Milyonmilyon sa tibuok kalibotan nagtuo nga ang tradisyon sa pagsaulog ug Pasko maoy selebrasyon sa adlawng natawhan ni Jesu-Kristo. Pero nagsaulog ba ug Pasko ang unang siglong mga Kristiyano nga suod kang Jesus? Ug nahibalo ka ba kon unsay giingon sa Bibliya bahin sa mga birthday o adlawng natawhan? Ang tubag niini nga mga pangutana makatabang nato nga mahibaloan kon ang Pasko ba para sa mga Kristiyano.

Una, wala maghisgot ang Bibliya nga dunay gihimong selebrasyon para sa adlawng natawhan ni Jesus ug sa ubang matinumanong magsisimba sa Diyos. Duha ka tawo lang ang gihisgotan sa Bibliya nga nagselebrar niini. Silang duha dili magsisimba ni Jehova, ang Diyos sa Bibliya, ug dili maayo ang nahitabo panahon sa ilang adlawng natawhan. (Genesis 40:20; Marcos 6:21) Sumala sa Encyclopædia Britannica, ang unang mga Kristiyano wala magsunod sa “paganong kostumbre sa pagselebrar ug adlawng natawhan.”

Ang Bibliya walay giingon kon kanus-a gyod gipanganak si Jesus. “Ang petsa sa adlawng natawhan ni Kristo dili makita diha sa B[ag-ong] T[ugon] o bisan sa ubang basahon,” nag-ingon ang Cyclopedia ni McClintock ug Strong. Kon gusto pa ni Jesus nga saulogon sa iyang mga sumusunod ang iyang adlawng natawhan, paneguroon unta niya nga mahibalo sila kon kanus-a siya gipanganak.

Ikaduha, walay rekord diha sa Bibliya nga si Jesus o bisan usa sa iyang mga tinun-an nagselebrar ug Pasko. Ang New Catholic Encyclopedia nag-ingon nga ang pagselebrar ug Pasko unang gihisgotan ni “Philocalus diha sa Chronograph, usa ka Romanong almanac nga gibase sa mga reperensiya nga nasulat niadtong mga 336 [C.E.].” Klaro nga nianang panahona dugay nang nakompleto ang Bibliya ug daghang siglo na ang milabay human nga mianhi si Jesus sa yuta. Busa si McClintock ug Strong nag-ingon nga ang “pagsaulog ug Pasko wala gisugo sa Diyos, ni gipasukad kini sa B[ag-ong] T[ugon].” *

Ingong Dakong Magtutudlo, si Jesus naghatag ug tin-awng mga instruksiyon kon unsay iyang gustong ipabuhat sa iyang mga sumusunod, ug kini narekord sa Bibliya. Pero ang pagsaulog ug Pasko wala niya isugo. Sama nga dili gusto sa usa ka titser nga lapason sa iyang mga estudyante ang iyang mga instruksiyon, dili pod gusto ni Jesus nga lapason sa iyang mga sumusunod ang mga butang nga nasulat sa Bibliya.​—1 Corinto 4:6.

Sa laing bahin, dunay usa ka importanteng okasyon nga pamilyar kaayo ang unang mga Kristiyano—ang pagsaulog, o Paghandom, sa kamatayon ni Jesus. Gisultihan ni Jesus ang iyang mga sumusunod kon kanus-a kini saulogon, ug iyang gipakita kanila kon unsaon kini pagsaulog. Kining espesipikong mga instruksiyon, maingon man ang petsa kon kanus-a siya namatay, narekord diha sa Bibliya.​—Lucas 22:19; 1 Corinto 11:25.

Sama sa atong nahisgotan na, ang Pasko maoy usa ka selebrasyon alang sa adlawng natawhan, ug ang unang mga Kristiyano wala magselebrar nianang pagano nga kostumbre. Dugang pa, ang Bibliya wala maghisgot nga si Jesus o si bisan kinsa nagsaulog ug Pasko. Busa minilyong Kristiyano sa tibuok kalibotan dili magsaulog ug Pasko.