Magpatalinghog ug Magkat-on

“OTSENTAY-singko porsiyento sa kahibalo nga atong makat-onan atong mabatonan pinaagi sa pagpatalinghog,” matod pa sa usa ka taho sa mantalaang Toronto Star. Bisan tuod kita mogugol ug dakong bahin sa atong panahon sa pagpatalinghog, kita malinga o maghunahuna sa ubang mga butang o kita malimot sa 75 porsiyento sa atong madunggan. Kining makapaalinggat nga estadistika nagpasiugda sa panginahanglan sa pag-ugmad sa atong katakos sa pagpatalinghog.

“Ang dili-maayo nga mga katakos sa pagpatalinghog mao ang gamot sa daghang suliran sa katilingban,” matod sa taho. Si Rebecca Shafir, usa ka speech pathologist ug eksperto sa komunikasyon, nagtuo nga kini maoy sagad nga hinungdan sa mga paghikog, kapintasan sa eskuylahan, pagkabungkag sa pamilya, ug pag-abuso sa droga.

Ang mga social scientist (mga batid sa pagtuon bahin sa paglihok sa tawhanong katilingban) nakapaniid nga ang mga tawo dunay lainlaing mga estilo sa pagpatalinghog. Ang uban interesadong magpatalinghog bahin sa ubang mga tawo ug gustong maminaw bahin sa tanang detalye sa sugilanon. Ang uban maoy tigpatalinghog nga gustog aksiyon ug buot nila nga ang nagsulti moderetso sa punto. “Busa, sa kabildohay tali sa tigpatalinghog nga interesadong mamati bahin sa ubang mga tawo ug sa tigpatalinghog nga gustog-aksiyon, may posibilidad nga dili sila magkasinabot,” matod pa sa Star.

Dunay maayong katarongan nga si Jesus nagpasiugda sa panginahanglan ‘sa pagtagad kon giunsa nimo pagpatalinghog.’ (Lucas 8:18) Ang maayong pagpatalinghog maoy pagpakitag maayong pamatasan. Kini maoy usa ka hinungdanong bahin sa epektibong kabildohay. Apil sa mapuslanong mga sugyot kon unsaon pagpatalinghog panahon sa kabildohay mao ang dili pagtagad sa mga butang nga makalinga, medyo mopaduol, ug paghatag ug aktibong sanong pinaagi sa pagtan-aw mismo sa mga mata sa kaestorya ug pagyango. Tungod kay ang dakong bahin sa atong pagkat-on nag-agad sa atong epektibong pagpatalinghog, ang pagpaminaw pag-ayo maoy usa ka butang nga kinahanglan padayong paningkamotan natong tanan.