Ang Makamatayng Misyon nga Napulihan ug Makigdaitong Buluhaton

SUMALA SA GIASOY NI TOSHIAKI NIWA

Usa ka pilotong Hapones kanhi nga nabansay alang sa kamikaze nga pag-atake batok sa barko de giyera sa mga Amerikano sa Gubat sa Kalibotan II nag-asoy sa iyang gibati samtang nagpaabot sa maong makamatay nga misyon.

KAY bug-os nga naparot sa Gubat sa Midway niadtong Hunyo 1942, ang pagpangsakop ug teritoryo sa mga Hapones diha sa Pasipiko nahunong. Sukad niadto, sunodsunod na ang kapildihan nga naagoman sa Japan batok sa Tinipong Bansa ug sa mga kaalyado niini sa dihang gisugdan nila pagbawi ang mga teritoryo nga giilog sa Japan.

Sa Septiyembre 1943 gipahibalo sa gobyerno sa Japan nga ang mga estudyante sa unibersidad nga kanhi wala paapila sa serbisyo militar girekluta na karon. Sa Disyembre, sa edad nga 20, ako miapil sa navy diha sa tunghaan. Usa ka bulan sa ulahi, ako nahimong estudyante sa pagkapiloto sa navy. Sa Disyembre 1944, ako gibansay sa pagpalupad ug usa ka matang sa ayroplanong iggugubat nga gitawag ug Zero.

Kamikaze Special Attack Corps

Hapit nang mapildi ang Japan. Pagka-Pebrero 1945, misamot ang pagpamomba sa mga B-29 batok sa Japan. Sa samang higayon, ang mga panon sa navy sa Tinipong Bansa nagpaduol sa unay sa Japan, nga naghimo niining puntirya sa mga ayroplanong tigbomba nga naggikan sa dagko kaayong mga barko.

Pipila ka bulan una pa niana, ang militaryong mga lider sa Japan nakadesisyon sa paglansad ug kataposang pagpakigbugno nga naggamit ug mga taktika sa pagpakamatay. Bisan pag nianang higayona dayag na nga mapildi sa gubat ang Japan, ang maong desisyon nakapadugay sa gubat ug tinong nakapatay pa ug dugang libolibong tawo.

Sa ingon, namugna ang Kamikaze Special Attack Force. Kini gikuha sa ngalan sa balaang hangin, ang kamikaze, usa ka bagyo nga sumala sa tradisyon nagpadpad palayo sa mga barko sa mga manunulong nga taga-Mongolia sa ika-13ng siglo. Alang sa unang kamikaze nga pag-atake, ang matag usa sa lima ka Zero nga mga ayroplanong iggugubat gikargahan ug 250-kilos nga bomba nga ibangga ngadto sa puntiryang barko agig pagpakamatay.

Ang sugo sa pag-organisar ug linaing armada sa pagpakamatay gihatag sa Yatabe Naval Flying Corps, diin ako nahisakop. Kaming tanan nakadawat ug papeles nga sulatan, nga nagpakita kon moboluntaryo ba kami nga mamembro sa maong grupo nga magpakamatay sa pag-atake.

 Ako nagtuo nga angay nakong ihalad ang akong kinabuhi alang sa akong nasod. Apan bisan pag akong itanyag nga ihatag ang akong kinabuhi pinaagi sa pagpalupad ug ayroplano alang sa usa ka misyon sa pagpakamatay, mahimong maigo ako sa kaaway sa dili pa nako maigo ang puntirya ug mamatay sa walay kapuslanan. Malipay kaha ang akong inahan kon akong taposon ang akong kinabuhi nga wala mahimo ang akong mga obligasyon sa pamilya? Nalisdan ako sa pagkombinsir sa akong kaugalingon nga ang pagboluntaryo alang sa misyon sa pagpakamatay mao ang labing maayong paagi sa paggamit sa akong kinabuhi. Bisan pa niana, miboluntaryo ako.

Sa Marso 1945 gimugna ang unang grupo sa Yatabe Special Attack Corps. Bisan pag napili ang 29 sa akong mga kauban, ako wala maapil. Human makadawat ug linaing pagbansay, sa pagka-Abril sila gieskedyul sa paglupad alang sa makamatayng misyon gikan sa base militar sa Kanoya sa distrito sa Kagoshima. Sa wala pa sila ibalhin sa Kanoya, akong giduaw ang akong mga higala, naglaom nga mahibaloan ang ilang gibati samtang ilang giatubang ang misyon sa pagpakamatay.

“Mangamatay kita,” ang usa kanila kalmadong misulti, “apan ayaw pagdali nga mamatay. Kon dunay usa kanato nga makalabang buhi, kinahanglang sultihan niya ang uban kon unsa ka bililhon ang pakigdait ug paningkamotan kini sa pagkab-ot.”

Sa Abril 14, 1945, nanglupad ang akong mga kauban. Pipila ka oras sa ulahi, kaming tanan naminaw sa sibya aron mahibaloan ang mga resulta. Ang tigsibya miingon: “Ang Unang Showa nga Yunit sa Kamikaze Special Attack Force nagpatiurok ngadto sa mga barko sa kaaway, nga sidlakan sa Kikai Shima. Ang tanan nangamatay.”

Ohka​—Bombang May Tawo

Human sa duha ka bulan, gibalhin ako sa Konoike Naval Flying Corps ingong membro sa Jinrai Special Attack Squadron. Ang jinrai nagkahulogang “ang balaang dalugdog.” Ang armada gilangkoban ug mga ayroplanong manukad sa mamala (gitawag ug mga Attacker), mga ayroplanong eskort, ug mga ayroplanong tigbomba nga manukad sa dagko kaayong mga barko.

Diha sa matag “inahang” ayroplano​—nga mao ang duhag-makina nga Attacker​—nagbitay ang usa ka Ohka, nga nagkahulogang “cherry blossom.” Kini nagsimbolo sa batan-ong mga piloto nga andam sa paghalad sa ilang mga kinabuhi. Ang Ohka maoy usag-lingkoranan nga glider nga ang pako may sukod nga lima ka metros, nga may gibug-atong 440 kilos. Kini adunay halos usa ka toneladang bomba diha sa simod niini.

Samtang ang inahang ayroplano magkaduol sa puntirya, mosakay ang usa ka piloto diha sa Ohka, nga mobulag dayon sa inahang ayroplano. Human mopadailos sa makadiyot sa tabang sa tulo ka roket, nga ang matag usa modurar ug napulo ka segundo, kini mopatiurok ngadto sa puntirya. Kini puwedeng nganlan ug bombang may tawo. Sa dihang ikalansad na, kini dili na mapabalik!

Sa mga panahon sa pagpraktis, ang piloto sa Ohka mosakay sa Zero nga ayroplanong iggugubat ug  mopatiurok ngadto sa puntirya sa gihabogong mga 6,000 metros. Daghang piloto ang akong nakita nga nawad-an sa ilang kinabuhi sa maong mga pagpraktis.

Sa wala pa ako maasayn sa maong armada, ang unang grupo nakalupad na. Kini gilangkoban ug 18 ka Attacker nga dunay mga Ohka, nga giubanan ug 19 ka ayroplanong iggugubat. Ang mga Attacker bug-at ug hinay. Walay usa kanila ang nakaabot sa ilang mga puntirya. Ang tanang Attacker ug ang ilang mga eskort gipahagsa sa mga ayroplanong iggugubat sa Tinipong Bansa.

Kay wala nay nabiling eskort nga mga ayroplanong iggugubat, gihimo sa Jinrai Squadron ang mga misyon niini sa ulahi nga walay eskort. Kadtong milupad sa ulahi wala na gayod makabalik. Silang tanan namatay, nangahanaw diha sa panggubatan sa Okinawa.

Kataposang mga Adlaw sa Gubat

Sa Agosto 1945, gibalhin ako ngadto sa Otsu Naval Flying Corps. Ang base militar nga gibalhinan kanako nahimutang sa tiilan sa bukid sa Hiei-zan duol sa siyudad sa Kyoto. Kay nagdahom sa pagdagsa sa mga puwersa sa Tinipong Bansa sa Japan, dihay mga plano sa paglansad ug mga Ohka gikan sa maong bukid sa paghimog mga atake sa pagpakamatay batok sa mga barko de giyera sa Tinipong Bansa. Dihay gigamang lansaranan ibabaw sa bukid.

Among gihulat ang mando sa paglupad. Apan wala gayod moabot ang maong mando. Human ilampurnas sa mga bomba atomika ang Hiroshima ug Nagasaki niadtong Agosto 6 ug 9, ang Japan bug-os nga misurender sa Tinipong Bansa ug sa mga kaalyado niini pagka-Agosto 15. Sa kataposan natapos ang gubat. Diriyot na kong mamatay.

Sa kataposan sa Agosto, mipauli ako sa akong lungsod nga natawhan sa Yokohama, apan abo na lang ang nabilin sa akong balay tungod sa pagpamomba sa mga ayroplanong B-29. Nawad-an na gayod ug paglaom ang akong pamilya. Ang akong igsoong babaye ug pag-umangkong lalaki namatay sa sunog. Bisan pa niana, nahupay kami tungod kay nakapauli nga buhi ang akong manghod nga lalaki.

Taliwala sa kagun-oban ug grabeng kakulang sa pagkaon, mibalik ako sa unibersidad aron makatapos sa pagtuon. Human sa usa ka tuig nga pagtungha, ako migraduwar ug nakakitag trabaho. Sa 1953, akong giminyoan si Michiko ug sa ulahi nahimong amahan sa duha ka anak nga lalaki.

Ang Akong Pagpangitag Pakigdait

Sa 1974, si Michiko nagsugod sa pagtuon sa Bibliya uban sa usa sa mga Saksi ni Jehova. Wala madugay siya nagsugod sa pagtambong sa ilang mga tigom ug sa pagpakigbahin sa ilang buluhatong pagsangyaw. Supak ako sa iyang kanunayng paglakaw. Iyang gipatin-aw nga ang Kristohanong ministeryo makapalambo sa tinuod nga pakigdait ug kalipay. Kon tinuod kana, sa akong hunahuna, ako dili angayng mosupak kaniya. Hinunoa, ako angayng mokooperar.

Nianang mga panahona, akong gisuholan nga magbantay sa magabii ang pipila ka batan-ong mga Saksi. Sa pag-abot sa batan-ong mga Saksi, akong gipangutana sila bahin sa ilang organisasyon ug ministeryo. Nahingangha ako sa pagkahibalo nga, dili sama sa ubang mga batan-on nga parehas nilag edad, sila bug-os ug hunahuna ug may espiritu sa pagsakripisyo sa kaugalingon. Ilang nakat-onan kining mga hiyasa gikan sa Bibliya. Ang mga Saksi sa tibuok kalibotan, matod nila, walay pagpihig sa rasa ug lig-ong nagtuman sa sugo sa Bibliya sa paghigugma sa Diyos ug sa ilang mga silingan. (Mateo 22:36-40) Sila nag-isip sa ilang mga kauban ingong mga igsoon, bisag unsa pa ang nasyonalidad.​—Juan 13:35; 1 Pedro 2:17.

‘Taas ra kaayo ang ilang mga mithi,’ maoy akong hunahuna. Sanglit daghang relihiyon sa Kakristiyanohan ang nagkontrahanay, dili gayod ako makatuo nga lahi ang mga Saksi ni Jehova.

Akong gisulti kanila ang akong mga pagduhaduha. Gigamit ang Tinuig nga Basahon sa mga Saksi ni Jehova, gipakita kanako sa batan-ong mga Saksi nga ang  mga Saksi sa Alemanya nabilanggo ug gipamatay pa gani tungod sa ilang neyutral nga baroganan ubos sa rehimen ni Hitler. Nakombinsir ako nga ang mga Saksi ni Jehova maoy matuod nga mga Kristohanon.

Sa kasamtangan, ang akong asawa nagpasimbolo sa iyang pagpahinungod sa Diyos pinaagi sa pagpabawtismo sa tubig sa Disyembre 1975. Gitanyagan ako ug pagtuon sa Bibliya nianang higayona. Apan, kon akong hunahunaon ang akong pinansiyal nga mga obligasyon, sama sa galastohon sa pag-eskuyla sa akong mga anak ug mga bayranan sa among balay, ako walay kaisog sa pagdawat sa tanyag. Ang minyo nga mga kalalakin-an sa kongregasyon nagpasibo sa ilang sekular nga mga trabaho aron makabaton ug dugang nga libreng panahon. Ako nagtuo nga mao usab kini ang gidahom kanako. Apan human ipasabot kanako kon sa unsang paagi mabalanse ang Kristohanong kinabuhi ug sekular nga trabaho, sa kataposan ako midesidir sa pagtuon sa Bibliya uban sa mga Saksi ni Jehova.

Desisyon sa Pag-alagad sa Diyos sa Pakigdait

Human sa duha ka tuig nga pagtuon, ang igsoon nga maoy nagtuon kanako sa Bibliya nangutana kon nakahunahuna na ba ako sa pagpahinungod sa akong kinabuhi ngadto sa Diyos. Apan, dili ako buot nga mohimo sa maong lakang, ug nakatugaw kana kanako.

Usa ka adlaw niana, nagdalidali ako sa pagkanaog sa hagdan diha sa akong gitrabahoan. Ako napandol, nahulog, nalamba ang likod sa akong ulo, ug nawad-ag panimuot. Sa dihang naulian ako, hilabihang sakita sa akong ulo ug gidala ako sa ospital sakay sa usa ka ambulansiya. Bisan tuod ug mihubag pag-ayo ang likod sa akong ulo, kini wala moliki o magdugo sa sulod.

Pagkadako sa akong pasalamat kang Jehova sa kinabuhi nga akong nabatonan! Sukad niadto, ako determinadong mogamit niini sa pagbuhat sa kabubut-on ni Jehova, ug akong gipahinungod ang akong kinabuhi kaniya. Sa Hulyo 1977, ako gibawtismohan sa edad nga 53. Ang akong kamagulangang anak, si Yasuyuki, nagtuon usab sa Bibliya ug nabawtismohan mga duha ka tuig sa ulahi.

Mga napulo ka tuig human sa akong bawtismo, ako miretiro sa akong trabaho. Sulod nianang panahon, ako nagsubay sa Kristohanong dalan, nga nagbalanse niini sa akong sekular nga trabaho. Sa pagkakaron, ako may pribilehiyo sa pag-alagad ingong ansiyano sa Yokohama, nga naggugol ug daghang panahon diha sa Kristohanong ministeryo. Ang akong kamagulangang anak nagaalagad ingong ansiyano ug bug-os-panahong ministro diha sa silingang kongregasyon.

Kay wala mamatay uban sa special attack squadron bisan pa sa makamatayng misyon niini, ako mapasalamaton nga ako buhi ug akong giisip nga usa ka kadungganan nga makapakigbahin sa pagsangyaw ‘niining maayong balita sa gingharian.’ (Mateo 24:14) Kombinsido gayod ako nga ang labing maayong dalan sa kinabuhi mao ang paglakaw ingong usa sa katawhan sa Diyos. (Salmo 144:15) Sa bag-ong kalibotan nga hapit nang moabot, ang mga tawo dili na gayod makasinati ug gubat, sanglit ang “nasod dili mobakyaw sa espada batok sa usa ka nasod, ni makakat-on pa sila sa gubat.”​—Isaias 2:4.

Kon kabubut-on sa Diyos, gusto nakong makita kadtong akong mga kailang nangamatay sa gubat nga pagabanhawon. Mahimong kulbahinam unya nga makigsulti kanila bahin sa makigdaitong kinabuhi nga ilang matagamtam sa usa ka paraisong yuta ilalom sa matarong nga pagmando sa langitnong Gingharian sa Diyos!​—Mateo 6:​9, 10; Buhat 24:15; 1 Timoteo 6:19.

[Hulagway sa panid 19]

Niadtong ako membro pa sa naval air force

[Hulagway sa panid 18, 19]

“Ohka”​—Usa ka bombang may tawo

[Credit Line]

© CORBIS

[Hulagway sa panid 20]

Duyog sa akong mga kauban sa wala pa ang makamatayng misyon. Ako ang ikaduha gikan sa wala, ang bugtong nga nahibiling buhi

[Hulagway sa panid 21]

Uban sa akong asawa, si Michiko, ug sa akong kamagulangang anak, si Yasuyuki

[Picture Credit Line sa panid 18]

U.S. National Archives photo