Gikan sa Among mga Magbabasa

Kadagatan Karon akong nabasa ang seryeng “Ang Kadagatan Nagpadayag sa Kinahiladmang mga Tinagoan Niini.” (Nobyembre 22, 2000) Mahigugmaon ako ug kinaiyahan, apan wala akoy alamag sa kahiladman sa kadagatan. Sa pagkatinuod, kon mas daghan ang imong mahibaloan bahin sa yuta ug sa katingalahan niini, angay nga modako unta ang imong pagtahod niining dinamikong planeta ug sa maalamon kaayo nga Maglalalang niini.

C. F., Italya

Salamat kaayo niining makalingaw nga serye. Natingala gayod ako kon nganong si Jehova naglalang ug ingon niini nga matang sa organismo sama sa tube worm, samtang wala man mahibalo ang kadaghanan sa mga tawo nga naglungtad diay kining maong mga linalang. Nagustohan nako ang punto nga ang paglungtad niining mga linalanga nagpakita sa kaikag ni Jehova alang sa kahinlo sa yuta​—kaikag nga angay natong sundogon.

H. S., Britanya

Ang pagbasa niining seryeha maoy sama sa paghimog aktuwal nga pagbisita diha sa salog sa dagat ug nagtan-aw sa mga kahibulongan sa kinahiladman samtang sa samang higayon nakadawat ug detalyado ug kasaligang katin-awan. Ang paagi sa inyong pag-asoy nakatabang kanako sa pagkabaton ug mas tin-awng pagsabot sa mga hiyas sa Diyos nga makita diha sa mga butang nga iyang gilalang.

J.M.M., Zambia

Usa kini sa labing makalingawng serye nga akong nabasa sa Pagmata! Gipadayag niini ang dugang pamatuod nga usa ka makinaadmanong Persona lamang ang arang makalalang sa atong planeta uban sa tanang detalye niini. Ang mga artikulo nga sama niini magpalig-on sa atong tinguha sa pag-alagad sa atong Dakong Maglalalang.

S. G., Brazil

Walay mga Amahan Ang akong amahan mibiya sa balay sa dihang sayis anyos pa lang ako. Ako karon 20 na, ug wala ko na siya igkita sukad nga siya mibiya. Nagtuo gayod ako nga ang iyang pagbiya maoy akong sayop ug nga siya wala mahigugma kanako. Ang artikulong “Mga Batan-on Nangutana . . . Nganong Mibiya si Papa Kanamo?” (Nobyembre 22, 2000) mitubag sa tin-aw kaayo nga paagi sa tanang pangutana. Salamat sa pagsabot sa mga pagbati sa mga kabataan nga walay mga amahan.

K. M., Hapon

Kapin sa duha ka tuig kanhi, ang akong bana ug ako nagdiborsiyo. Gihimo ko ang tanan kong maarangan aron isulti sa akong anak nga lalaki ang iyang gibati kanako mahitungod sa pagkabungkag sa pamilya, apan walay bisan usa ang milampos. Karon sa unang higayon, ang akong anak miadmitir nga naapektohan siya sa nahitabong diborsiyo. Dako kaayo kadto nga kauswagan. Sa inanay, siya dili na magpanuko sa pagpakigsulti kanako. Mapasalamaton kaayo ako sa mga tabang nga inyong gitagana alang sa mga batan-on sa tanan nilang mga kasakitan.

D. H., Tinipong Bansa

Gawas sa usa ka mubong pahayag, ang artikulo nag-ingon nga ang mga amahan mibiya sa balay tungod sa ilang daotang buhat. Apan, morag nagkadaghan ang mga asawa nga mingbiya sa ilang mga bana. Tapos sa 18 ka tuig nga kaminyoon, ang akong asawa nagsugod sa pagkinabuhi nga mahilayon. Gipalayas ako mismo sa akong kaugalingong balay. Gibati ko nga kinahanglan kong hisgotan kining bahina sa problema.

. G., Tinipong Bansa

Sama sa imong giingon, moadmitir kami nga ang pipila ka amahan mibiya sa balay tungod sa daotang buhat sa ilang asawa. Ang kadaghanan sa mga prinsipyo nga gihisgotan sa maong artikulo ikapadapat usab sa samang kahimtang.​—ED.

Anestesya Diha sa artikulong “Gikan sa Tumang Kasakit Ngadto sa Anestesya” (Nobyembre 22, 2000), nag-ingon kamo nga walay anestesya una pa ang katuigang 1840. Malamposong gihimo ang mga operasyon sa Hapon ni Seishu Hanaoka dugay na sa wala pa ang katuigang 1840.

S. A., Hapon

Sa katibuk-an, ang kalibotan sa medisina wala pa mosagop sa paggamit ug anestesya una pa sa katuigang 1840. Apan, ang “Kodansha Encyclopedia of Japan” nag-ingon nga si Seishu Hanaoka (1760-1835) naghimo ug substansiya nga anestesya nga gitawag ug “mafutsusan” pinaagi sa pagsagol sa “unom ka tanom nga may medisinal nga kinaiyahan.” Siya “nagmalamposon sa paggamit niini diha sa usa ka operasyon sa kanser sa suso sa 1805, mga 40 ka tuig ayha pa unang gigamit ang ether sa Massachusetts General Hospital, sa Boston.” Si Seishu sa kapulihay migamit sa iyang anestesya sa ubay-ubayng mga operasyon.​—ED.