Pakigsuod Kang Jehova, daghan ang misulat nga nagpahayag ug apresasyon tungod sa pasalig nga gihatag niini. “Nahingangha ako sa kadako sa iyang gugma kanako, bisan pa sa akong mga kasaypanan,” misulat ang usa ka babaye nga taga-Decatur, Illinois, T.B.A.

Siya dugang misulat: “Nakahilak ako sa kalipay sa dihang nabasa nako ang pahayag [sa panid 117]: ‘Ingong maangayon o matarong nga Amahan, si Jehova nagbalanse sa kalig-on dapig sa matarong ug sa mabinationg kahangawa ngadto sa iyang yutan-ong mga anak, kinsa nagkinahanglan sa iyang tabang ug kapasayloan.’”

Usa ka lalaki nga taga-Ripon, California, misulat: “Salamat kaayo sa pagpakita kanako nga gihigugma gayod ako ni Jehova. Siya nagtagad gayod. Dili lang diay ako usa ka numero sa usa ka listahan.” Usa ka babaye nga taga-New Hampshire miingon: “Usahay dili ako makahunong sa pagbasa sa libro.” Mipatin-aw siya: “Naglisod gayod ako pagtuo nga si Jehova mahigugma kanako.” Busa ang libro mao gayoy iyang gikinahanglan.

Nagtuo kami nga makabaton ka usab ug kaayohan sa pagbasa niining maong libro. Human sa pasiunang tulo ka kapitulo, gibahin kini sa upat ka seksiyon, nga nag-ulohang “Mabaskog sa Gahom,” “Mahigugmaon sa Hustisya,” “Maalamon sa Kasingkasing,” ug “Ang Diyos Gugma.” Ang matag seksiyon naghatag ug bug-os nga pagtagad sa usa ka pangunang hiyas sa Diyos. Gitapos kining makapadasig nga basahon pinaagi sa kapitulong ‘Pakigsuod sa Diyos, ug Siya Makigsuod Kaninyo.’

Makahangyo ka niining 320-panid nga humok-ug-hapin nga libro pinaagi sa pagpil-ap sa kaubang kupon ug pagpadala niini ngadto sa adres nga gitagana o ngadto sa nahiangayng adres sa panid 5 niining magasina.

□ Ako ba makahangyo, nga walay obligasyon, ug usa ka kopya sa librong Pakigsuod Kang Jehova?

□ Palihog kontaka ako mahitungod sa usa ka libreng pagtuon sa Bibliya sa balay.