Paggamit sa Pagmata! sa Epektibong Paagi

ANG 16-anyos nga si Vanessa, usa sa mga Saksi ni Jehova sa Tinipong Bansa, kinahanglang mosulat ug report sa tunghaan bahin sa anorexia. “Nanukiduki ako,” matod niya, “apan diyutayng impormasyon lang ang akong nakaplagan. Gisulti nako kini sa akong mga ginikanan, ug sila misugyot nga manukiduki ako bahin niining ulohana diha sa among mga publikasyon.”

Pinaagi sa pagpanukiduki diha sa mga publikasyon sa mga Saksi ni Jehova, si Vanessa nakakaplag ug daghan kaayong impormasyon alang sa iyang report. “Apan kini maoy usa ka bahin lamang sa maong asaynment,” matod niya. “Kinahanglan usab akong mosaysay atubangan sa magtutudlo ug sa 20 ka estudyante!” Unsaon man ni Vanessa pag-atubang kining maong malisod nga problema?

Sama sa tanang Saksi ni Jehova sa tibuok kalibotan, si Vanessa gibansay alang sa pagpakigsulti sa mga tawo diha sa Teokratikanhong Tunghaan sa Ministeryo, nga ginahimo diha sa lokal nga Kingdom Hall. “Pinaagi niining maong tunghaan, kami naandam pag-ayo sa pagsangyaw ug sa pagsulti ngadto sa uban,” matod ni Vanessa. “Makadawat usab kami ug tambag kon unsay kinahanglan namong pauswagon aron ang mga tawo mas makasabot kanamo.” Unsay resulta sa paghago ni Vanessa alang sa iyang report sa tunghaan? “Akong nadawat ang kinatas-ang grado,” siya miingon.

Si Vanessa maoy usa sa daghang batan-on nga naggamit sa binase-sa-Bibliya nga mga publikasyon ug ubang espirituwal nga pagbansay sa epektibong paagi. Kining maong mga batan-on angayng dayegon, kay sila nagsunod sa tambag sa Ecclesiastes 12:1: “Hinumdomi, karon, ang imong Dakong Maglalalang sa mga adlaw sa imong pagkabatan-on.”