Aids sa Aprika—Unsay Paglaom Alang sa Bag-ong Milenyo?

SINULAT SA KORESPONSAL SA PAGMATA! SA ZAMBIA

SA MIAGING Septiyembre ang mga delegado gikan sa lainlaing mga bahin sa Aprika nagtigom sa Lusaka, Zambia, alang sa ika-11 nga Internasyonal nga Komperensiya Bahin sa AIDS ug mga STD sa Aprika. Ang usa ka katuyoan sa maong komperensiya mao ang pagdasig ug dugang pagtinabangay sa mga rehiyon sa pagtubag sa pangutana nga, Unsaon nato pagsulbad ang pagkaylap sa AIDS sa Aprika?

Si Propesor Nkandu Luo, nga mao ang ministro sa panglawas sa Zambia nianang panahona, miingon nga ang kahimtang diha sa Aprika ug diha sa ubang mga bahin sa nagakaugmad nga kalibotan maoy “grabe kaayo,” nga midugang nga kini “nagpahunong ug nagpakawang pa gani sa ubang hinungdanong mga pag-uswag nga nahimo maylabot sa panglawas ug diha sa ubang sosyal ug ekonomikanhong mga natad.”

Ang usa ka simposyum bahin sa kahilwas sa paggamit ug dugo miila nga ang AIDS napasa pinaagi sa mga pag-abonog dugo. Usa ka doktor, nga hawas sa Blood Safety Unit sa World Health Organization, nag-ingon nga bisan tuod ang pagpakigsekso uban sa natakboyang paris dili kanunayng makatakod ug HIV, ang makadawat sa dugong nahugawan ug AIDS matakdan​—sa tanang higayon! May maayong katarongan nga kining doktora miingon nga sa maong kahimtang, “ang labing hilwas nga pag-abonog dugo mao kanang dili ihatag.”

Gipasiugda sa komperensiya nga ang dako kaayong gastos sa pagpatambal magpalisod, kon dili man imposible, alang niadtong may AIDS nga makaarang pagbayad sa pagpatambal. Pananglitan, sa aberids ang usa ka taga-Uganda nga nagpuyo sa siyudad mokitag mga $200 sa usa ka bulan. Apan ang pagpatambal nga naggamit ug mga antiretroviral mogastog taman sa $1,000 matag bulan!

Gipakita sa komperensiya sa Lusaka nga ang pagsugod sa bag-ong milenyo dili magdalag sayon nga kasulbaran sa pagkaylap sa AIDS. Apan, ang mga estudyante sa Bibliya nahibalo nga sa kataposan ang solusyon sa tanang sakit nag-agad sa Maglalalang, si Jehova nga Diyos, kinsa misaad nga sa iyang bag-ong kalibotan, “walay pumoluyo nga moingon: ‘Ako masakiton.’”​—Isaias 33:24.

[Mapa/Mga hulagway sa panid 31]

Si Propesor Nkandu Luo

[Credit Line]

Letrato sa permiso ni E. Mwanaleza, Times of Zambia