“Hingpit nga Kahayag”

KON nakahikap kag bombilya sa sugang dagitabnon nga taudtaod nang gipasiga, nasayod ka nga kana tingali init kaayo. Ang kainit nga ipatungha sa bombilya mao ang resulta sa nausik nga enerhiya. Ang kasagarang bombilya sa suga mohatag lang ug 10 porsiyento sa enerhiya niini ingong kahayag, samtang 90 porsiyento ang mausik ingong kainit. Kon itandi, ang gamitoyng insekto nga mopagawas ug kahayag nga ginganlag aninipot (tan-awa sa itaas, gipadako) halos 100 porsiyento ka episyente.

Diyutay kaayo ang enerhiya nga mausik sa mga aninipot nga ang kahayag nga ipagawas niini ginganlag “hingpit nga kahayag.” Sa unsang paagi ginahimo kini? Ang tiyan sa aninipot adunay organikong substansiya nga nailhang luciferin. Sa dihang ang oksiheno makaabot sa tiyan pinaagi sa tubo nga gitawag ug abdominal trachea, kini masagol sa luciferin, ug ang moresultang kemikal nga reaksiyon mopagawas ug luspad-dalag ngadto sa pulahon-berdeng kadan-ag.

Ang mga selula sa aninipot nga magpatungha sa kahayag may mga kristal sa uric-acid usab, nga makatabang nga ipabanaag ang kahayag halayo sa tiyan sa insekto. Nag-ingon ang mga siyentipiko nga ang mga aninipot mogamit sa kahayag niini sa pagdanig mga kaparis ug ang nagkadaiyang mga espisye sa mga aninipot modan-ag ug lainlaing mga disenyo ug gikusgon sa kahayag.

Dili ka ba mouyon nga ang pagkabuhat niining gagmitoyng mga linalang maghatag ug pagdayeg sa Maglalalang niini, si Jehova nga Diyos? Oo, sumala sa gipahayag sa salmista, “ang tanang may gininhawa​—ipadayeg si Jah.”​—Salmo 150:6.

[Picture Credit Line sa panid 31]

© Darwin Dale/Photo Researchers, Inc.