Ang “Kinaugalingon nga Relihiyon” Mao ba ang Tubag?

TUNGOD KAY ANG ORGANISADONG RELIHIYON wala na subaya sa mga tawo, dili ikatingala nga daghan kaayong tawo ang magmugna sa ilang kinaugalingon nga relihiyon. Apan, ang mga pangutana mao, Ang pagmugna ba niini tinuod nga makatagbaw sa espirituwal nga mga panginahanglan sa usa ka tawo? Ang “kinaugalingon nga relihiyon” mao ba ang tubag?

Aron matubag kining mga pangutanaha, tingali tagdon una nato kon makabarog ba gayod ang kinaugalingon nga relihiyon sa dihang kini atong susihon pag-ayo ginamit ang atong “gahom sa pagpangatarongan,” ang usa sa labing talagsaong mga gasa nga gipanag-iya sa mga tawo.​—Roma 12:1.

Ang tawong makataronganon dili modawat ug usa ka ideya kon kini nagsumpakiay. Apan, sa surbi bahin sa kinaugalingon nga relihiyon sa Sweden, nakaplagan nga ang mga tawo kasagarang “basta na lang magsagol sa lainlain (ug malagmit nagsumpakiay) nga mga pilosopiya sa kinabuhi ngadto sa ilang kinaugalingon nga pilosopiya.”

Pananglitan, 2 ka porsiyento lang niadtong nag-angkong “Kristohanon sa ilang kaugalingong paagi” ang naghisgot kang Jesus, bisan ingong usa ka persona sa kasaysayan. Apan, ang pagtuo sa reinkarnasyon subsob nga gihisgotan. Nan, dili ba usa ka panagsumpaki kon isipon sa usa ka tawo ang iyang kaugalingon ingong sumusunod ni Jesu-Kristo samtang nagsalikway sa iyang kinabuhi ug mga pagtulon-an​—ug nagsagop pa gani sa mga doktrina nga sukwahi kaayo nianang gitudlo ni Kristo? *

Ang atong gahom sa pagpangatarongan dili usab buot nga modawat sa mga butang nga morag dili gayod klaro ug dili gayod ikapatin-aw. Apan, sa dihang gipangutana kon motuo ba sila sa “Diyos o sa samag-Diyos nga gahom,” kadaghanan sa mga giinterbiyo mitubag nga tingali naglungtad ang “Usa ka dili-matino nga gahom” nianang matanga. Ang usa miingon: “Motuo ko sa usa ka butang nga dili-kinaiyanhon apan dili kinahanglan nga kini maoy sa dagway sa usa ka Diyos.” Kadtong motuo sa Diyos nagtuo nga siya “medyo walay hinungdanong papel sa ilang kinabuhi.” Busa gihubit sa maong taho ang kinaugalingon nga relihiyon ingong usa ka “kalibotan sa dili-tino ug dili-organisadong mga ideya,” ug kini mihinapos pinaagi sa pagkutlo sa usa sa labing komon nga mga tubag: “Nagtuo ko sa usa ka butang, apan dili ko segurado kon unsa kini.”

Susama usab niini ang mga resulta sa usa ka pagtuon bahin sa kinaugalingon nga relihiyon sa Canada. Ang magasing Alberta Report nag-ingon: “Atong makita karon nga daghan kaayo ang nagtuo sa halos bisan unsang butang nga mahanduraw, apan kini dili masabtan ug dili makataronganon. Ug unya sa dihang atong sulayan sa pagtino ang matang sa giya nga ihatag niining maong kinaugalingon nga mga tinuohan diha sa kinabuhi sa mga tawo, kini wala gayoy ikahatag nga giya. Walay kinatas-ang moral  nga awtoridad. Busa walay bili ang ilang kinaugalingon nga mga tinuohan.” Ang magasin naghisgot bahin sa “natipaktipak nga diyos” tungod kay kadtong nagsagop sa maong mga tinuohan “nagpilig mga piraso sa naandang kredo.” Sa imong hunahuna makataronganon kaha nga ibase ang relihiyosong mga tinuohan​—bisan ang paglaom sa umaabot​—sa maong hanap, huyang, ug natipaktipak nga mga ideya?

Ang Atong Panginahanglan sa Panag-ubanay

Ang panag-ubanay, panag-igsoonay, ug panaghiusa dugay nang gipakahamili sa relihiyosong mga magtutuo. (Buhat 2:​42, 46) Apan tungod kay ang kinaugalingon nga relihiyon maoy kinaugalingon gayod, sa unsang paagi matagan-an niini ang maong mga panginahanglan?

Dili ba ang kinaugalingon nga relihiyon, nga “ang kada tawo maoy naglangkob sa iyang kaugalingon relihiyon,” nakapasamot ug nakapagrabe lang sa relihiyosong panagkabahin sa mga tawo? “Ang relihiyon karon maoy usa ka butang nga nag-agad sa kinaugalingon nga opinyon . . . , ug busa kita nahimong usa ka nasod nga dili lang kay dunay pipila ka gatos ka lainlaing mga kredo kondili dunay pipila ka milyon,” nagkomento ang Alberta Report. Nan, dili ikatingala nga ang kinaugalingon nga relihiyon gihubit ingong usa ka matang sa espirituwal nga anarkiya.

Komosta ang Mahitungod sa mga Prinsipyo?

Ang Sweko nga Obispong si Martin Lönnebo nag-ingon sa dihang giinterbiyo sa mantalaang Svenska Dagbladet nga “ang kinaugalingon nga relihiyon dili makapauswag sa atong panahon, ug nalisdan kini sa pagpasa sa mga prinsipyo niini ngadto sa usa ka bag-ong panahon.” Kini nga opinyon gipamatud-an sa usa ka paagi sa kasagarang tinamdan sa Swekong mga ginikanan bahin sa pagmatuto sa ilang mga anak. Ang Svenska Dagbladet nagsumaryo sa maong tinamdan niining paagiha: “Tuohi ang gusto nimong tuohan! Ug ayaw pugsa ang imong mga anak sa paghimog desisyon. Apan papilia sila sa dihang sila anaa na sa hustong edad.”

Giangkon sa mantalaan nga ang pagtudlo ug relihiyosong mga prinsipyo sa mga bata maisip tingali nga pagdoktrina. Apan, ang mantalaan mihinapos: “Ang pagtudlo ug relihiyosong mga prinsipyo sa mga bata maoy mapuslanon ug mahimong ang bugtong paagi aron sila . . . makadesidir alang sa ilang kaugalingon.” Sa pagkatinuod, ang kahimtang karon sa mga batan-on nagpakita nga ang kinaugalingon nga relihiyon walay nahimo sa paghiusa sa mga pamilya pinasukad sa lig-ong mga prinsipyo nga ikapasa gikan sa usa ka kaliwatan ngadto sa sunod nga kaliwatan.

Busa, mopatim-aw nga ang kinaugalingon nga relihiyon dili makahatag ug kasaligan, dili-mag-usab-usab nga mga tubag sa mga pangutana sa kinabuhi, ni makahiusa kini sa mga tawo o matagan-an niini ang panginahanglan sa mga tawo alang sa moral nga giya. Ang gikutlo dili pa dugay nga artikulo sa Svenska Dagbladet nagpahayag niini nga panglantaw bahin sa kinaugalingon nga relihiyon: “Kon ang ‘tinuohan’ naglangkob sa tanang butang, kini maoy haw-ang. Ug kon ang kagawasan dili gayod himoag utlanan, kini mohuyang.”

Tin-aw nga sa daghang paagi, ang kinaugalingon nga relihiyon napakyas sa pagtagbaw sa espirituwal nga panginahanglan sa mga tawo. Sa pagkatinuod, makadahom ba ang usa ka tawo nga matagan-an ang maong mga panginahanglan pinaagi lang sa pagpilig mga tinuohan gikan sa nagkadaiyang mga tradisyon, nga mora bag nagpili sa kinalamiang mga potahe diha sa lamesa nga dunay lainlaing matang sa mga pagkaon? Tin-aw usab nga ang organisadong relihiyon napakyas sa pagtagana sa maong mga panginahanglan. Nan, asa man kita modangop?

[Footnote]

[Hulagway sa panid 8, 9]

Angay ba natong isipon ang relihiyon nga samag lamesa nga dunay lainlaing matang sa mga pagkaon, nga nagkuha ug nagpili sa mga tinuohan nga atong maangayan?