Gikan sa Among mga Magbabasa

Uniberso Buot kong pasalamatan kamo tungod sa mga artikulo nga nagtaganag impormasyon bahin sa atong kahibulongang uniberso, sama sa “Unsay Anaa Saylo sa mga Planeta?” (Hulyo 22, 1999) ug “Ang Pulang Planeta Giduaw Pag-usab.” (Nobyembre 22, 1999) Kini makalingaw gayod ug nagpadako sa among pagpabili sa atong Maglalalang.

M.A.T., Italya

“Glaucoma” Akong nabasa ang inyong balita nga “Pasidaan sa Pagkabuta” diha sa “Pagpaniid sa Kalibotan.” (Nobyembre 22, 1999) Unom ka tuig kanhi ako gidayagnos nga dunay glaucoma. Tingali, sumala sa giingon sa inyong artikulo, daghang tawo nga dunay glaucoma walay gibating kasakit. Apan, ako nag-antos sa grabeng kasakit sa akong mga mata maingon man sa mga labad sa ulo matag karon ug unya bisan pag naggamit ug eye drops matag adlaw. Mahimo kahang ang uban nga mobasa sa artikulo makahinapos nga ang glaucoma kanunayng walay bationg kasakit?

H. M., Hapon

Ang among mubong balita dili usa ka matugkarong panaghisgot niining grabeng balatian. Ang artikulong “Glaucoma​—Malipoton nga Kawatag Panan-aw!” diha sa among Mayo 8, 1988 nga isyu mas mabug-oson, ug kini nag-ila nga ang pipila ka pasyente nakaagom gayod ug kasakit.​—ED.

Ahat nga Bata Buot kong ipahayag ang akong tim-os nga mga pasalamat alang sa artikulong “Nakakat-on Kami sa Pagsalig sa Diyos Latas sa Kasakitan.” (Nobyembre 22, 1999) Bahin kadto sa pamilyang Major ug sa ilang maanyag nga anak babaye nga si JoAnn. Ang autismo sa akong igsoong babaye nadayagnos sa dihang siya nag-edad ug dos anyos. Ang pagsagubang sa balatian sa akong igsoong babaye maoy malisod ug masulayon, apan ang kasinatian sa mga Major nagpalalom sa among pagpabili kon unsa gayod ka hinungdanon ang pagsalig kang Jehova, bisan pa kon unsa tingaliy atong maagoman sa kinabuhi.

M. C., Tinipong Bansa

Ang among anak nga babaye natawo sa 1992, sa samang tuig nga natawhan ni JoAnn. Siya mitimbang ug 24 ka onsa lamang sa pagkatawo! Ang mga doktor misugyot ug pag-abonog dugo. Usa ka doktor miingon pa gani nga madaot ang iyang utok kon dili namo siya paabonohag dugo. Apan kami miampo kang Jehova ug nakabarog nga malig-on. Karon siya nagtungha na ug walay makitang timailhan sa pagkadaot sa utok.

C. H., Hapon

Ako usa ka asawa ug inahan sa tulo ka anak. Tungod kay ang akong bana wala nay trabaho, wala kamiy kita ug wala kamiy insyurans sa panglawas. Apan ang sugilanon ni JoAnn ug sa iyang pamilya nakatabang kanako sa pagsagubang sa kinabuhi sa matag adlaw. (Mateo 6:34) Salamat sa pagpahinumdom kanako sa dili pagsalig sa akong kaugalingon kondili sa pagdangop kang Jehova alang sa kalig-on nga makasagubang.

K. A., Tinipong Bansa

Ika-20ng Siglo Ako nagsulat maylabot sa seryeng “Ang Ika-20ng Siglo​—Makuyaw nga Katuigan sa Kausaban.” (Disyembre 8, 1999) Ako nakadayeg sa tin-awng impormasyon nga inyong gipresentar bahin sa malisod nga mga panahon nga atong nasinati panahon sa ika-20ng siglo. Akong nasabtan usab kon sa unsang paagi ang kapintasan inanayng nagalaglag sa katawhan. Buot kong pahalipayan kamo bahin sa maayo kaayong buhat nga inyong ginahimo.

W. G., Puerto Rico

Mga Abokado Mao pa lamay akong pagkatapos sa artikulong “Ang Abokado​—Tinuod nga Daghag-Gamit nga Prutas!” (Disyembre 22, 1999) Ako gayong gihunahuna nga daghan ang malingaw nianang artikuloha. Nagsugod kog kaon ug abokado sa dihang ako nag-edad ug siyam ka bulan. Sa dihang ako tres anyos na, nakakat-on ako sa paghimog guacamole. Karon ako diyes anyos na. Ug ako naghunahuna bahin sa mga tawo nga dili makakaon ug sibuyas, nga bahin sa resipe nga gisugyot sa inyong artikulo. Busa sa akong resipe alang sa guacamole, akong gigamit ang mga abokado, duga sa lemon, asin, halang nga sarsa, ug tinadtad nga ahos.

N. E., Tinipong Bansa

Salamat sa imong sugyot!​—ED.