Tabang Aron Makalingkawas sa Delingkuwensiya

SINULAT SA KORESPONSAL SA PAGMATA! SA PRANSIYA

ANG di pa dugayng mga hitabo tataw nga nagpakitag makapatugaw nga pagkadaot sa balaod ug kahusay diha sa daghang gipasagdang mga dapit sa siyudad sa Pransiya. Sumala sa Pranses nga magasing L’Express, “ang kapintasan sa siyudad miuswag sa halos lima ka pilo sulod sa unom ka tuig.” Dugang pa, ang gidaghanon sa mga menor de edad nga nalangkit sa mapintas nga krimen mitaas pag-ayo.

Dugang pa sa pagkalangkit sa bandalismo, pagpamaligyag droga, pagpangilkil, pagpanunog, ug pagpangawat, ang mga delingkuwente direktang nagbiktima sa mga hawas sa Estado. Ang mga polis, bombero, ug mga trabahante sa publikong transportasyon, gawas sa uban pa, kanunayng nabiktima sa mapintas nga pagpangatake.

Nganong kaylap kaayo ang kapintasan? “Gumikan sa pagkahugno sa pamilya, ang kapintasan maoy pagpakigbatok sa tanang gihawasan sa awtoridad,” saysay pa sa duha ka sosyologo. Gihisgotan usab nila “ang pagbati [sa mga batan-on] nga gipasagdan sila sa mga awtoridad” ug ang ‘pagkawalay-paglaom alang sa usa ka makahuloganong umaabot.’

Ang mga Saksi ni Jehova kanunayng nagsangyaw sa mensahe sa paglaom sa Bibliya diha sa mga dapit diin kaylap ang delingkuwensiya. Diha sa di pa dugayng programa sa Pranses nga telebisyon, usa ka magsusulat miingon: “Ang mga Saksi ni Jehova nagsuotsuot diha sa sikbit nga mga dapit sa siyudad ug sa gipasagdang kasilinganan​—mga dapit nga usahay morag gipasagdan na lang sa sosyal nga mga serbisyo, sa mga polis, ug sa gobyerno. Nianang maong mga tinukod ug kadalanan, sila mosulti ug sila maminaw.” Ang ilang buluhaton adunay positibong resulta, sumala sa gipakita sa mosunod nga sulat gikan sa usa ka batan-ong magbabasa sa Pagmata!

“Buot kong pasalamatan kamo sa kinasingkasing tungod sa inyong mga publikasyon. Wala lamang kamo makatabang kanako sa personal kondili napalambo usab ninyo ang akong relasyon uban sa akong mga ginikanan. Nagpangedaron lamang akog 16 anyos ug may Muslim nga kagikan.

“Gusto kong isulti nga kamo milampos sa pagluwas kanako gikan sa delingkuwensiya. Ingong resulta, mas gisunod pa nako ang akong relihiyon, apan gibasa ko usab ang Bibliya. Tungod sa inyong tabang, nakapadayon usab ako sa akong pag-eskuyla. Dugang pa, nakatabang kamog daghang tawo sa akong kasilinganan nga makalingkawas sa delingkuwensiya pinaagi sa inyong mga magasin​—nga akong ipahulam kanila kada bulan. Ako mapasalamaton kaayo kaninyo ug mibatig utang kabubut-on.”