Sa Kataposan Masulbad Na!

HANDURAWA ang usa ka kalibotan diin ang matag bata tinuod gayong gitinguha, gihigugma, ug gipanalanginan sa matinagdanon, mahigugmaong mga ginikanan nga may sinserong tinguha sa pagtaganag labing maayong giya ug pagtultol nga posible alang sa ilang anak. Handurawa ang usa ka kalibotan diin ang matag bata may maayong panglawas ug panghunahuna, diin wala nay makitang kabataan sa kadalanan, ug diin ang kabataan makatagamtam na sa ilang panahon sa pagkabata kay dili na manarbaho tungod sa kakabos!

Tilinguhaon ba? Siyempre. Katuohan ba? Ang mga Saksi ni Jehova nagtuo, ug tungod kini sa duha ka katarongan.

Ang mga Ginikanan Makasulbad ug Diyutay

Sa walay duhaduha ikaw mouyon nga ang mga hamtong adunay gahom sa pagsulbad​—usahay bisan sa pagpugong​—sa pipila ka problema sa kabataan. Siyempre, kini gitagana aron sila, ang mga  hamtong, makabuhat niana. Oo, ang mga ginikanan mismo ang usa sa mga sulbad sa problema.

Pananglitan, ang mga hamtong nga makahimo sa pagsunod sa tambag sa Bibliya nga ang “usa ka asawa dili magbiya sa iyang bana . . . ug ang usa ka bana dili magbiya sa iyang asawa” dili makabaton ug mga anak nga mag-antos tungod sa pagkinabuhi diha sa usa ka panimalay nga nabungkag gumikan sa panagbulag o diborsiyo.​—1 Corinto 7:​10, 11.

Ang mga hamtong nga andam mosunod sa tambag sa Bibliya nga “maglakaw nga may kahapsay, dili sa hudyaka ug paghuboghubog,” dili makabaton ug kabataan nga mag-antos sa kasakit gumikan sa pagbaton ug palahubog o giyanon sa droga nga mga ginikanan.​—Roma 13:​13; Efeso 5:18.

Ang mga hamtong nga andam mosunod sa tambag sa Bibliya nga ‘ayran ang pakighilawas’ makatabang sa pagkunhod sa risgo nga ang ilang mga anak managko nga wala tinguhaa, nga lagmit diha sa usay-ginikanan nga pamilya.​—1 Tesalonica 4:​3; Mateo 19:9.

Ang mga hamtong nga andam mosunod sa tambag sa Bibliya, ‘Ayaw palagota ang inyong mga anak, aron sila dili masubo,’ ug kinsa ‘nahigugma sa ilang mga anak’ dili makabatog mga anak nga makasinatig pisikal o mental nga kasakit sa pag-abuso sa bisan unsang dagway niini.​—Colosas 3:​21; Tito 2:4.

Sa pagsumaryo, kon ang tanang hamtong andam nga mosunod sa tambag sa Bibliya nga gihatag ni Jesus, “Busa, ang tanang butang nga buot ninyo nga buhaton sa mga tawo nganha kaninyo, kamo usab kinahanglang magbuhat sa ingon ngadto kanila,” duna pa kahay milyonmilyong wala-tinguhaa ug wala-higugmaa nga kabataan?​—Mateo 7:12.

Ikalipay, daghang hamtong ang andam mobuhat sa tanang gihisgotan sa ibabaw. Apan, ikasubo, dili tanan andam mobuhat niana, ug busa anaa diha ang problema. Ug bisan kadtong andam mobuhat makakaplag nga ang ilang mga paningkamot sagad nga dili molampos gumikan sa tawhanong pagkadi-hingpit ug sa mga butang nga dili nila makontrolar. Ang mga tawo makasulbad ug diyutay sa mga problema sa kabataan, apan sila tataw nga dili makataganag bug-os nga sulbad.

Usa ka Diyosnong Kagamhanan nga Motaganag Bug-os nga Sulbad

Ang magsusulat nga si John Ruskin, nga gihisgotan sa nag-unang artikulo, nagtuo gayod nga “ang unang katungdanan sa Estado mao ang pagtino nga ang matag bata nga matawo diha niana katagan-ag maayong puy-anan, panapot, pagkaon, ug edukasyon, hangtod nga sila modangat na sa pangedaron nga makahimog desisyon.” Apan, si Ruskin miadmitir nga “aron kini [makab-ot] ang Kagamhanan kinahanglang adunay awtoridad ibabaw sa katawhan nga sa pagkakaron dili nato mahanduraw.”

Ang kagamhanan lamang nga gipaluyohan sa Diyos ang adunay mabinationg awtoridad nga gihisgotan ni Ruskin. Ug ang ingon nga kagamhanan mao gayod ang gisaad​—ang usa nga gihisgotan ni Jesus sa Mateo 6:​9, 10. Sa dihang kini nga kagamhanan nga iya sa Diyos bug-os nang magdumala sa mga kalihokan sa yuta, kini mogamit sa awtoridad niini ibabaw sa tanang katawhan​—pagtaganag puy-anan, panapot, pagkaon, ug edukasyon sa tanang sakop niini, lakip sa kabataan. (Isaias 65:​17-25) Apan kining hingpit nga kagamhanan mobuhat ug labaw pa.

Ang Gingharian sa Diyos magpasig-uli sa mga tawo ngadto sa kahimtang sa pagkahingpit, nga magpaarang kanila sa pagmatuto sa ilang mga anak diha sa hingpit nga pagkatimbang. (Job 33:​24-​26) Ang mga anak matutuon diha sa espiritu sa kalinaw ug unibersohanong panag-igsoonay, ang mithi nga anaa sa Deklarasyon sa mga Katungod sa Kabataan sa HK. (Salmo 46:​8, 9) Wala na gayod unyay panginahanglan alang sa Internasyonal nga Tuig sa Kabataan o alang sa Kombensiyon sa mga Katungod sa Kabataan.

Ang pagpasig-uli sa hingpit nga panglawas sa mga ginikanan ug sa baldadong mga anak maoy usa ka yanong buluhaton alang kang Kristo Jesus, ang Hari niining langitnong kagamhanan. Ang mga milagro sa pagpang-ayo nga iyang gihimo samtang dinhi siya sa yuta maoy usa ka garantiya. (Lucas 6:​17-​19; Juan 5:​3-9; 9:​1-7) Bisan ang pagbanhaw sa patay nga mga anak ug mga ginikanan mahimo kaayo pinaagi sa iyang gahom!​—Mateo 9:​18-​25.

Pagkadakong kalipay ang pagkahibalo nga ang panahon sa Diyos sa paglihok alang sa kabataan sa yuta haduol na!

 [Kahon/Mga hulagway sa panid 12]

Tabang Alang sa mga Batan-on

Ang mga Saksi ni Jehova interesado kaayo sa pagtabang sa mga batan-on aron malikayan ang mga problema ug sa pagpakita kanila kon unsa ang labing maayong paagi sa pagsagubang sa mga problema nga di-malikayan. Busa latas sa katuigan sila nagpatik ug ubay-ubayng tabang nga gidisenyo aron matagan-an ang mga panginahanglan sa mga batan-on​—gikan sa mga wala pa magtungha ngadto sa mga tin-edyer. Kining mga publikasyona naglakip sa mga basahong Akong Basahon sa mga Estorya sa Bibliya ug Mga Pangutanang Gisukna sa mga Batan-on​—Mga Tubag nga Mosaler maingon man ang video nga nag-ulohang Young People Ask​—How Can I Make Real Friends? Kini mabatonan gikan sa mga Saksi ni Jehova nga nagpuyo sa inyong dapit o pinaagi sa pagsulat ngadto sa mga magpapatik niining magasina.

Kon bahin sa ilang mga anak, ipakita sa mga Saksi ni Jehova nga sila gitinguha ug gihigugma pinaagi sa regular nga pagpakighisgot sa ilang mga problema uban kanila. Ang mga ginikanan sagad mogamit sa maayong materyal nga gipresentar diha sa gihisgotan sa ibabaw nga mga tabang sa pagtuon ingong pasukaranan alang sa usa ka malamboon, regular nga programa sa pagbansay sa batan-on. Basin gusto ka usab nga mosunod sa samang paagi uban sa imong mga anak.