Pornograpiya Makita Diha sa Internet

SA TIBUOK KALIBOTAN, MINILYONG TAWO ANG MOGAMIT SA Internet kada adlaw. Daghan ang mokonektar sa Internet aron magnegosyo, mokuhag impormasyon bahin sa nangaging mga balita sa kalibotan, mahibaloan kon unsay klima, motuon bahin sa lainlaing mga nasod, mokuhag impormasyon bahin sa pagbiyahe, o makig-estorya sa pamilya ug mga higala diha sa lainlaing dapit sa kalibotan. Apan ang uban​—minyo ug dili-minyong mga hamtong maingon man ang makapatingalang gidaghanon sa mga bata​—mogamit sa Internet tungod sa lahi kaayong rason: MOTAN-AW UG PORNOGRAPIYA.

 ANG PORNOGRAPIYA DIHA SA KOMPIYUTER, gitawag usab ug cyberporn, popular kaayo nga nahimo kining multimilyong-dolyar nga negosyo. Ang The Wall Street Journal miingon: “Pangitag Web site nga mokita [moganansiya] ug, lagmit, ang negosyo ug unod niini law-ay [pornograpiko].”

Ang Journal nagpadayon pagsaysay kon nganong ang mga tawo modangop sa Internet aron sa pagtan-awg pornograpiya: “Ang mga parokyano makakita sa matentalong materyal nga dili na kinahanglang mohinok ug sulod sa usa ka barot nga tindahag libro o moadto sa usa ka lawak sa likod sa abanganag video diha sa silinganan. Ang mga parokyano makasuhid sa law-ayng mga materyal sa pribasiya sa balay​—o opisina.”

Pornograpiya ug ang mga Bata

Ikasubo, daghan sa mga tumatan-aw sa cyberporn maoy mga bata. Ang mga batan-ong gidid-an sa balaod sa pagpalit ug pornograpikong mga basahon o sa pag-abang ug pornograpikong mga video makatan-aw niini sa ilang balay pinaagi lamang sa pipila ka pagtulpok sa mouse. Daghan kaayog kapilian.

Daghang bata ang kanunayng mosuhid sa mga site sa Internet nga wala mahibaloi sa ilang mga ginikanan. Sa pagkatinuod, ang The Detroit News nag-ingon nga “kapin sa duha sa lima ka bata ang nagsuskribir sa usa ka web site o sa ubang serbisyo sa Internet bisan tuod ug duolan sa 85 porsiyento sa mga ginikanan ang nagdili niana.”

Bisan tuod ang kadaghanang bata​—ug mga hamtong usab​—nag-amping sa pagtago sa kamatuoran nga sila nagtan-awg pornograpiya, dili tanan ang nagtuo nga kinahanglang itago kana. Ang uban nag-isip sa maong buhat ingong dili-makadaot nga matang sa kalingawan. Ang uban mouyon nga ang pornograpiya dili maayo sa mga bata apan mangatarongan nga ang himoon sa mga hamtong sa pribado maoy personal nilang alatimanon.

Sa ubang mga nasod ang kontrobersiya maylabot sa pornograpiya nahimong tinuoray nga politikal nga pakiggubat. Sa usa ka kiliran sa argumento, ang mga tigpasiugda sa kagawasan sa pagsulti nangampanya pabor sa pornograpiya, ug sa laing kiliran, ang mga tigpasiugda sa mga prinsipyo sa pamilya nag-awhag sa mga awtoridad sa pagdili sa pornograpiya.

Ang Pagmata! dili modapig sa bisan hain sa politikal nga mga isyu. Ang tuyo niining seryeha mao ang pagpahibalo sa among mga magbabasa sa mga kapeligrohan sa pagtan-awg pornograpiya, sa pagsugyot ug mga paagi nga mapanalipdan nila ang ilang kaugalingon ug ang ilang mga minahal, ug sa pagtagana ug pinasukad-sa-Bibliya nga mga sugyot alang ni bisan kinsa nga nalit-agan sa pornograpiya ug buot nga makalingkawas niana.