Kon sa Unsang Paagi Pagaluwason ang Yuta

BISAN pa sa maorag walay-paglaom nga kaugmaon nga giatubang sa yuta, maoy atong pangandoy nga ang yuta magpadayon sa paglungtad. Kana ang atong pagbati kay kini mao man ang atong pinuy-anan​—ug nga mahimo untang pinuy-anan sa atong mga anak ug sa ilang mga anak. Duna ba kitay mahimo sa pagpalig-on sa maong paglaom?

Tinuod nga bisan pag ang kadaghanang tawo mabalak-on bahin sa kalikopan, ang daghan, sa walay paghunahuna, maglabay ug basura sa dalan, maglabay ug basura sa suba, o pasagdan nilang ang mga suga nagsiga sa dihang kana wala gamita. Kanang mga buhata daw gagmay rang mga butang, apan kon ang matag usa sa bilyonbilyong tawo sa yuta mag-amping sa iyang paagi sa pagtagad sa yuta, kana makausob sa kahimtang. Ang mga butang sama sa pagdaginot sa paggamit ug enerhiya, pagkooperar sa mga programa sa paghimong mapuslanon sa biya nga materyales, ug paghipos sa basura sa hustong paagi makatabang sa pagpreserbar sa kalikopan. Pinaagi sa atong mga batasan kita makapasundayag sa atong pagkamatinagdanon sa yuta karon.

Bisan pa niana, dili kita makakontrolar sa mga buhat sa kadaghanang tawo alirong nato. Nagpasabot ba kini nga ang kahimtang wala gayoy paglaom?

Mas Maayong Solusyon Haduol Na

Ang usa ka komento ni Thilo Bode sa organisasyong Greenpeace, sumala sa gikutlo sa magasing Time, naghisgot sa pangunang bahin sa suliran sa kalikopan: “Ang among pangunang tumong mao nga ang mga korporasyon maghunahuna kon sa unsang paagi hiposon ang ilang mga produkto. Kinahanglang maghunahuna sila sa tulo ka butang: produksiyon, paggamit ug paghipos human sa paggamit niana.” Ikasubo, kita makagama ug mga butang, nahibalo kon unsaon paggamit niana, apan kita dili mahibalong mohipos sa hustong paagi human sa paggamit niana. Sa pipila ka kaso ang mga tawo yanong dili mahibalo kon unsaon paghipos sa dili-peligrosong paagi.

Ang mga tawo adunay mga kinutbanan, apan ang Maglalalang sa yuta wala. Nakapasundayag na siya sa iyang labaw nga kinaadman diha sa mga kalalangan nga atong makita sa yuta. Nahibalo siya kon unsaon paggama, paggamit, ug paghipos sa mga butang sa hustong paagi. Awtomatiko ang daghan sa mga sistema nga iyang gilalang. Ang usa ka liso moturok, ug ang usa ka tanom motubo ug mamunga. Unya kini mamatay​—nga ang tanan niining mga  elementoha madugta sa dili-makapahugaw nga paagi, nga andam nang gamiton pag-usab. Kana maoy kinamaayohang paagi sa paghipos sa basura! Walay makahilo nga polusyon!

Dili katuyoan sa Maglalalang nga ang yuta madaot hangtod mahimong dili-kapuy-an nga labayanan ug basura. Diha sa Bibliya, sa Isaias 45:18, atong mabasa: “Mao kini ang giingon ni Jehova, . . . Siya nga mao ang matuod nga Diyos, ang Mag-uumol sa yuta ug ang Magbubuhat niini, Siya nga mao ang Usa nga lig-ong nagtukod niini, nga wala maglalang niini sa wala lamay kapuslanan, nga nag-umol niini aron pagapuy-an.”

Kon giumol sa Diyos ang yuta aron pagapuy-an, nganong iyang gitugotan kini nga modangat sa daotang kahimtang? Ang Bibliya nagpatin-aw nga ang tawo sa sinugdan gibutang sa usa ka paraiso. Sa pagkamatuod, katuyoan sa Diyos nga ang maong Paraiso makaabot sa kinatumyan sa yuta ug mapunog mga tawo. (Genesis 1:28) Ugaling lang, nahitabo ang pagrebelde. Ang unang lalaki ug babaye dili gustong magpadayon sa pagpasakop sa pagmando sa Diyos.

Gitugotan sa Diyos ang mga tawo sa pagsulay sa ilang kaugalingong paagi sa pagmando. Ang mga resulta mao ang atong makita karon, nga grabeng kapakyasan. Tin-awng gipasundayag sa mga tawo nga sila dili makasulbad sa ilang mga suliran. Dili mabasol ang Diyos tungod sa nahitabo. Ang giingon sa Bibliya matuod sa tanang tawo: “Sila migawi sa ikadaot sa ilang bahin; sila dili iyang mga anak, ang sayop ilaha. Usa ka kaliwatan nga baliko ug hiwi!”—Deuteronomio 32:5.

Bisan pa niana, ang Diyos dili kay wala magtagad sa pagkadaot sa yuta. Molihok siya sa dili pa ulahi kaayo, sa dili pa ang yuta mahimong dili-mapuy-an nga kamingawan. Nganong nahibalo kita niana? Ang Pinadayag 11:18 nagpatin-aw: “Ang kanasoran nangapungot, ug miabot ang imong kapungot, ug ang tinudlong panahon . . . sa paglaglag sa mga nagalaglag sa yuta.” Pahunongon gayod ang paglaglag sa yuta.

Ang orihinal nga katuyoan sa Diyos alang sa yuta, nga kini mahimong paraiso, pagatumanon pa. Ang Diyos nagluwat ug mga pulong nga nagpadayag niini. Pananglitan, siya miingon: “Ang akong pulong nga mogula gikan sa akong baba . . . dili mobalik kanako nga walay sangpotanan, apan kini tinong magbuhat nianang akong gikahimut-an.” (Isaias 55:11) Malingaw ka nga magbasa sa Isaias kapitulo 35, diin gibatbat sa Diyos ang pagkausab sa nadaot nga mga bahin sa yuta ngadto sa samag-tanaman nga mga parke ug mabungahong mga kapatagan.

Bisan karon, sa mga dapit diin nahunong na ang polusyon, ang yuta nagpakitag talagsaong katakos nga magpasig-uli sa maayong kahimtang niini. Ang Diyos naglalang niini nga makapasig-uli sa kaugalingon. Kon ihunong ang pagpabug-at sa yuta pinaagi sa mga maghuhugaw, ang nagkadaiya kaayong mga mikroorganismo diha sa tubig ug yuta makaayo sa kinadak-ang kadaot. Dugang pa, may katarongan sa pagtuo nga sa dihang ang Diyos mobalda ug magdumala sa mga butang, kining proseso sa pagpasig-uli mahimo pang mas epektibo. Makatagana siya sa pagbansay ug hingpit nga pagdumala nga nakulang karon sa mga tawo.

Busa dili ingong walay paglaom ang kaugmaon sa yuta. Pagaluwason ang mga tanom ug mga hayop. Wala na unyay mga listahan sa nameligrong mga espisye. Mahimong lab-as na usab ang atong hangin ug tubig. Ang masinugtanong mga tawo atua unya didto aron makapahimulos niana. Gusto ba nimong makakita niana? Makahimo ka. Sa unsang paagi? Ang Bibliya naghatag ug mga detalye kon unsay buhaton. Nganong dili mohimog sistematikong pagsusi sa Bibliya aron imo mismong masayran kana? Hangyoa ang mga magpapatik niining magasina nga may mokontak kanimo aron makatabang nga imong masugdan ang pagsusi. Nganong sayloan ang kahigayonan nga makakat-on kon sa unsang paagi ikaw ug ang imong pamilya makapahimulos sa usa ka hinlo nga kalikopan hangtod sa kahangtoran?