Mga Pukot sa Insek sa India

SINULAT SA KORESPONSAL SA PAGMATA! SA INDIA

SA KASADPANG baybayon sa India, 250 kilometros gikan sa habagatang tumoy sa gamayng kontinente sa India, nahimutang ang siyudad sa Kochi, kaniadto Cochin. Ubay sa duha ka kiliran sa awasanan sa tubig didto, ang baybayon gilinyahan sa talagsaong tinukdan nga Ininsek-ug-estilo nga mga pukot. Sa unsang paagi kini nakaabot didto?

Ang mga Insek nagpuyo sa maong dapit sukad sa ikawalong siglo K.P. padayon, ug gihunahuna nga ang Insek nga mga magpapatigayon gikan sa harianong panimalay ni Kublai Khan unang nagdalag mga pukot nga ingon niini ngadto sa Cochin una pa sa 1400. Daghang isda ang masikop duol sa baybayon diha sa katubigan palibot sa Cochin. Busa, kining tag-as, gipaandar sa tawo nga mga makinang pangisda nagsilbi gayod sulod sa kapin sa usa ka siglo, hangtod nga gipapahawa sa mga Arabo ang mga Insek.

Kay wala na ang mga Insek, gipanangtang ang mga pukot. Apan sa sayong bahin sa ika-16 nga siglo, ang mga Portuges naghingilin sa mga Arabo. Dayag, ang Portuges ang nagdala pag-usab sa maong mga pukot ngadto sa Cochin, nga nagdalag balik niini gikan sa kanhing Portuges nga islang kolonya sa Macao sa habagatan-sidlakang Tsina.

Bisan tuod ang ideya gidangtan nag daghang siglo, ang mga pukot sa Insek maayo gihapong gamiton nga halos walay kausaban sa orihinal nga disenyo o pag-obra. Ug nagpadayon kini pagtagana ug pangabuhian sa daghang mananagat ug pagkaon alang sa daghang tawo. Sa pagkatinuod, ang makuha gikan sa usa ka pukot makapakaon ug enterong balangay. Apan gawas pa sa pagkaepektibo niini, ang mga pukot maanindot usab, ilabina sa dihang tan-awon nga ang anaa sa likod mao ang maanindot bulawanog kolor nga langit sa kabuntagon o ang langit sa kagabhion.

Sa Unsang Paagi Kini Nagaobra?

Ang dagkong mga pukot sa Insek naggamit ug tukod ug katumbas nga mga pabug-at aron mahimong timbang ang gibug-aton sa pukot ug sa kuha. Kon dili gamiton, ang pukot ug ang tukod niini haw-ason sa tubig ug ibitay. Ang pagpangisda magsugod sayo sa buntag ug dangtag upat o lima ka oras. Ang mga pukot hinayng ipaubos sa tubig. Aron mahimo kini, ang mga mananagat magpahiangay sa mga pabug-at nga gitaod sa pikas tumoy sa sistema sa pagbalanse o kaha ang hepe sa pundok sa mga mananagat moagi sa balabag diha sa tunga sa pukot. Pasagdan ang pukot nga mahumol sa tubig sulod sa mga 5 ngadto 20 minutos una pa kini hinayhinayon ug isa, nga magsapyaw sa mga isda nga nanglangoy duol sa baybayon. Latas sa katuigan sa kasinatian, ang hepe mahibalo sa eksaktong panahon nga bitaron ang pukot.

Sa senyas sa hepe, ang ubang mga mananagat nga lima o unom ka lalaki mag-isa sa pukot pinaagi sa pagbutad paubos sa pisi nga niana ang mga pabug-at nga mga bato gipanghigot. Samtang mosaka ang pukot, ang mga eskina sa pukot maoy mounag gimaw. Busa, ang pukot mopormag panaksan nga dunay sulod nga isda. Mahinam gayod ang mga mananagat! Human makakuhag daghan, pikpikon nila ang usag usa sa likod sa pagpakita sa ilang kalipay. Sa ulahi ang mga isda isubasta ngadto sa mga magpapatigayon, mga asawa, ug sa popanagsang turista.

Ang mga Insek, Arabo, ug Portuges nangabot ug namiya. Apan ang mga pukot sa Insek nagpadayon sa pag-utaw-utaw ubay sa katubigan sa Kochi, sama gayod sa kahimtang niini 600 ka tuig kanhi.

[Mapa sa panid 31]

(Alang sa aktuwal nga pagkahan-ay, tan-awa ang publikasyon)

Kochi

[Credit Line]

Mountain High Maps® Copyright © 1997 Digital Wisdom, Inc.