“Pag-atiman sa Bata sa Paagi sa Kangaroo”—Solusyon sa Problema nga Nagpameligro sa Kinabuhi?

Ang lugar maoy usa ka ospital sa Bogotá, Colombia, sa 1979. Tungod kay gamay ra kaayo ang mabuhi sa mga batang naahat pagkatawo, ang usa ka doktor sa Colombia nakamugna ug usa ka talagsaon kaayong solusyon​—“pag-atiman sa bata sa paagi sa kangaroo.”

Malisod nga tahas alang sa mga doktor nga tabangang makapabiling buhi ang mga batang naahat pagkatawo. Ang mga bata nga gaan ug timbang sa pagkahimugso sagad nga ibutang sa mainit nga inkubetor, diin sila magpuyo hangtod nga mobug-at ang ilang timbang. Apan, diha sa nagakaugmad nga mga nasod ang naghuot nga mga pasilidad, dili-maayong sanitasyon, ug kakulang sa medikal nga kawani ug kasangkapan sagad nga moresulta sa peligrosong pagtakdanay ug mga sakit.

Ang usa ka doktor sa Colombia nakamugna ug usa ka paagi nga morag nakapakunhod niining problemaha. Unsa kining paagiha? Sa dihang maahat pagkatawo ang usa ka bata, kini atimanon sa naandang paagi hangtod nga mahimong normal ang kahimtang niini. Sa kasamtangan, ang inahan bansayon sa pag-atiman sa bata. Kon hohimsog na ang bata, ang inahan maoy magsilbing inkubetor. Sa unsang paagi? Pinaagi sa pagbangan sa bata diha sa iyang dughan. Luwas diha sa samag-kangaroo nga puyopuyo niini, ang bata kanunayng mainit ug daling mapasuso sa gatas sa iyang inahan. Tungod niini, ang metodo sagad nga gitawag ug pag-atiman sa bata sa paagi sa kangaroo.

Walay gikinahanglan nga mahalong kasangkapan. Ang inahan magsul-ob ug nahiangayng blusa o naandang sinina nga may bakos. Kon igoigo na ang gibug-aton sa bata, ang inahan ug ang bata makapauli na, nga regular nga magbalikbalik sa ospital alang sa pagpahiling.

Ang pasiunang mga panukiduki nagpakita nga ang pag-atiman sa bata sa paagi sa kangaroo maoy epektibo ug luwas. Dugang pa, daw gipalambo niini ang suod nga bugkos tali sa masuso ug sa inahan. Dili ikatingala nga kining maong metodo gigamit na diha sa daghang nasod. Sa Mexico, ang mga paryente gibansay nga mahimong “kangaroo nga mga amahan,” “kangaroo nga mga lola,” ug bisan “kangaroo nga mga igsoong babaye” aron makatabang sa dihang ang inahan nagkinahanglan ug angayang pahulay. Si Dra. Guadalupe Santos, kinsa nagdumala sa usa ka programa sa pag-atiman sa bata sa paagi sa kangaroo didto sa Mexico, miingon sa Pagmata!: “Gigamit namo kini nga metodo sukad pa sa 1992 ug among nakita kon unsa ka epektibo kini. Diyutay na lang ang gikinahanglang inkubetor ug gamayng panahon na lang ang gigugol sa ospital.”