Pornograpiya—Magkasukwahi nga mga Panglantaw

“Makapatungha kini ug kusganong mga gana nga dili angayng maglungtad, makapukaw kini ug kailibgon nga dili gayod angayng tagbawon.”​—Tony Parsons, kolumnista.

WALAY intensiyon si John nga magiyan sa ‘sekso diha sa Internet.’ * Sama sa daghang ubang mga tawo nga wala tuyoang makakitag pornograpiya ug mga chat room sa sekso, naggamit siyag Internet usa ka adlaw niana sa dihang wala damha iyang nabuksan ang usa ka site nga dunay mga chat room sa sekso. Wala madugay, siya nalinga na pag-ayo sa sekso diha sa Internet. “Maghulat ako hangtod nga makalakaw ang akong asawa sa trabaho,” siya nahinumdom, “unya mobangon dayon ako sa higdaanan ug mogugol ug daghang oras atubangan sa kompiyuter.” Niining taas nga mga panahon atubangan sa kompiyuter, dili gani siya mohunong aron sa pagkaon o pag-inom. “Dili ko batiog kagutom,” matod pa niya. Nagsugod siya sa pagpamakak sa iyang asawa bahin sa iyang tinagotago nga mga kalihokan. Nakaapektar kini sa iyang konsentrasyon sa trabahoan, ug nagkaanam siya ka madudahon. Ang iyang kaminyoon naapektohan pag-ayo, ug sa dihang sa kataposan siya nakigsabot nga makigkita sa usa sa iyang mga gikaestorya sa sekso diha sa Internet, nasayran kini sa iyang asawa. Si John ginatambalan karon tungod sa iyang pagkagiyan.

Ang mga aktibista batok sa pornograpiya naghisgot sa mga kasinatian sama niini ingong pamatuod sa makadaot nga mga epekto sa pornograpiya. Sila nag-ingon nga kini makadaot ug mga relasyon, nagpakaulaw sa kababayen-an, nag-abuso sa mga bata, ug moresulta sa hiwi ug makadaot nga panglantaw bahin sa sekso. Sa laing bahin, ang mga manlalaban sa pornograpiya nagdepensa niini ingong libreng pagpahayag sa kaugalingon ug nag-isip sa mga aktibista nga sobra ka konserbatibo. “Dili angayng ikaulaw sa mga tawo ang ilang seksuwal nga mga interes o mga kailibgon,” misulat ang usa ka tigpaluyo. “Magamit ang pornograpiya sa pagbukas ug pag-ugmad ug prangkang panaghisgot bahin sa sekso.” Adunay pipila gani nga nag-ingong ang pagdagsang sa pornograpiya mao ang timaan sa usa ka madinawaton ug maayog-panghunahuna nga katilingban. “Kon madawat sa usa ka katilingban ang dayag nga pagsekso sa duha ka hamtong, kini nga katilingban dakog purohan nga mahimong madinawaton sa panagkadaiya sa seksuwalidad ug kaangayan sa mga babaye,” nag-ingon ang magsusulat nga si Brian McNair.

Kining nagkadaiyang panglantaw sa katilingban naghimo ba sa pornograpiya nga dalawaton? Nganong kaylap man kaayo kini? Peligroso ba gayod nga kalihokan ang pornograpiya? Ang mosunod nga mga artikulo magatubag niining mga pangutanaha.

[Footnote]