Usa ka Kaayohan sa Komunidad

TINAMPO SA MAGSUSULAT SA PAGMATA! SA ESPANYA

SULOD sa daghang siglo ang mga siyudad sa Espanya nagdonar ug yuta alang sa mga dapit sa pagsimba. Ang mga gobyerno sa siyudad nagtuo nga ang relihiyon makahatag ug kaayohan sa ilang komunidad. Sanglit ang Katolisismo mao ang relihiyon sa Estado, ang propiedad sa lungsod sa naandan gihatag ngadto lamang sa Iglesya Katolika. Apan nausab na ang panahon.

Sa 1980 gigarantiyahan sa balaod sa Espanya ang relihiyosong kagawasan nga nag-ingon nga “walay usa ka partikular nga relihiyon ang himoong Opisyal nga relihiyon sa Estado.” Kini ang nakapukaw sa ubang mga opisyales sa siyudad sa pag-ila sa buluhaton nga ginahimo sa mga Saksi ni Jehova. Agig timaan niini nga pag-ila, midonar sila ug yuta nga katukoran ug mga Kingdom Hall.

Lainlaing mga administrador nakaingon nga ang maong mga donasyon nahiangay tungod sa “edukasyonal nga kinaiyahan sa buluhaton” sa mga Saksi, maingon man sa “kaayohang ikahatag niini sa publiko ug sa katilingban.” Ang uban miingon nga “importante ang presensiya sa mga Saksi ni Jehova diha sa siyudad” ug nga “dili negosyo ang kinaiyahan sa ilang buluhaton.”

Daghang Kingdom Hall ang natukod sulod sa 48 oras pinaagi sa paggamit ug linain nga paagi sa pagtukod nga gihimo sa mga grupo sa boluntaryong mga Saksi. Ang mayor sa La Línea, sa habagatan-kasadpang Espanya, mikomento: “Nakadayeg kaayo ako sa pagkamatinabangon sa mga boluntaryo, ug nagtuo ako nga sila takos sa atong tabang. Kita nagkinahanglan ug daghan pa niining matanga sa espiritu karong panahona niining nagkabahinbahin nga kalibotan.” Iyang gitawag ang bag-ong Kingdom Hall nga “usa ka monyumento sa espiritu sa pagtinabangay.”

Ang mga silingan nakamatikod usab niining espiritu sa pagtinabangay. Sa panahon sa pagtukod ug duha ka Kingdom Hall sa Vitoria, sa amihanang Espanya, si Marian, nga nagpuyo sa duol, miingon: “Kon ipakita pa unta sa tanan kining matanga sa gugma, wala unta kitay mga problema nga atong giantos karon.” Human makakita sa pagtindog sa tinukod, usa ka lokal nga arkitekto miingon: “Buot kong mahimong usa sa mga Saksi ni Jehova aron masinati ko ang inyong kalipay!”

Diha sa siyudad sa Zaragoza, sa amihanan-sidlakang Espanya, gihatagan sa mga opisyales ang mga Saksi ug 600-metro-kuwadrado nga yuta, nga walay bayad. Usa ka lokal nga mantalaan naghubit sa lugar nga gitukoran nga “usa ka salag sa hulmigas sa mga Saksi ni Jehova, diin ginatos ka gagmayng mga hulmigas nagtinabangay sa pagtrabaho.” Giabibag maayo sa mga silingan ang mga trabahante. Ang usa kanila miingon: “Nawad-an ako ug pagtuo tungod sa mga pari, apan inyong gipasig-uli kanako ang akong pagtuo.”

Ang mga Saksi mapasalamaton sa tabang sa mga silingan ug sa lokal nga mga awtoridad sa pagtukod sa ilang mga dapit sa pagsimba. Sila determinado sa paggamit sa ilang mga Kingdom Hall alang sa labing maayong edukasyonal nga buluhaton alang sa komunidad​—kanang pagsangyaw ug pagtudlo sa Pulong sa Diyos.

[Hulagway sa panid 31]

La Línea, Cadiz, Espanya