Ang “Bulawan” sa Amihanan

TINAMPO SA MAGSUSULAT SA PAGMATA! SA POLANDIA

SUKAD sa karaang kapanahonan, ang amber gitawag nga bulawan sa Amihanan. Giisip kini ingong manggad sa karaang Roma. Sa pagkatinuod, gikataho nga si Emperador Nero nagpadala ug usa ka tawong dungganon aron mamalit ug amber gikan sa Polandia. Unsay nadawat sa mga magpapatigayon ug amber agig baylo? Mga sensilyong bulawan ug plata uban sa mga galamiton sa adlaw-adlaw. Gipaila nga ang ruta sa patigayon sa amber nakatabang sa pagpakaylap sa Kristiyanidad ngadto sa Polandia sa sayong mga siglo sa Komong Panahon.

Gituohan sa pipila nga ang amber adunay madyikanhong mga gahom. Busa, kini gigamit ingong mga habak​—nga gituohang magdalag suwerte, magpanalipod sa usa gikan sa kaalaotan, ug mag-abag sa pagpangayam ug pagpakiggubat. Gigamit usab ang amber diha sa pagsimba sa mga patay. Ang lagpad nga mga platoplato, gagmayng mga ulo sa atsa, ug mga pigurin nga ginama sa amber gigamit sa mga kulto nga nagsimba sa adlaw, katigulangan, ug pertilidad.

Dugang pa, ang amber nagdula ug hinungdanong papel sa tradisyonal nga pagpanambal. Gituohan nga ang gikulentas nga mga lobitos nga amber magdalag kahupayan sa sakit sa ulo, liog, ug tutonlan, samtang ang mga pulseras nga amber makaayo sa mga nag-antos sa rayuma. Gigamit usab ang lainlaing mga krema, mga haplas, mga mikskla, ug mga hinumolan sa amber nga gisambog sa alkohol. Bisan karon, gituohan sa pipila nga ang amber adunay makaayong mga hiyas.

Ang amber sa pagkatinuod naghatag ug pasidungog sa Maglalalang sa tanang butang, si Jehova nga Diyos. Uban sa maayong katarongan, ang salmista gidasig sa pagpahayag: “Pagkadaghan sa imong mga buhat, Oh Jehova! Sa kaalam gibuhat mo silang tanan. Ang yuta napuno sa imong mga binuhat.”​—Salmo 104:24.

[Picture Credit Line sa panid 31]

Tanang larawan: Dziȩki uprzejmości DEJWIS COMPANY; Gdańsk-Polska