SAKIT kaayo dihang magluib ang bana o asawa. Tinuod, napasaylo ra sa uban ang ilang naghinulsol nga kapikas ug naningkamot sila nga mabalik pag-usab ang ilang maayong relasyon. * Pero magkauli man ang magtiayon o dili, kadtong giluiban nag-antos sa grabeng kasakit. Unsaon kaha nila pagsagubang ang grabeng kasakit nga ilang gibati?

Bisan pa sa grabeng kasakit nga gibati, daghang inosenteng kapikas ang nahupayan sa Bibliya. Ilang nakat-onan nga ang Diyos nakakita sa ilang mga luha ug nasakitan sab sa nahitabo nila.​—Malaquias 2:13-16.

“Dihang nalumsan ko sa mga kabalaka, ang imong paghupay nakapalipay kanako.”​—Salmo 94:19.

“Dihang akong basahon ni nga teksto, ma-imagine nako nga gihupay ni Jehova ang akong kasakit, sama sa usa ka mahigugmaong amahan,” miingon si Bill.

“Sa maunongon ikaw magmaunongon.”​—Salmo 18:25.

“Ang akong bana wala magmaunongon,” miingon si Carmen, nga pipila ka bulan nang giluiban sa bana. “Pero makasalig ko sa pagkamaunongon ni Jehova. Dili gyod ko niya biyaan.”

“Ayawg kabalaka sa bisan unsa, apan sa tanang butang ipahibalo sa Diyos ang inyong mga hangyo pinaagi sa pag-ampo ug pangamuyo . . . , ug ang kalinaw nga gikan sa Diyos, nga labaw sa tanang pagsabot, magbantay sa inyong kasingkasing.”​—Filipos 4:6, 7.

“Balikbalikon nakog basa ni nga teksto,” miingon si Sasha. “Sa nagsige kog ampo, gihatagan ko sa Diyos ug kalinaw.”

Silang tanan nga gihisgotan niini nga artikulo mibati nga kasurenderon na. Pero misalig sila kang Jehova nga Diyos ug napalig-on sa pagbasa sa Bibliya. Miingon si Bill: “Ang akong pagtuo nakahatag ug katuyoan sa akong kinabuhi dihang gibati nako nga morag nahugno na ang akong kalibotan. Bisan pag dihay panahon nga morag naglakaw ko sa ‘ngiob kaayo nga walog,’ wala gyod ko biyai sa Diyos.”​—Salmo 23:4.