Ang Daghang Buluhaton sa mga Inahan

4:50 s.b. Si Alex, ang masuso, nga naghilak ug katulogon pa, mikatkat sa kilid sa katre ni Helen, nga iyang inahan. Ang duha pa ka bata​—si Penny (5) ug si Joanna (12)​—ug ang bana, si Nick, nangatulog pa. Gisakwat ni Helen si Alex ug gibutang sa katre ug nagpasuso kaniya. Wala na makabalik ug katulog si Helen.

5:45 s.b. Si Helen nagkinto paglakaw paingon sa kosina, nagtimpla ug kape, ug nagbasa.

6:15–​7:20 s.b. Si Nick mibangon. Gipukaw ni Helen si Penny ug Joanna, dayon naghikay siya ug pamahaw, ug namuhatbuhat sa balay. Pagka-alas 7:​15, migikan si Nick paingon sa trabahoan ug gihatod niya si Joanna sa eskuylahan. Ang inahan ni Helen miabot aron sa pag-atiman kang Alex.

7:30 s.b. Gihatod ni Helen si Penny sa iyang tunghaan sa kindergarten. Ang pagbiyahe paingon sa trabahoan naghatag kang Helen ug panahon sa paghunahuna bahin sa katinuoran sa pagkainahan. “Mao kini ang kinalisorang trabaho nga akong nahuptan sukad,” siya miingon.

8:10 s.b. Si Helen nag-atubang sa lamesa nga nagtipun-og sa trabahoon. Nabalaka siya nga kon momabdos siya pag-usab mahimong mawad-an siyag trabaho. Ang pamilya nagkinahanglan ug ekstrang kita.

10:43 s.b. Human ibutang ni Helen ang awditibo sa telepono​—usa ka tawag bahin sa iyang mga anak​—ang iyang kauban sa trabaho nga si Nancy nag-alam-alam kaniya: “Maayo kaayo ang imong pag-atiman kanila.” Nanaligdig ang mga luha sa aping ni Helen.

12:05 s.h. Si Helen nagdalidali pagkaon ug sanwits ug gipalandong ang panahon sa wala pa matawo ang iyang unang anak nga babaye. Niadtong panahona may mga proyekto siya nga giplano sa panahon nga wala siyay buhaton. ‘Pagkadili-makataronganon sa maong mga panahom!’ siya mihinapos.

3:10 s.h. Human sa pipila ka tawag sa telepono gikan sa balay bahin sa makalingawng gibuhat ni Alex, gihisgotan ni Helen ang linaing bugkos nga iyang gibati alang sa iyang mga anak: “Wala nako batia kini alang sa laing tawo.” Kining maong giladmon sa pagbati nakatabang kaniya sa pagbuntog sa wala damhang mga kalisdanan sa sinugdan.

5:10 s.h. Human hapita si Joanna, si Helen may giatiman pa nga pipila ka mga butang. Gitawgan niya si Nick ug gipahinumdoman niya siya nga iyang turno ang paghapit kang Penny.

6:00–​7:30 s.g. Didto sa balay gipulihan ni Helen ang iyang inahan sa pag-atiman kang Alex, dayon namuhatbuhat siya sa balay ug naghikay ug panihapon. Sa gipangutana bahin sa mga kinahanglanon kaayo sa usa ka masuso, si Helen nanghupaw: “Ang usa ka masuso nagkinahanglan gayod sa katibuk-an sa iyang inahan: sa iyang mga bukton, lawas, ug gatas ug maoy hinungdan nga magpulaw ang inahan.”

 8:30–​10:00 s.g. Gitabangan ni Helen si Joanna sa iyang homwork ug gipasuso niya si Alex. Samtang gibasahan ni Nick si Penny sulod sa tunga sa oras, namuhatbuhat pa si Helen sa balay.

11:15 s.g. Sa dihang nangatulog na si Penny ug Joanna, si Alex nagmata pa gihapon samtang gikugos sa iyang inahan, apan sa kataposan nakatulog ra siya. “Ibutang na nako si Alex sa iyang higdaanan,” giingnan ni Helen si Nick, kinsa medyo nakatulog na.