Usa ka Kagamhanan nga Magtuboy sa Diyosnong mga Prinsipyo

HANDURAWA ang usa ka kalibotan nga adunay usa lang ka kagamhanan alang sa katawhan sa tanang rasa ug pinulongan. Handurawa ang usa ka kagamhanan nga nailado tungod sa pagpanalipod sa labing hamiling mga prinsipyo ug sa pagpapas sa gubat, dinumtanay, krimen, kakabos, polusyon, sakit, ug bisan sa kamatayon!

 ‘Kahibulongan, apan imposible,’ basin moingon ka. Dili, dili kana imposible. Ngani, kana seguradong mahitabo. Gisaad ni Jesu-Kristo kanang matanga sa kagamhanan. Iyang gitudloan ang iyang mga sumusunod sa pag-ampo alang niana: “Busa, mag-ampo kamo sa ingon niini nga paagi: ‘Amahan namo nga anaa sa mga langit, pagabalaanon unta ang imong ngalan. Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.’”​—Mateo 6:​9, 10.

Tingali nahibalo ka sa mga pulong sa maong pag-ampo, kay milyonmilyong tawo sa tibuok kalibotan nahibalo o nakadungog niana. Apan nakapamalandong ka ba kon unsay gipasabot gayod nianang mga pulonga? Matikding ang Gingharian gilangkit sa pagkatuman sa kabubut-on sa Diyos sa yuta. Nan, unsay Gingharian sa Diyos? Ug unsay kabubut-on sa Diyos alang sa atong yuta?

Kon Unsay Gingharian sa Diyos

Usa ka kahubitan sa gingharian maoy usa ka kagamhanan nga gimandoan ug usa ka hari. Ang Gingharian sa Diyos maoy paagi ni Jehova nga Diyos sa pagpasundayag sa iyang pagkasoberano sa uniberso. Kini maoy harianong kagamhanan nga gimandoan sa iyang Anak, si Jesu-Kristo. Bahin sa kabubut-on sa Diyos mahitungod sa yuta, kini gipahayag sa yano ug tin-awng paagi sa Salmo 37:​10, 11: “Sa dili na madugay, ug ang daotan mawala na; ug pagasusihon mo gayod ang iyang dapit, ug siya mawala diha. Apan ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.”

Busa kon ikaw nawad-an ug paglaom tungod sa nagkadaotang mga prinsipyo niining kalibotana, magmadasigon. Ang Bibliya nagsaad nga ang mga kahimtang ug mga prinsipyo sa kalibotan hapit nang makaagom ug dako kaayong kausaban. Ang saad nga ang Gingharian sa Diyos hapit nang magmando sa yuta aron ipatuman ang mga prinsipyo sa Diyos maoy usa ka seguradong pasikaranan sa paglaom.

Ang pagkat-on sa pagsalig sa mga saad sa Gingharian sa Diyos makapalig-on sa atong pagbati sa kasegurohan. Hunahunaa ang mga prinsipyo nga nalangkit sa pagmando sa maong Gingharian: “Dali kamo, tan-awa ang mga kalihokan ni Jehova, kon giunsa niya pagpahinabo ang makapahinganghang mga hitabo sa ibabaw sa yuta. Gipahunong niya ang mga gubat hangtod sa kinatumyan sa yuta.” (Salmo 46:​8, 9) Pagkakahibulongan nga saad alang sa kalinaw ug kasegurohan!

Sa usa ka tagna mahitungod sa Hari sa Gingharian sa Diyos, si Jesu-Kristo, ang Salmo 72:12-14 nag-ingon: “Pagaluwason niya ang kabos nga nagatuaw alang sa tabang, ingon man ang sinakit ug si bisan kinsa nga walay magtatabang. Maluoy siya sa timawa ug sa kabos, ug pagaluwason niya ang mga kalag sa mga kabos. Gikan sa pagpanglupig ug sa kapintasan tubson niya ang ilang kalag, ug ang ilang dugo mahimong bililhon sa iyang mga mata.”

Mga Prinsipyo sa Bibliya

Tagda ang pipila ka prinsipyo nga gipasiugda sa Bibliya: “Malipayon kadtong mahunahunaon sa ilang espirituwal nga panginahanglan.” (Mateo 5:3) Lain pa: “Salig kang Jehova sa bug-os mong kasingkasing ug ayaw pagsalig sa kaugalingon mong pagsabot. Sa tanan mong mga dalan tagda siya, ug siya magatul-id sa imong mga alagianan.”​—Proverbio 3:​5, 6.

Ang Bibliya nagtudlo usab nga kitang tanan may tulubagon tungod sa mga prinsipyo nga atong gipiling sundon sa kinabuhi. Tagda ang Ecclesiastes 11:9: “Pagmaya, batan-ong lalaki, sa imong pagkabatan-on, ug tugoti ang imong kasingkasing nga magalipay kanimo sa mga adlaw sa imong pagkabatan-on, ug lakaw sa mga dalan sa imong kasingkasing ug sa mga butang nga makita sa imong mga mata. Apan hibaloi nga tungod niining tanan ang matuod nga Diyos magdala kanimo ngadto sa paghukom.” Ang pagkamay-tulubagon tungod sa atong mga buhat laktod gipahayag diha sa Proverbio 2:​21, 22: “Ang mga matul-id mao ang magapuyo sa yuta, ug ang walay-ikasaway mao ang magpabilin diha niana. Kon mahitungod sa mga daotan, sila pagaputlon gikan sa yuta; ug kon bahin sa mga maluibon, sila pagalukahon gikan niini.”

Tungod niining makapadasig nga paglaom bahin sa usa ka matarong nga kagamhanan, pagkamapuslanon nga ugmaron ang suod nga pagpakighigala sa Diyos! Ang pagpakig-uban sa ubang mga tawo nga gusto usab nga mahimong mga sakop sa Gingharian sa Diyos makatabang kanato nga magkinabuhi sa paagi nga kita makatagamtam sa pagmando sa iyang mahimayaong Gingharian ug sa mga bunga sa kahibulongang mga prinsipyo nga ipasiugda niini.

[Hulagway sa panid 10]

Ang mga maaghop “magapanag-iya sa yuta” ug “makakaplag gayod sa ilang tumang kalipay sa kadagaya sa pakigdait.”​—SALMO 37:11.