ANG mga relihiyon sa tibuok kalibotan sama sa Romano Katoliko, mga Ortodokso, Budhismo, ug uban pa, nagdili sa ilang kadagkoan ug mga klero sa pagminyo. Daghan ang nagtuo nga ang pagdili sa pagminyo maoy hinungdan sa daghang seksuwal nga mga eskandalo sa mga klerigo sa nagkalainlaing relihiyon.

Busa makataronganon lang nga mangutana, Ang Bibliya ba nagsugo nga kinahanglang dili magminyo ang Kristohanong mga ministro? Sa pagtubag niana, atong hisgotan ang sinugdanan ug ang pagkaylap niini nga tradisyon ug kon unsay hunahuna sa Diyos bahin niini.

Sa pakigpulong ni Pope Benedict XVI sa Roman Curia sa 2006, siya miingon nga ang pagdili sa pagminyo maoy “usa ka tradisyon nga nagsugod balik pa sa yugto duol sa kapanahonan sa mga Apostoles.”

Apan ang unang siglong mga Kristohanon wala magsunod niini nga relihiyosong tradisyon. Gani si apostol Pablo, nga nabuhi sa unang siglo, nagpasidaan sa mga magtutuo bahin sa mga lalaki nga nagsultig ‘makapahisalaag nga inspiradong mga pulong’ ug “nagdili sa pagminyo.”—1 Timoteo 4:1-3.

Sa ikaduhang siglo, ang tradisyong dili pagminyo nahimong bahin sa Kasadpang mga relihiyon nga nag-angkong mga Kristohanon. Sumala sa librong Celibacy and Religious Traditions, kini “nahiuyon sa bag-ong kalihokan labot sa pagdili sa pagpakigsekso nga gipasiugda sa Imperyo sa Roma.”

Sa misunod nga mga siglo, ang mga konsilyo sa simbahan ug ang nag-angkong mga Amahan sa Simbahan nagduso sa pagdili sa mga klero sa pagminyo. Sila nagtuo nga ang pagpakigsekso makahatag ug kahugawan ug dili angay sa ilang buluhaton.  Apan ang Encyclopædia Britannica nag-ingon nga “sa ika-10 nga siglo daghang pari ug bisan ubang obispo dunay mga asawa.”

Ang pagdili sa pagminyo sa klero gipatuman panahon sa Lateran Council niadtong 1123 ug 1139, sa Roma, ug kini ang opisyal nga baroganan sa Romano Katolikong Simbahan hangtod karon. Pinaagi niini, ang simbahan dili mawad-an ug impluwensiya ug kinitaan nga maoy moresulta kon ipapanunod sa minyong mga pari ang propidad sa simbahan ngadto sa ilang mga anak.

Ang hunahuna sa Diyos bahin sa dili pagminyo tin-awng gipadayag diha sa iyang Pulong, ang Bibliya. Diha niana atong mabasa ang giingon ni Jesus bahin niadtong nagpabiling walay asawa, sama kaniya, “tungod sa gingharian sa mga langit.” (Mateo 19:12) Bisan si apostol Pablo naghisgot bahin sa mga Kristohanon nga misunod sa iyang panig-ingnan sa pagpabiling dili minyo “tungod sa maayong balita.”—1 Corinto 7:37, 38; 9:23.

Si Jesus ug Pablo wala magsugo nga dili magminyo ang mga ministro. Si Jesus miingon nga ang pagpabiling dili minyo maoy usa ka “gasa” pero dili tanan niyang mga sumusunod dunay ingon niini nga gasa. Sa dihang nagsulat si Pablo bahin niadtong wala magminyo, siya prangkang miadmitir: “Ako walay sugo gikan sa Ginoo, apan ako maghatag sa akong hunahuna.”—Mateo 19:11; 1 Corinto 7:25.

Ang Bibliya nagpakita nga daghang Kristohanong ministro sa unang siglo, lakip kang apostol Pedro, mga minyo. (Mateo 8:14; Marcos 1:29-31; 1 Corinto 9:5) Gani, tungod kay kaylap man ang imoralidad sa Roma niadtong panahona, si Pablo misulat nga kon minyo, ang Kristohanong mga magtatan-aw kinahanglang “bana sa usa ka asawa” ug “may mga anak nga nagpasakop.”—1 Timoteo 3:2, 4.

Dili kini mga kaminyoon nga walay seksuwal nga relasyon, kay ang Bibliya prangkang nag-ingon nga angayng “ihatag sa bana ngadto sa iyang asawa ang nahiangay kaniya” ug nga ang magtiayon ‘dili maghinikaway sa usag usa’ kon bahin sa pagpakigsekso. (1 Corinto 7:3-5) Tin-aw nga dili kinahanglanon o wala pugsa sa Diyos ang mga Kristohanong ministro sa dili pagminyo.

Kon dili pinugos ang dili pagminyo, nganong si Jesus ug Pablo miingon man nga maayong magpabiling dili minyo? Tungod kay ang tawong dili minyo mas daghag higayon sa pagsangyaw sa maayong balita. Ang mga dili minyo daghag panahon kay sila wala may sabal sa kinabuhi sama nianang sa mga minyo.—1 Corinto 7:32-35.

Pananglitan, si David miundang sa iyang dakog suweldo nga trabaho sa Mexico City aron mobalhin sa usa ka baryo sa Costa Rica ug tudloan ang uban bahin sa Bibliya. Nakatabang ba kang David ang iyang pagpabiling ulitawo? “Siyempre,” siya miingon. “Lisod kaayong magpasibo sa bag-ong kultura ug sa lahi nga paagi sa pagkinabuhi, apan kay wala may sabal ang akong kinabuhi, nakapahiangay dayon ko.”

Si Claudia, nga dalagang Kristohanon kinsa mibalhin sa mga dapit diin gikinahanglan ang mga magwawali, miingon: “Malipayon kaayo ko sa akong pag-alagad sa Diyos. Ang akong pagtuo ug ang akong relasyon sa Diyos napalig-on kay nakita nako kon giunsa ko niya pag-atiman.”

Dili lisod ang pagpabiling dili minyo. Si Claudia midugang: “Minyo ka man o dili, magmalipayon ka kon imong ihatag kang Jehova nga Diyos ang imong kinamaayohan.”—Salmo 119:1, 2.