Nganong ang Pornograpiya Kaylap Kaayo?

ANG mahilas nga mga talan-awon o basahon nga gidisenyo sa pagpukaw sa seksuwal nga mga pagbati nagsugod libolibo na ka tuig kanhi. Apan sa dakong bahin sa kasaysayan niini, ang pornograpikong mga talan-awon o basahon lisod gam-on ug busa mabatonan lamang kini sa mga adunahan ug mga magmamando. Nausab kana sa dihang naugmad ang dinaghang pag-imprenta ug naimbento ang potograpiya ug pelikula. Ang pornograpiya mapalit ug mabatonan na bisan sa ordinaryong mga tawo.

Ang imbensiyon sa videocassette recorder nakapasamot niini nga hilig. Dili sama sa mga lilas sa pelikula ug karaang mga letrato, ang mga videocassette sayon nga tipigan, kopyahon, ug iapod-apod. Puwede kining tan-awon sa pribado diha sa balay. Dili pa dugay, ang pagdagsang sa mga cable television ug sa Internet mas nakapasayon sa pagtan-aw ug pornograpiya. Ang tigtan-aw nga nahadlok nga makita sa iyang silingan sulod sa tindahan sa video diha sa seksiyon nga nagtanyag ug mga salida nga mahilas makahimo na karon sa “pagpondo diha sa balay ug sa pagtan-aw pinaagi sa iyang cable television, o salida sa TV pinaagig satelayt,” matod pa sa analista sa media nga si Dennis McAlpine. Dali rang matan-aw kining matanga sa programa, matod pa ni McAlpine, ug busa usa kini ka rason kon nganong ang pornograpiya nahimong “mas dalawaton.”

Pornograpiya Giisip na nga Normal

Daghan ang dunay nagkadaiyang pagbati bahin sa pornograpiya tungod kay kini giisip na nga normal. “Kini dunay mas dakong impluwensiya sa atong kultura kay sa tanan natong opera, ballet, teatro, musika ug belyas artes kon tingbon,” nag-ingon ang magsusulat  nga si Germaine Greer. Ang modernong mga tinamdan bahin sa pornograpiya gipabanaag pinaagi sa gipauso nga ‘pamesti-sa-pampam’ nga ginasul-ob sa daghang popular nga mga tawo, sa mga music video nga dugang ug dugang nga nagpasundayag ug seksuwal nga mga hulagway, ug sa paggamit sa mga tig-anunsiyo ug “artistikong pornograpiya.” Si McAlpine mihinapos: “Ang katilingban way-reklamong modawat kon unsay itanyag ngadto niini. . . . Nakapatuo kana sa mga tawo nga kining tanan dalawaton.” Tungod niini, “morag dili na makuratan ang mga tawo,” mireklamo ang awtor nga si Andrea Dworkin. “Morag wala lang kana kanila.”

Ang Katarongan sa Pagkaylap sa Pornograpiya

Nagpahayag ug mga panghunahuna nga sama nianang iyaha ni Dworkin, ang retiradong imbestigador sa FBI nga si Roger Young nag-ingon nga “dili gayod makita [sa daghang tawo] ang seryosong mga sangpotanan sa kalaw-ayan ug ang mga problema nga ipatungha niini.” Ang uban nakombinsir niadtong molaban sa pornograpiya, kinsa nag-ingong walay pamatuod nga ang pornograpikong mga larawan dunay makadaot nga epekto sa mga tawo. “Ang pornograpiya maoy minugna lamang sa hunahuna,” misulat ang awtor nga si F. M. Christensen, “usa ka butang nga kadtong batok niana nalisdan sa pagdawat.” Apan kon walay epekto kanang minugna sa hunahuna, nan sa unsa man gibase ang negosyo sa panganunsiyo? Nganong mogasto pa man ang mga korporasyon ug milyonmilyong dolyar sa paggamag mga komersiyal, video, ug inimprenta nga mga panganunsiyo kon kini walay dumalayong epekto diha sa mga tawo?

Ang tinuod mao nga sama sa tanang epektibong panganunsiyo, ang pangunang katuyoan sa pornograpiya mao ang pagpukaw sa mga kailibgon nga wala unta maglungtad kanhi. “Ang pornograpiya ginegosyo sa bugtong katarongan nga kini dakog kita,” misulat ang mga tigdukiduki nga si Steven Hill ug Nina Silver. “Ug niining nabuang nga kalibotan sa  negosyo, ang bisan unsa giisip nga kakitaan, ilabina ang mga lawas sa mga babaye ug seksuwal nga mga relasyon sa tawo.” Si Greer nagtandi sa pornograpiya ngadto sa makagiyan kaayong fast food, nga walay sustansiya ug gisagolan ug mga kemikal nga pangpalami. “Ang gipanapian nga mga talan-awon ug basahon bahin sa sekso nga daling mabatonan,” matod pa niya, “maoy hinanduraw nga sekso . . . Ang panganunsiyo sa pagkaon nagpasiugdag walay-sustansiyang pagkaon ug ang panganunsiyo sa sekso nagpasiugdag hinanduraw nga sekso.”

Ang ubang mga doktor nag-ingon nga ang pornograpiya makapukaw ug usa ka matang sa pagkagiyan nga mas lisod kaayong buntogon kay sa pagkagiyan sa droga. Ang pagtambal sa mga giyanon sa droga kasagarang magsugod pinaagi sa pagwagtang sa substansiya gikan sa lawas. Apan ang pagkagiyan sa pornograpiya, matod pa ni Dr. Mary Anne Layden sa University of Pennsylvania, “magpatunghag mga handurawan nga permanenteng matisok diha sa hunahuna sa tigtan-aw ug mahimo nang bahin sa kemistriya sa utok.” Mao nga klaro kaayong mahinumdoman sa mga tawo ang pornograpikong mga larawan nga ilang nakita daghang tuig na ang milabay. Siya mihinapos: “Mao kini ang unang makagiyan nga substansiya nga wala nay paglaom nga mapanas gikan sa panumdoman.” Apan nagpasabot ba kana nga imposible na nga makalingkawas pa sa impluwensiya sa pornograpiya? Ug unsang espesipikong kadaot ang ipahinabo sa pornograpiya?

[Kahon sa panid 5]

Mga Impormasyon Bahin sa Pornograpiya sa Internet

◼ Mga 75 porsiyento sa pornograpiya sa Internet naggikan sa Tinipong Bansa. Halos 15 porsiyento ang naggikan sa Uropa.

◼ Gibanabana nga mga 70 ka milyong tawo kada semana ang motan-aw ug pornograpikong mga Web site. Mga 20 ka milyon niining maong mga tigtan-aw nagpuyo sa Canada ug sa Tinipong Bansa.

◼ Gipakita sa usa ka pagtuon di pa dugay nga sulod sa usa ka bulan, ang Alemanya dunay kinadaghanang tigtan-aw ug pornograpiya sa Internet didto sa Uropa, nga gisundan sa Gran Britanya, Pransiya, Italya, ug Espanya.

◼ Sa Alemanya, ang mga tiggamit ug pornograpiya sa Internet mogugol ug aberids nga 70 minutos kada bulan sa pagtan-aw ug pornograpikong mga site.

◼ Sa mga tigtan-aw ug pornograpiya sa Internet didto sa Uropa, kadtong kapin sa 50 anyos ang edad mogugol ug kinadaghanang panahon sa pagtan-aw ug mga Web site bahin sa sekso.

◼ Sumala sa usa ka reperensiya, 70 porsiyento sa pagtan-awg pornograpiya diha sa Internet ginahimo maadlaw.

◼ Ang uban nagbanabana nga dunay 100,000 ka site sa Internet nga naglakip ug mga talan-awon maylabot sa pornograpiya sa kabataan.

◼ Mga 80 porsiyento sa komersiyal nga pornograpiya sa kabataan diha sa Internet naggikan sa Japan.

[Mga hulagway sa panid 4]

Mas dali na karon nga makatan-aw ug pornograpiya