Usa ka Talagsaong Pangita—Apan Ganahan Kaayo Ko Niini

ANG kahilom sa kabuntagon nabalda sa ugong sa akong pinatuyo-paghimo nga pump boat samtang migikan ako sa hilom nga pantalan sa Gibsons. Banagbanag na​—panahon na nga pangitaon nako ang akong “gipangita.”

Sa kasadpang baybayon sa Canada, daghang pangita ang nalangkit sa pag-atiman sa kalasangan ug paglaging, sama sa akoa. Apan, pipila lang ka pangita ang sama ka talagsaon sa akoa. Ako manguha ug anod nga mga troso. Dili kini bag-ong pangita. Gani, ang pipila kanamo niining trabahoa maoy ikaupat na nga kaliwatan nga mga tigkuha ug anod nga troso. Makaingon ka tingali nga kami nagresiklo na sa wala pa kini mapopular! Nagtrabaho ako sa dapit sa Howe Sound ug sa Strait of Georgia, tali sa Vancouver Island ug sa baybayon sa British Columbia. Kining maong rehiyon maoy bahin lamang sa Vancouver Log Salvage District.

Ang usa sa pangunang mga paagi diin ang mga kompaniya sa laging maghakot sa mga troso maoy pinaagi sa pagtigom niini diha sa mga floating line (usa ka dapit sa pantalan nga gialihan ug kable o gisumpaysumpay nga mga troso), o pinaagi sa pagkarga niini sa mga kasko. Ang paghakot ug troso agi sa tubig madaginoton kaayo. Ug tungod sa Dagat Pasipiko, abunda ang tubig dinhi. Apan, dunay daghang hinungdan nga makapalisod sa proseso. Ang hangin ug ang mga pagtaob ug paghunas daling mausab, ug ang mga bagyo kalit kaayong motungha. Busa, daghang troso ang mangaanod. Diha niana malangkit ang mga tigkuha ug anod nga troso.

Pagpanguha sa Anod nga mga Troso

Ang lisensiyado lamang nga tigkuha ug anod nga troso ang puwedeng manguha ug ikabaligya nga mga troso nga nakalusot sa mga floating line o nahulog gikan sa mga kasko. Ang mga tigkuha ug anod nga troso maglukat ug lisensiya kada tuig ug sa unang higayon nga ihatag kini hatagan usab sila ug timbre nga adunay numero sa lisensiya. Ang bisan unsang troso nga makit-ang naglutawlutaw o nadagsa sa baybayon kutob sa maabot sa tubig kon molantong ang dagat mahimong kuhaon. Una amo kanang timbrehan sa numero sa among lisensiya.

Ang kompletog-kahimanan nga pump boat kinahanglanon usab. Dili kini sama sa pump boat nga kasagarang gigamit sa paglingawlingaw. Kami naggamit ug durable, lig-on nga mga pump boat o tug boat​—apan kini baga kaayo ug mga kasko. Ang mga ngipon-ngipon nga puthaw nga gitaod diha sa dulong maoy gamiton sa pagdusoduso sa mga troso, ug kanunay kaming magdaladala ug igong suplay sa mga himan nga naglakip sa duolag 4.5 metros nga lig-ong pisi nga gitaorag metal nga tugsok ang tumoy. Kon makakita kami ug anod nga troso, among iduso pag-ayo ang tugsok ngadto sa troso ug dayon ihigot ang pisi sa usa ka poste diha sa pump boat  aron maguyod ang troso. Dad-on usab namo ang tanang gikinahanglan nga kasangkapan alang sa kahilwas.

Ang usa ka bag-ong tigkuha ug anod nga troso makakaplag dayon nga kining pangitaa mas komplikado diay kay sa iyang gihunahuna sa sinugdan. Ang trabaho magsugod inigbanagbanag diha sa bisan unsang matanga sa panahon sa tibuok tuig. Sa tingtugnaw kinahanglan tingali namong bungkagon ang yelo aron lamang makagula sa pantalan.

Asa kami makakaplag ug mga troso? Nag-agad gayod kini sa duha ka pangunang mga butang: sa pagtaob ug paghunas sa dagat ug sa hangin. Ang eksperyensiyado nga tigkuha ug anod nga troso motan-aw sa usa ka tsart nga nagpakita kon kanus-a mohunas ug motaob ang dagat sa dili pa siya mogikan sa buntag. Maayo kaayo kon molantong ang dagat tungod kay makakuha kami ug mas daghang troso. Gawas pa, mas daling butaron ang mga troso gikan sa baybayon kon taob.

Hinungdanon gayod ang pagbantay sa panahon. Kanunay namong sutaon ang direksiyon sa hangin, tan-awon ang langit ug ang pag-irog sa mga panganod, ug susihon ang kolor sa tubig. Ang dumagsa magpatunghag ulan, samtang ang kanaway kasagarang magpasabot ug walay-dag-om nga kalangitan apan mas dagkong balod. Ang hanging pangamihan, nga nailhan dinhi ingong Squamish, sa tingtugnaw magpaila ug kamig kaayong mga temperatura, baloron nga kadagatan, niyebe, ug​—kami naglaom​—nangaanod nga mga troso.

 Ang pagduso sa tugsok ngadto sa naglutawlutaw nga troso kulbahinam gayod, apan ang tinuod nga makapahinam mao ang pagbutad sa mga troso gikan sa baybayon. Ang natagong mga bato ilalom sa tubig makaguba sa kasko sa among pump boat ug makapahinabog dako gayong kadaot. Kinahanglan kaming magbantay.

Samtang hakoton namo ang mga troso, amo kining guyoron paingon sa lainlaing inaptan nga mga dapit diin ang mga troso bugkoson ug ipondo. Magpabilin kini didto hangtod sa senemana nga adlaw sa pagguyod sa mga troso. Nianang adlawa, among hakoton ug ipanghatod ang tanan namong nakuha nga anod nga mga troso​—gikan sa 50 ngadto sa 100 ka buok​—ngadto sa mga tumoranan diin kini timbangon ug presyohan. Dayon bayran kami sumala sa kantidad sa among nakuha nga mga troso.

Morag nindot kini nga panginabuhi, apan pagbantay! Kining trabahoa dili alang niadtong mga talawan. Dunay daghang kapeligrohan niini. Ang pagkapakyas sa pagtagad sa mga kahimtang sa panahon mahimong peligroso. Maayo na lang nga ang dapit sa Howe Sound dunay daghang dapit nga katagoan samtang maghulat kami nga molabay ang bagyo. Laing risgo: Kon ang usa ka danghag nga tigkuha ug anod nga troso mahulog sa dagat panahon sa tingtugnaw, ang pipila lamang ka minuto diha sa bugnaw kaayong tubig mahimong makamatay. Ug nahinumdoman ba ninyo kadtong lig-ong mga pisi nga gihubit ganina? Aw, kon ang mga tugsok wala makadulot pag-ayo sa troso, kini makabuhi ug molabyog paingon sa sakayan. Maayo na lang, pipila ra ka tigkuha ug anod nga troso ang naigo sa maong mga tugsok​—apan usa kini ka kasinatian nga dili makalimtan.

Mga Balos Alang sa Kaugalingon ug sa Kalikopan

Nganong ganahan man kaayo ko niining akong trabaho? Ang Howe Sound maoy popular nga bakasyonan, diin daghang tawo ang maglumba sa pagpadagan sa ilang mga sakayang linayagan ug sakayang kinatigan. Ug tungod kay daghan kaayo ang isla, dunay gatosan ka balay bakasyonan sa ting-init ug busa daghan kaayong sakayang demotor. Ang mga lansa kanunayng magngadto-nganhi sa mga isla sa tibuok adlaw aron sa paghatod sa mga pasahero ug mga bisita. Tungod kay peligro kon dunay mga troso nga maglutawlutaw, dali rang masabtan ang kahinungdanon sa among buluhaton.

Makatabang kami sa kahilwas sa mag-agiagi nga mga lansa kon kuhaon namo ang nangaanod nga mga troso. Ang ubang mga troso nga dugay nang naglutawlutaw sa tubig mag-anam ug unlod. Tingali pipila lamang ka sentimetros sa troso ang naggimaw, nga tungod niana mameligro gayod ang mga manakayan. Bisan pa niana, alang kanamo kini maoy mapuslanong troso nga among kuhaon ug ibaligya. Pinaagi sa pagbuhat niana, gihimo namong luwas ang mga katubigan​—ug makatabang kami sa paghinlo usab sa kalikopan.

Para nako kining trabahoa makapahinam ug makalingaw. Dili gayod makalaay ang trabaho. Kon manakayan ko, ang talan-awon sa akong palibot mausab matag minuto. Nakakita na ko ug maanindot kaayong mga pagsubang sa adlaw sa tingtugnaw nga nakahatag ug naggilakgilak nga kolor rosas sa niyebe diha sa kabukiran. Nianang mga panahona, ganahan kaayo ko sa nanuhotsuhot nga kabugnaw sa hangin sa dagat.

Kasagaran kaayong makakita ug ihalas nga mga mananap. Nakakita ako ug mga otter, marten, mga leyon sa dagat, ug daghan kaayong poka. Akong gibantayan ang mga agila nga mangisda ug ang mga osa nga maglangoylangoy ngadto-nganhi sa mga isla nga dili layo sa baybayon. Makapahingangha gayod ang pagtan-aw sa lumod nga magduladula sa mga bula gikan sa palabad sa akong pump boat, sa abohong mga balyena nga mohanoy paglangoy, o sa mga grupo sa mga killer whale nga motabas sa mga balod!

Ang akong lolo nagsugod sa pagpanguha ug anod nga troso sa katuigan sa 1930. Gipasa niya ang iyang gusto sa tubig ug sa pagpangitag mapuslan o ikabaligya nga mga anod ngadto sa iyang mga anak. Ang akong papa, sa baylo, nagpasa sa iyang gusto ug pagtamod niining pangitaa ngadto sa iyang mga anak. Sa dihang naa na ko sa hustong pangedaron, gipili usab nako kining trabahoa. Siyempre, dili kini ang labing hinungdanong buluhaton sa akong kinabuhi. Ang akong pag-alagad sa Diyos maoy una​—ug mas dako ug balos. Apan, nalipay usab ko sa akong sekular nga trabaho sulod na sa duolan sa 50 ka tuig. Naghinamhinam pa gihapon ko sa pagpangita ug mga troso.

Ang akong pamilya mokuyog usab nako sa akong trabaho. Usahay sa usa ka igang nga gabii sa ting-init, mangadto mi sa usa ka baybayon ug mangitag mga anod. Samtang nagguyod kami sa among mga troso balik ngadto sa pantalan, anaa sa among luyo ang maanindot nga pagsalop sa adlaw, nagpiyakpiyak ang mga kanaway sa ibabaw namo, naggilakgilak ang mga bula gikan sa likod sa among sakayan, ug nagsugod pagkidlapkidlap ang mga suga diha sa baybay​—aw, kining tanan makahatag sa usa ug kalinaw ug makapabati kaniyang suod sa Maglalalang. Sa akong hunahuna mao kini ang pangunang rason kon nganong ganahan kaayo ko sa akong trabaho.​—Tinampo.

[Hulagway sa panid 10]

Usa ka tigkuha ug troso naghigot sa usa ka anod nga troso

[Mga hulagway sa panid 10]

Kasagaran kaayong makakita ug ihalas nga mga mananap panahon sa pagpanguha ug troso

[Hulagway sa panid 11]

Ang tumoranan ug troso sa Howe Sound bukas gihapon bisan sa tingtugnaw