Pagtabang sa mga Batan-on sa Paglikay sa “Kultura sa Kamatayon”

Unsay nakaingon sa kaikag sa ulohan bahin sa kamatayon nga makita diha sa mga batan-on karon? Ang representante nga si Henry Hyde, sa estado sa Illinois, T.B.A., miingon: “Dunay espirituwal nga kahaw-ang diha niining mga batan-on nga gitagbaw sa kultura sa kamatayon ug kapintasan.”

USA ka magbabasa sa Time misulat: “Ang tapolan nga mga ginikanan, mapintas nga kalingawan ug kakulang sa moral ug espirituwal nga sukaranan maoy responsable sa kultura sa kamatayon nga naglungtad taliwala sa atong mga batan-on karon.”

Ang kamingaw maoy lain pa sa dagkong mga suliran nga nag-apektar sa mga batan-on. Ang uban nagpuyo sa mga panimalay diin ang duha ka ginikanan nagtrabaho ug wala sa balay sa dakong bahin sa adlaw; ang uban usa ray ginikanan. Sumala sa usa ka tinubdan, ang mga batan-on sa Tinipong Bansa mopalabay ug 3.5 ka oras nga mag-inusara kada adlaw ug nakunhoran ug 11 ka oras ang panahon nga ilang gigugol uban sa ilang mga ginikanan kada semana kay sa gigugol sa mga batan-on sa katuigang 1960. Sa pagkatinuod, ang pipila ka batan-on wala gayod makasinati sa presensiya o sa emosyonal nga pagpaluyo sa ilang mga ginikanan.

Kon Unsay Mahimo sa mga Ginikanan

Tungod sa “espirituwal nga kahaw-ang” nga gisagubang sa mga batan-on, unsa ka hinungdanon ang papel sa mga ginikanan? Ang maalamong mga ginikanan makasabot nga sa usa ka bahin, ang ilang mga anak nagkinahanglan ug maayong kalingawan ug sa laing bahin, sila nagkinahanglan  ug regular personal nga pagpaluyo. Gipalihok sa mahigugmaong interes, ang mga ginikanan makapakig-estorya kanila bahin sa ilang gustong musika, mga programa sa telebisyon, video, nobela, dula sa video, ug salida sa sine. Bisan tuod dili tingali kini isulti sa mga batan-on, daghan kanila ang nangandoy sa pagtagad ug mahigugmaong paggiya sa ilang mga ginikanan. Sila nagkinahanglan ug prangkang mga tubag tungod kay sila nagkinabuhi sa usa ka kalibotan nga puno sa mga kawalay-katinoan. Ang mga hamtong kinahanglang makasabot nga ang ilang mga anak nag-atubang ug labi pa ka komplikadong kalibotan kay sa ilang giatubang sa mga batan-on pa sila.

Ang mga ginikanan nga gustong manalipod sa ilang mga anak makig-estorya kanila nga regular, mamati gayod kanila, ug magpasidaan kanila sa mga kapeligrohan nga nalangkit sa modernong kultura. Sa dihang ang mga ginikanan mohatag ug lig-ong mga limitasyon ug makanunayon ug rasonable maingon man mabination sa ilang mga anak, kasagaran makab-ot nila ang maayong mga sangpotanan.​—Mateo 5:37.

Ang mga ginikanan nga mga Saksi ni Jehova maningkamot nga himoon ang regular nga mga pakighisgot sa ilang mga anak, ginamit ang Bibliya ug pinasukad-sa-Bibliya nga mga publikasyon ug mga video. * Gamiton nila kanang mga okasyona, dili sa pagpangasaba sa ilang mga anak, kondili sa paghisgot sa mga ulohan nga makapalig-on sa espirituwal. Niining maong mga panagkatigom sa pamilya, mamati sila sa mga suliran o mga hagit nga nag-apektar sa matag usa sa ilang mga anak aron ang mga batan-on may kahigayonan nga makadawat ug indibiduwal nga pagtagad.

Ang mga batan-on nga walay espirituwal nga giya gikan sa ilang mga ginikanan mapalig-on sa Salmo 27:​10, nga nag-ingon: “Kon ako biyaan sa akong amahan ug inahan, bisan si Jehova mismo mosagop kanako.” Sa unsang paagi si Jehova, ang Amahan sa malumong mga kaluoy, motabang sa mga batan-on? Ang mga kongregasyon sa mga Saksi ni Jehova nahimong dangpanan diin daghan ang nakakaplag ug pagkamabination sa ubang mga tawo ug nagwagtang sa ilang mga pagduhaduha. Si Josías, usa ka batan-ong lalaki nga nakasinati nga tinuod kini, mikomento: “Ang organisasyon ni Jehova maoy mipuli sa hinungdanong bahin. Akong gibati nga ang kinabuhi walay kapuslanan. Nagkinabuhi ako nga walay tumong, walay paglaom. Ang pagkahibalo nga ang usa wala mag-inusara bug-os nga nag-usab sa akong kinabuhi. Akong nakita diha sa mga igsoon sa kongregasyon ang pamilya nga nawala kanako. Ang mga ansiyano ug ang mga pamilya diha sa kongregasyon sama sa usa ka angkla sa emosyonal nga diwa.”

 Sa pagkatinuod, daghang batan-on ug mga hamtong ang nakapauswag sa ilang mental ug espirituwal nga kalig-on pinaagi sa regular nga pagtambong sa mga tigom sa kongregasyon sa mga Saksi ni Jehova. Ang antropologo nga si Patricia Fortuny mikomento bahin niining positibong epekto diha sa iyang sinulat nga Los Testigos de Jehová: una alternativa religiosa para enfrentar el fin del milenio (Mga Saksi ni Jehova: Usa ka Relihiyosong Kapilian sa Pag-atubang sa Kataposan sa Milenyo): “Ang mga Saksi ni Jehova nagtanyag ug tin-aw ug klarong sistema sa kahikayan nga ipadapat sa adlaw-adlawng pagkinabuhi, usa ka eksaktong hugpong sa kalagdaan nga magsilbing giya sa panghunahuna ug paglihok.” Ang “sistema sa kahikayan” ug “hugpong sa kalagdaan” nga gihisgotan dinhi maoy pinasukad sa Bibliya. Busa, bisan tuod ang mga Saksi ni Jehova nag-atubang sa mao gihapong mga suliran ug mga pagpit-os nga giatubang sa ilang mga silingan, sila napalig-on sa talagsaong kaalam nianang karaang basahon. Oo, ang mga Saksi makadangop sa tataw nga mga doktrina ug mga prinsipyo nga makaplagan diha sa Bibliya.”

Sa Dihang “Wala na Unyay Kamatayon”

Ang pagtulon-an nga gihatag diha sa mga Kingdom Hall sa mga Saksi ni Jehova sublisubling nagpasiugda sa saad sa Diyos sa usa ka bag-ong kalibotan nga sa dili madugay magsugod, diin “magapuyo ang pagkamatarong” ug diin “walay usa nga magpakurog kanila.” (2 Pedro 3:​13; Miqueas 4:4) Dugang pa, si propetang Isaias nagsulat nga unya ang Diyos ‘molamoy sa kamatayon hangtod sa hangtod, ug ang Soberanong Ginoong Jehova tinong magpahid sa mga luha gikan sa tanang nawong.’ Ang kamatayon midangat sa tawhanong rasa ingong sangpotanan sa kalapasan sa unang tawo, si Adan, apan ang saad sa Diyos mao nga sa dili madugay “wala na unyay kamatayon.”​—Isaias 25:​8; Pinadayag 21:​3, 4; Roma 5:12.

Kon ikaw usa ka batan-on nga nangitag tabang, gidapit ka namo sa pagkaplag ug paglaom ug katarongan nga mabuhi, pinaagi sa mga panid sa Bibliya. Sa tabang sa mga Saksi ni Jehova, maangkon nimo ang paglaom nga ang kinamaayohang panahon anaa pa sa unahan nato diha sa bag-ong kalibotan nga gisaad sa Diyos.

[Footnote]

[Hulagway sa panid 9]

Ang mga ginikanan kinahanglang mogahin ug panahon sa pagpamati gayod sa ilang mga anak ug pagsabot sa ilang mga suliran

[Mga hulagway sa panid 10]

“Ang mga Saksi ni Jehova nagtanyag ug tin-aw ug klarong sistema sa kahikayan nga ipadapat sa adlaw-adlawng pagkinabuhi”