Ang Kalinaw sa Kalibotan Dili Lamang Usa ka Damgo!

KON si Alfred Nobel makahimo sa pagdumdom sa miaging siglo, magmalaomon kaha siya mahitungod sa kalinaw sa kalibotan? Segurado, malipay siyang mahibalo nga daghan naningkamot gayod sa pagtapos sa gubat. Bisan pa niana, maatubang niya ang usa ka mapait nga kamatuoran. Kini gisuma ni Propesor Hugh Thomas: “Ang ikakawhaang siglo​—bisan pag ilado tungod sa sosyal nga kauswagan ug sa mas dakong pagtagad sa kagamhanan bahin sa pagkinabuhi sa mga kabos​—giharian sa masinggan, tangke digira, B-52, bomba nukleyar ug, kataposan, sa missile. Kini gipaila sa mas dugoon ug malaglagong mga gubat kay sa ubang panahon.” Si Thomas midugang nga “busa, usa lamang ka opinyon kon ang maong yugto ikapaila ba gayod ingong mauswagon o dili.”

Mas dako ba ang paglaom alang sa kalinaw sa kalibotan karon nga misulod na kita sa ika-21ng siglo? Dili gayod! Nagtumong sa mga pag-atake sa terorista niadtong Septiyembre 11, 2001, sa New York City ug sa Washington, D.C., ang magasing Newsweek nag-ingon: “Diha sa kalibotan nga ang mga ayroplanong 767 makombertir ingong giniyahan nga mga missile, wala nay butang nga morag imposible, katingad-anan​—o labing grabe, masanta pa.”

Nag-ingon ang pipila nga aron matuman ang kalinaw sa kalibotan, kinahanglang mahitabo ang duha ka butang: Una, kinahanglang mahitabo ang radikal nga mga kausaban diha sa panglantaw ug panggawi sa mga tawo; ug ikaduha, kinahanglang maghiusa ang tanang nasod ilalom sa usa ka kagamhanan. Gitagna sa Bibliya ang usa ka panahon nga ang kalinaw makab-ot ​—apan dili pinaagi sa mga paningkamot sa tawo. Ang Salmo 46:9 nag-ingon bahin sa Maglalalang, si Jehova nga Diyos: “Gipahunong niya ang mga gubat hangtod sa kinatumyan sa yuta.” Sa unsang paagi himoon kini sa Diyos? Pinaagi sa iyang Gingharian, nga balikbalik giampo sa daghan nga sinserong mga tawo. Ang maong Gingharian dili maoy lisod-sabton nga kahimtang sa kasingkasing, kondili usa ka tinuod nga kagamhanan nga pinaagi niana ang Diyos magpatuman sa kalinaw gikan sa usa ka tumoy sa yuta ngadto sa laing tumoy. Ang inspiradong manalagnang si Isaias nagtagna nga ang mga ginsakpan sa maong kagamhanan dili na ‘makakat-on pa sa gubat.’ (Isaias 2:4) Pinaagi sa tibuok-kalibotang edukasyonal nga programa, ang mga tawo makakat-on sa pagpuyo diha sa kalinaw ug sa ingon “ilang pagasalsalon ang ilang mga espada nga mga punta sa daro ug ang ilang mga bangkaw nga mga galab.”

Bisan karon, ginabuhat kini sa mga Saksi ni Jehova. Sila dili mobakyaw ug mga hinagiban batok sa ilang isigkatawo, bisan pag sila nahisakop sa daghang nagkalainlaing etnikong mga pundok ug nagapuyo diha sa kapig 200 ka nagkalainlaing mga nasod. Ang ilang neyutral nga baroganan taliwala sa gidaot-sa-gubat nga kalibotan nagpamatuod nga ang kalinaw dili mithianong damgo kondili posible gayod.

Gusto mo bang makakat-on ug dugang pa bahin niining gipasukad-sa-Bibliya nga paglaom alang sa tinuod nga kalinaw? Palihog pagsulat ngadto sa mga magpapatik niining magasina, nga gamiton ang adres nga labing duol kanimo nga gilista sa panid 5, o pakigkontak sa mga Saksi ni Jehova diha sa inyong dapit.