Pagkab-ot sa mga Mithi

INTERNASYONAL nga maayong kabubut-on, panag-igsoonay, kalinaw​—kinsay dili modayeg sa maong hamiling mga mithi? Ang tigpasig-uli sa Olimpiada, si Baron Pierre de Coubertin, nagtuo nga ang mga dula makapukgo sa nasodnong mga panag-indigay pinaagi sa pagpausbaw sa dulot nga pagtahod alang sa mga makig-indig way sapayan sa rasa, relihiyon, lalaki man o babaye. Nagtuo siya nga “ang mas maayong kalibotan motungha lamang pinaagig mas maayong mga indibiduwal.” Apan makapatungha ba gayod ang esports ug kalinaw sa kalibotan? Kon hukman sumala sa miaging rekord niini, motubag gayod kitag dili.

Samtang ang esports adunay ilang luna, ang edukasyon gikan sa Bibliya mao ang yawi sa pagpatunghag tinuod nga kalinaw. Sa pagkatinuod, ang mga prinsipyo sa Bibliya maoy makapatunghag  “mas maayong mga indibiduwal,” sumala sa giingon ni Coubertin. Tagda ang pipila ka kasulatan nga nagpalambo sa kalinaw taliwala sa mga indibiduwal nga nagpadapat niini, way sapayan sa ilang nasyonalidad.

“Pinaagi niini ang tanan makaila nga kamo akong mga tinun-an, kon kamo adunay gugma taliwala kaninyo.”​—Juan 13:35.

“Kon posible, kutob sa nagaagad kaninyo, magmadaiton sa tanang tawo.”​—Roma 12:18.

“Samtang kita may panahong paborable alang niini, buhaton nato ang maayo ngadto sa tanan.”​—Galacia 6:10.

“Dili magabuhat ug unsa man tungod sa pagkamatigion o tungod sa pagpakaimportante sa kaugalingon, hinuon uban sa pagpaubos sa hunahuna magaisip nga ang uban labaw kay kaninyo.”​—Filipos 2:3.

“Ang lawasnong pagbansay mapuslanon ug diyutay; apan ang diyosnong pagkamahinalaron mapuslanon sa tanang butang, kay nagahupot kini ug saad sa kinabuhi karon ug nianang sa umaabot.”​—1 Timoteo 4:8.

Mosaler ba gayod ang mga mithi nga gipakita niining mga kasulatana? Tagda ang nahitabo sa Munich, Alemanya. Sa 1974, duha ka tuig lamang human ang mga Dula sa Olimpiada nga gihimo nianang siyudara namansahan sa terorismo ug pagbuno, ang mga Saksi ni Jehova naghimog internasyonal nga kombensiyon sa Olympic Stadium. Duyog sa mitambong, lakip sa uban pa, mao ang mga grupong taga-Gresya ug Turkey​—mga nasod nga naggubatay sa usag usa. Sa pagkatinuod, niana nga ting-init mismo, ang Grego ug Turkong mga sundalo nalambigit sa gubat kon kinsay makapanag-iya sa isla sa Cipro. Nakaapektar ba kadto sa mga Kristohanon nga mitambong niadtong kombensiyona? Wala! Pagkamakapatandog gayod ang pagsud-ong sa mga Grego ug mga Turko nga naggaksanay ug nagtawganay sa usag usa nga igsoon!

Ang mga Saksi ni Jehova nailhan sa tibuok kalibotan nga nakakab-ot sa malinawong mga relasyon nga nagbuntog sa nasodnon, etniko, ug tribonhong mga babag. Siyempre, wala sila moingon nga hingpit na nilang nakab-ot ang mithi sa tibuok kalibotang panaghiusa ug kooperasyon. Sama ni bisan kinsa, kinahanglan silang maningkamot sa pagsunod sa tambag sa Kristohanong apostol nga si Pablo: “Hukasa ang daang pagkatawo uban ang mga buhat niini, ug isul-ob ang bag-o nga pagkatawo.” (Colosas 3:​9, 10) Bisan pa niana, sila kusganong nagtuo nga ang pagsunod sa mga prinsipyo sa Bibliya makatabang sa mga tawo sa ‘pagpangita sa pakigdait ug pagpangagpas niini.’​—1 Pedro 3:11.

Ikasubo, ang Olimpiada​—bisan pa sa hamiling mga mithi niini​—nagpatunghag kinangil-arang mga hiyas diha sa daghang tawo. Sa kasukwahi, ang gamhanang Pulong sa Diyos nagpatunghag kinamaayohang mga hiyas diha sa mga tawo, nga nagpalambo sa internasyonal nga maayong kabubut-on ug kalinaw.

[Mga hulagway sa panid 8]

Ang Olimpiada mopausbaw ug panag-indigay

[Credit Line]

Aus dem Fundus der MÜNCHNER OLYMPIAPARK GMBH, München

[Mga hulagway sa panid 9]

Ang Bibliya mopausbaw ug kalinaw