Nagkinahanglan Ka ba ug Seguro?

SA PIPILA ka kayutaan dunay mga matang sa seguro nga pinugos. Sa uban, ang kadaghanang matang halos wala mahibaloi. Dugang pa, ang kantidad sa seguro ug ang matang sa makobrehan niana nagkadaiya kaayo sa lainlaing mga nasod. Apan ang sukaranang prinsipyo sa seguro​—pag-ambitay sa risgo​—mao gihapon.

Siyempre, kon mas daghag propiedad ang usa ka tawo, mas dako ang mapildi kaniya. Sa susama, kon ang usa ka tawo mas daghag responsibilidad sa pamilya, mas dako ang epekto kon siya mamatay o mabaldado. Ang pagbaton ug seguro makapamenos sa kabalaka sa usa bahin sa posibilidad nga makaagom sa kapildihan sa propiedad o sa makapabaldado nga aksidente.

Apan, maalamon ba nga mogasto ug salapi alang sa seguro bisan pag dili ka gayod makaagom sa kapildihan? Aw, ang pagbaton ba ug reserbang ligid diha sa sakyanan usa ka usik nga puhonan, bisan pag dili ka gayod mahiyosan ug ligid? Tungod sa kasegurohan nga 7bation sa drayber sa maong sakyanan, mahimong dili na igsapayan ang nagasto alang sa reserbang ligid. Bisan tuod ang ibayad kanimo sa seguro dili paigo alang sa pipila ka kapildihan, mabayran niini ang ubang mga kapildihan.

Unsang mga matanga sa kapildihan ang makobrehan sa mga polisa sa seguro?

Mga Matang sa Seguro

Kadaghanan sa seguro nga gikuha sa mga tawo mahilakip sa mga kategoriya nga seguro sa propiedad,  bayranan (liability), panglawas, pagkabaldado, ug kinabuhi.

Seguro sa propiedad: Ang pagbaton ug seguro batok sa pagkapildi sa propiedad​—balay, negosyo, sakyanan, o ubang mga kabtangan​—nalakip sa labing komon nga mga matang sa pagdumala sa risgo. Mao kini ang seguro nga nadesisyonan ni John, nga gihisgotan sa nag-unang artikulo, nga dili paliton alang sa iyang pandayan ug sa iyang mga galamiton.

Ang ubang mga polisa sa seguro sa balay naglakip usab sa pipila ka butang diha sa sulod sa balay. Kon mopalit ka niining matanga sa seguro, maalamon nga mohimog imbentaryo sa imong mga kabtangan nga dunay seguro, kon posible lakipan ug mga letrato o usa ka videotape. Kining maong imbentaryo duyog sa bisan unsang mga pagtasal o mga resibo sa pagpalit sa maong mga butang kinahanglang tipigan diha sa usa ka hilwas nga dapit nga gawas sa imong balay. Ang paghupot niini nga mga rekord mas magpasayon pag-ayo sa pagtino kon unsa ka dako ang kadaot ug pilay angayng ibayad sa kompaniya sa seguro.

Seguro sa bayranan: Si bisan kinsa nga nagdrayb ug sakyanan, nanag-iya ug balay o ubang kabtangan, nagdumala ug negosyo, o nagpatrabaho sa uban obligadong mobayad sa mga galastohan sa usa ka aksidente. Ug kanang maong aksidente mahimong moresulta sa pagkadaot sa propiedad o sa pagkabaldado o pagkamatay sa laing tawo. Ang drayber sa sakyanan o ang tag-iya sa propiedad o sa usa ka negosyo mahimong obligadong mobayad sa pagpaayo sa propiedad o sa medikal nga pagtambal o bisan sa kasakit ug pag-antos sa lain. Sa daghang nasod ang mga amo ug mga drayber gibaoran nga magbaton ug seguro sa bayranan aron makatabang sa pagbayad niining maong mga galastohan. Bisan sa mga dapit diin ang seguro dili usa ka legal nga kinahanglanon, ang drayber, tag-iya sa propiedad, o amo mahimong maoy moabaga sa legal o moral nga paagi sa pagtabang sa mga biktima sa aksidente o sa ilang mga pamilya.

Seguro sa panglawas: Daghang nasod ang dunay usa ka matang sa gipasiugda-sa-estado nga seguro nga nagtaganag mga benepisyo sama sa mga pensiyon alang sa mga tigulang ug medikal nga pag-atiman. Apan, bisan sa mga dapit diin mao kini ang kahimtang, ang maong seguro mahimong mobayad lamang ug usa ka bahin o sa pipila lamang ka medikal nga galastohan. Busa, ang ubang mga tawo mokuhag dugang pribado nga seguro aron matabangan sila sa pagbayad sa nahibiling bayranan. Sa daghang dapit ang mga trabahante mahimong makadawat ug seguro sa panglawas ingong kondisyon sa ilang trabaho.

Ang ubang mga health-care plan, lakip na sa mga managed care arrangement ug mga health maintenance organization (mga HMO), nagtagana ug malukpanong medikal nga pag-atiman puli sa usa ka tinong binulan o tinuig nga bayranan. Kining mga organisasyona naningkamot sa pagpamenos sa galastohan pinaagi sa pagtagana ug dili kaayo mahal nga medikal nga pag-atiman ug pinaagi sa pagpasiugda sa mga paagi nga malikayan ang sakit. Apan, sa HMO, ang mga doktor o pagtambal nga kapilian sa mga pasyente mas limitado tingali kay sa naandan nang mga matang sa seguro sa panglawas.

Seguro sa pagkabaldado ug seguro sa kinabuhi: Ang seguro sa pagkabaldado magtagana ug diyutayng kinitaan kon ang usa ka tawo nakaagom sa kadaot ug dili makatrabaho. Ang seguro sa kinabuhi magtagana ug hinabang nga salapi sa mga sakop sa pamilya nga nagsalig sa usa ka tawo kon siya mamatay. Ang maong seguro nakapaarang sa daghang pamilya sa pagbayad sa wala-mabayring mga utang ug pagpadayon sa ilang rutina sa kinabuhi human sa kadaot nga nahitabo o sa kamatayon sa ilang pangunang tigbuhi.

 Pagpangitag Kasaligang mga Tigbaligyag Seguro

Ang seguro gipasukad sa ideya sa pagbayad ug salapi karon alang sa pinansiyal nga proteksiyon sa umaabot, busa dili ikatingala nga ang industriya sa seguro makapadugok sa daghang limbongan. Tinuod kini diha sa ugmad maingon man sa nagakaugmad nga mga ekonomiya. Busa, ang usa maalamong magbantay sa gitawag-konohay ug gamayg-bayranan nga seguro ug magmaalisto sa bisan unsang kuwestiyonable nga plano sa seguro. Daghan kaayong malaomon nga mga tawong mikuhag seguro ang wala hinuoy nadawat sa dihang ang maong mga kompaniya wala mobayad sa ilang mga polisa​—o kalit lang nawala.

Busa, sama sa bisan unsang hinungdanong butang nga paliton, maalamon ang pagtanditandi sa lainlaing kompaniya sa seguro, ug sagad makadaginot ka ug salapi. Pananglitan, ang ubang mga kompaniya motanyag ug mas ubos nga bayranan sa seguro sa panglawas ngadto sa mga tawong dili manigarilyo ug sa seguro sa sakyanan ngadto sa mga tawong nakapasar sa mga kurso nga mag-edukar sa mga drayber. Apan sa unsang paagi ang nagplanong mokuhag seguro makakaplag ug kasaligang seguro?

Ang unang lakang mao ang pagsusi kon unsay nasinati sa uban sa lainlaing mga kompaniya sa seguro ug sa mga ahente. Ang mga higala ug mga silingan nahibalo tingali sa dungog sa usa ka kompaniya maylabot sa kalidad sa ilang mga serbisyo o sa dungog sa usa ka ahente maylabot sa pagkakasaligan ug personal nga kahangawa. Maayo usab nga magmaalisto bahin sa mga balita nga nagpakita kon unsang mga kompaniyaha sa seguro ang duna tingaliy mga problema.

Dugang pa, ang rekord ug pinansiyal nga kahimtang sa usa ka kompaniya mahimong susihon pinaagi sa pagkonsulta sa mga giya sa pagklaseklase sa mga seguro diha sa librarya o sa baligyaanag libro o sa Internet. Makatagana kinig mga tubag sa mga pangutana sama sa: Ang kompaniya ba dunay igong salapi? Malamposon ba kini sa maong negosyo sulod sa daghang tuig? Ilado ba kini sa pag-atiman sa mga kleym dihadiha ug sa malinawon nga paagi?

Apan, ang mga giya sa pagklaseklase sa seguro dili angayng isipon nga dili na masayop. Ang usa ka dugay nang natukod, multibilyong-dolyar nga kompaniya sa seguro kinahanglang ilogon sa gobyerno usa lamang ka semana human kini gipahayag nga kinamaayohan diha sa usa ka nabantog kaayong basahon!

Ang Papel sa mga Ahente sa Seguro

Ang ahente sa seguro kasagarang komitido sa usa lang ka kompaniya sa seguro. Ang usa ka broker, o independenteng ahente, mahimong mokonsulta sa lainlaing mga kompaniya aron mahibaloan kon unsa ang kinamaayohang seguro nga mabatonan alang sa usa ka tinong kantidad. Ang duha kinahanglang dunay maayong relasyon uban sa mga kliyente aron magpadayon ang ilang negosyo. Kon kasaligan ug may kahangawa ang ahente sa seguro, dako siyag ikatabang sa iyang mga kliyente.

Una, ang usa ka maayong ahente o broker makatabang sa usa ka kliyente sa pagpili ug haom nga seguro gikan sa morag walay-kataposang listahan sa mga kapilian nga seguro. Isaysay usab niya ang mga detalye sa polisa ngadto sa iyang kliyente. Sumala sa nahibaloan pag-ayo sa daghan, ang mga polisa sa seguro gibantog nga komplikado kaayo. Ang presidente sa usa ka kompaniya sa seguro miangkon nga dunay mga bahin sa polisa sa seguro alang sa iyang balay nga wala niya masabti!

Ang pagpatin-aw nga himoon sa usa ka ahente makatabang sa kliyente nga malikayan ang dili maayo ug wala damha nga mga kahimtang. Pananglitan, kadaghanang mga polisa sa seguro sa propiedad ug panglawas dunay deductible. Kini maoy tinong kantidad nga kinahanglang bayran sa tawo nga mikuhag seguro​—pananglitan, bayranan sa pag-ayo sa sakyanan o bayranan sa ospital​—una pa mobayad ang kompaniya sa seguro sa bahin niini sa usa ka kleym. Ang ahente mahimong mangatubang usab sa kompaniya sa seguro kon maglisod ang kliyente sa pagkuha sa bayad gikan sa kompaniya.

Seguro ug ang mga Kristohanon

Nagkinahanglan ba ug seguro ang usa ka Kristohanon nga nagsalig sa tabang sa Diyos ug nagpaabot sa kataposan sa sistema sa mga butang? Balik sa tuig 1910, dihay nangutana niini kang Charles Taze Russell, editor sa magasin nga nailhan karon nga Ang Bantayanang Torre, ang kaubang magasin sa Pagmata! Giila ni Russell nga gitagna sa Bibliya ang kataposan sa presenteng sistema sa ekonomiya, nga midugang nga siya mismo wala mokuha ug seguro sa kinabuhi.

“Bisan pa niana dili managsamag kahimtang ang tanan,” matod pa ni Russell. “Ang usa ka amahan nga dunay asawa ug mga anak nga nagsalig kaniya​—kon ang naulahi linghod pa ug panuigon ug dili makapanginabuhi nga sila ra​—dunay responsibilidad  ngadto kanila.” (1 Timoteo 5:8) Ang usa ka tawo mogahin tingali ug salapi aron matagan-an ang panginahanglan sa iyang pamilya, matod ni Russell. “Apan kon dili niya mahimo kini, mahimong matuman niya ang iyang katungdanan ngadto kanila pinaagi sa seguro sa kinabuhi.”

Ang usa nga maoy responsable sa usa ka pamilya mahimong magtagana usab ug seguro para sa panglawas, pagkabaldado, ug uban pang matang sa seguro alang sa mga membro niini. Daghang dili-minyong mga tawo ang dunay seguro aron dali rang makabaton sa gikinahanglang mga serbisyo ug usab aron malikayan nila nga magkautang-utang engkasong maaksidente o masakit.

Ang pagkamatinud-anon hinungdanon maylabot sa seguro. Ang usa ka tinuod nga Kristohanon tinong dili gayod manglimbong sa usa ka kompaniya sa seguro, kaha sa dihang magpil-ap ug aplikasyon para sa seguro o sa dihang magkleym sa bayad. (Hebreohanon 13:18) Hinumdoman niya nga ang katuyoan sa seguro mao ang pagbayad sa kapildihan. Dili kini tiket sa loteriya​—usa ka tsansa nga magkinabuhing maluho.​—1 Corinto 6:10.

Ang mga Kristohanon motuman sa tanang balaod nga naglangkit sa mga kinahanglanon sama sa pagkuhag seguro. Diin ang balaod nag-ingon nga sila kinahanglang dunay haom nga seguro aron sa pagdumala sa negosyo o pagdrayb ug sakyanan, sila motuman. (Roma 13:​5-7) Sa pagpakita ug pagkamatinud-anon ug praktikal nga kaalam gikinahanglan usab ang kanunayng pagbayad sa mga bayranan sa seguro. Kon dili mabayran ang mga bayranan, mahimong kanselahon sa kompaniya ang polisa ug dili bayran ang mga kleym. Maalamong tinoon matag karon ug unya kon narekord ba ang imong pagbayad pinaagi sa direktang pagsusi diha sa kompaniya ug sa pagtipig ug sinulat nga pamatuod sa imong pagbayad, sama sa gikanselar nga mga tseke.

Mabatonan man o dili ang seguro diha sa imong gipuy-an, dunay sukaranang mga pasidaan nga makatabang kanimo sa paglikay sa kapildihan ug sa ingon ikaw ug ang imong mga minahal dili makaagom sa kaguol nga dili arang mapapas sa kleym sa seguro. Ang sunod natong konsiderahon mao ang pipila niini nga mga pasidaan.

[Hulagway sa panid 7]

Ang usa ka kasaligang ahente makatabang kanimo sa paghimog mga desisyon bahin sa seguro

[Hulagway sa panid 7]

Daghan ang dunay seguro, gibaod man kini o wala