Gikan sa Among mga Magbabasa

“Cystic Fibrosis” Salamat sa artikulong “Pagkinabuhi nga Dunay ‘Cystic Fibrosis.’” (Oktubre 22, 1999) Bisan tuod 17-anyos pa lamang ako ug walay bisan unsang grabeng mga sakit, ang sugilanon ni Jimmy Garatziotis nakatandog pag-ayo kanako. Nakatabang kini kanako sa paghunahuna bahin sa daghang butang, lakip na kon unsa ka hinungdanon ang pagpabili sa imong nabatonan. Bisan pa sa iyang makahasol kaayo nga balatian, si Jimmy nagmalipayon ug padayong naghupot ug lig-ong pagtuo sa mga saad ni Jehova. Ako nag-ampo nga si Jimmy ug Deanne padayong makabaton ug kusog sa pagsagubang sa ilang mga pagsulay.

E. Z., Rusya

Patuotuo Dili ako usa sa mga Saksi ni Jehova, apan ako nagabasa sa inyong mga publikasyon sulod na sa duha ka tuig. Buot ko kamong pasalamatan sa seryeng “Gimbut-an ba sa Kapalaran ang Imong Kinabuhi?” (Agosto 8, 1999) ug “Mga Patuotuo​—Nganong Peligroso Kaayo?” (Oktubre 22, 1999) Kaniadto ako nagtuo sa kapalaran ug matuotuohon gumikan sa pagmatuto kanako. Apan karon ako naghunahuna nga kamo nagsulti sa kamatuoran bahin sa tinuod nga Kristiyanidad.

N. D., Pransiya

Ang mga artikulo bahin sa patuotuo nakapalagot kanako. Usa ako ka debotadong Romano Katoliko, ug usa sa mga artikulo naghisgot sa “pagpangurus” sa mga pasahero ingong usa ka patuotuo. Ang mga Katoliko nagbuhat niana ingong bahin sa ilang pag-ampo alang sa luwas nga pagbiyahe. Mao kini ang lintunganayng prinsipyo sa among pagtuo ug dili gayod maisip nga usa ka patuotuo.

S. W., Tinipong Bansa

Dili ikalimod nga daghan ang mangurus nga wala kaayo maghunahunag relihiyosong debosyon. Sa dihang gisukna kon nganong siya nangurus diha sa dulaanan, usa ka Australianong magdudula ug potbol miadmitir: “Sa akong hunahuna patuotuo lang kini.” Dili ikatingala, kini nga rituwal adunay diwa sa patuotuo sukad pa sa sinugdanan. Ang “The Catholic Encyclopedia” nag-ingon: “Sukad pa gayod sa kakaraanan ang pagpangurus gigamit na diha sa tanang buhat sa pagpapahawa ug mga demonyo ug mga pangyamyam ingong usa ka hinagiban batok sa mga espiritu sa kangitngit.”​—ED.

Droga Buot ko kamong pasalamatan tungod sa seryeng “Gikontrolar ba sa Droga ang Kalibotan?” (Nobyembre 8, 1999) Kay nadala sa bul-og sa impluwensiya sa mga higala, ang akong amahan nagiyan sa droga ug alkoholikong ilimnon. Ang panimalay dili na usa ka dapit nga dalangpanan kondili dapit diin ako kanunayng nameligro. Bisan pa niining tanan, dili gayod ako mohunong sa pag-awhag sa akong mga ginikanan nga tagamtamon ang mga kangaya sa pagsimba sa Diyos.

M. L., Italya

Kas-a sa usa ka semana usa ka polis ang moadto sa akong eskuylahan ug mopakigpulong bahin sa mga butang sama sa droga ug alkoholikong mga ilimnon. Nakahukom ako nga sa sunod higayon nga siya mosulod sa among klase, hatagan nako siya sa mga artikulo bahin sa droga. Nakadayeg kaayo siya niini ug nagbasa ug mga bahin niini ngadto sa klase. Ang tibuok klase nakabatog kaayohan gikan sa mga artikulo!

C. D., Tinipong Bansa

Baldadong Bata Ang estorya ni Rosie Major nga, “Nakakat-on Kami sa Pagsalig sa Diyos Latas sa Kasakitan” (Nobyembre 22, 1999), nakatandog pag-ayo kanako. Kanhi nagpuyo kami sa siyudad, apan wala ako makaangay sa epekto niini sa akong kinamagulangang anak nga babaye. Busa namalhin kami sa banika. Maayo kaayo ang dagan sa tanan hangtod nga nawad-an ako sa akong trabaho nga may suweldong $56,000 kada tuig. Ania kami karon sa banika uban sa tulo ka bata ug may lukatonong prenda. Makapahigwaos gayod kaayo kini nga kahimtang! Apan human mabasa ang estorya ni Rosie Major, ang akong problema sa panginabuhi nahimong daw dili na kaayo dako nga ako naulaw. Dunay daghan pa kaayong tawo nga tinuod gayong nagkinahanglan sa tabang sa Diyos! Mahimo ba akong makadawat ug suskrisyon sa Ang Bantayanang Torre ug Pagmata?

M. F., Tinipong Bansa

Nalipay kami sa pagpadala niining hangyo sa magbabasa.​—ED.