“MAKALARGA na ang bus, pero ibilin nang Insek!” Mao kanay nadunggan ni Alexandra samtang naglingkod sa bus, nga naghulat nga makatabok sa utlanan sa duha ka nasod sa South America. Siya nanaog aron tan-awon kon unsay nahitabo ug iyang nakita ang batan-ong Insek nga lalaki nga naglisod sa pagpatin-aw sa iyang kahimtang ngadto guwardiya sa utlanan sa pinulongang Kinatsila. Kay tigtambongan man si Alexandra sa Ininsek ug sinultihan nga kongregasyon sa mga Saksi ni Jehova, siya mitanyag sa paghubad sa gisulti sa Insek.

Ang batan-on miingon nga legal siya nga residente pero gikawat ang iyang mga dokumento ug kuwarta. Wala motuo sa primero ang opisyal sa iyang giingon ug nagduda nga si Alexandra maoy usa ka human trafficker. Pero mituo ra ang opisyal sa giingon sa batan-on, apan ang luoyng batan-on mibayad ug multa kay wala siyay dala nga dokumento. Kay walay kuwarta, gipahulam siya ni Alexandra ug $20. Puwerteng pasalamat sa batan-on ug miingon nga iya ra unyang bayran siya ug kapin sa $20. Si Alexandra miingon nga wala siya magpaabot nga baslan; siya nalipay nga nakatabang kay kini ang husto. Iyang gihatagan ang batan-on ug literatura sa Bibliya ug gidasig sa pagtuon ug Bibliya uban sa mga Saksi.

Kita malipay kon makadungog tag mga tawo nga nanghatag sa mga dili kaila, ug siyempre, malipay pod kitang makadungog bahin sa pagkamahinatagon sa mga tawo sa tanang relihiyon ug sa mga tawo nga walay relihiyon. Andam ka ba usab sa pagtabang sa uban? Makapukaw ug atensiyon kana nga pangutana kay si Jesus miingon: “Adunay labaw nga kalipay sa paghatag kay sa pagdawat.” (Buhat 20:35) Nakapukaw usab kini sa atensiyon sa natad sa siyensiya kay nakita sa mga tigdukiduki nga ang paghatag makaayo kanimo. Atong tan-awon kon ngano.

Nadiskobrehan sa siyensiya nga ang paghatag ug ang kalipay konektado. Si apostol Pablo misulat nga “gihigugma sa Diyos ang malipayong maghahatag.” Siya naghisgot bahin sa mga Kristohanon nga naghatag ug dagkong donasyon aron tabangan ang naglisod nga mga kauban sa pagtuo. (2 Corinto 8:4; 9:7) Wala mag-ingon si Pablo nga sila nanghatag kay sila malipayon. Pero ang tinuod, sila malipayon kay sila nakahatag.

Sumala sa usa ka pagtuon, ang paghatag “makapalihok sa mga parte sa utok nga nalangkit sa kalipay, relasyon sa isigkatawo, ug pagsalig, nga makapagaan sa pagbati.” Nadiskobrehan sa laing pagtuon nga ang “paghatag ug kuwarta ngadto sa usa ka tawo mas nakapalipay sa nanghatag kay sa paggasto niini para sa ilang kaugalingon.”

Nakaingon ka ba nga tungod sa imong kahimtang wala ka kaayoy mahimo? Ang tinuod, ang tanan mobatig kalipay tungod sa pagkahimong “malipayong maghahatag.” Kon ihatag nga may hustong motibo, ang ihatag dili kinahanglang dako nga kantidad. Usa sa  mga Saksi ni Jehova nagpadalag sulat ngadto sa magpapatik niining magasina nga nasudlan ug kontribusyon gikan niya: “Gagmay ra kog ginaamot sa Kingdom Hall.” Pero siya mipadayon sa pag-ingon: “Gihatagan ko ni Jehova nga Diyos ug mas daghan pa kay sa akong nahatag. . . . Salamat nga inyong gipaposible nga makahatag ko niini nga amot—kini nakapalipay nako.”

Dili kay kuwarta lang ang mahimong ihatag. Adunay daghang paagi sa paghatag.

Ang Bibliya nag-ingon: “Ang usa ka tawong mahigugmaon magadawat ug kaayohan sa iyang kaugalingon, apan ang tawong palabilabihon magdala ug kadaotan sa iyang kaugalingon.” (Proberbio 11:17, NCV) Ang tawong buotan mahinatagon, andam mohatag sa ilang kaugalingon—sa ilang panahon, kusog, pagtagad, ug uban pa. Kini makabenepisyo kanila sa daghang paagi, usa niini mao nga ang pagkamahinatagon makaayo sa ilang panglawas.

Gipakita sa mga pagtuon nga kadtong matinabangon sa uban dili daling masakit ug dili kaayo ma-depress. Sagad sila mas maayog panglawas. Ang pagkamahinatagon makapaarang-arang pa gani sa panglawas sa tawo nga nag-antos sa sakit nga walay kaayohan, sama sa multiple sclerosis o HIV. Nakita usab nga kadtong mga palainom kinsa mihunong na sa bisyo ug matinabangon sa uban mahupayan ug diyutay sa ilang depresyon ug dakog purohan nga dili na moinom ug balik.

Nganong ingon niini ang resulta? Nakita sa pagtuon nga ang mga tawo nga “maluluy-on, buotan ug maluloton dili kaayo magmagul-anon o masuk-anon.” Ang pagkamahinatagon usab makapamenos sa tensiyon ug sa presyur sa dugo. Ug kadtong namatyag bana o asawa daling maulian sa depresyon kon sila matinabangon sa uban.

Busa, ang pagkamahinatagon makaayo kanimo.

Giawhag ni Jesus ang iyang mga sumusunod: “Batasana ang paghatag, ug pagahatagan kamo sa mga tawo. Ibubo nila sa inyong sabakan ang usa ka maayong takos, dinasok, tinantan ug nagaawas. Kay sa sukod nga inyong ginasukod, sila magasukod nganha kaninyo ingong balos.” (Lucas 6:38) Dihang manghatag ka, ang mga tawo mosanong sa imong kamahinatagon ug molantaw ug utang kabubut-on ug busa sila mahimo usab nga mahinatagon. Busa ang pagkamahinatagon makapadasig ug pagtinabangay ug panaghigalaay.

Ang mga tigdukiduki nga nagtuon sa kinaiya sa tawo nakamatikod nga ang mga “tawo nga kanunayng mahunahunaon sa kaayohan sa uban nagdasig sa uban sa pagsundog sa maong kinaiya.” Gani, “ang pagbasa lang ug talagsaong mga buhat sa pagkamaayo makapalihok sa uban sa pagkahimong mahinatagon.” Busa sumala sa usa ka pagtuon, ang “matag tawo makaimpluwensiya ug daghan, bisag ang uban kanila dili nila kaila o wala nila mahimamat.” Sa ato pa, ang usa ka buhat sa pagkamahinatagon motakod sa mga tawo sa tibuok komunidad. Kinsa bay dili ganahang mopuyo sa ingon niana nga dapit?  Daghang kaayohan ang makuha kon mas daghang tawo ang mahimong mahinatagon.

Ang maayong epekto niini makita diha sa eksperyensiya gikan sa Florida, U.S.A. Usa ka grupo sa mga Saksi ni Jehova miboluntaryo sa pagtabang sa mga naapektohan sa kusog kaayong bagyo. Samtang naghulat sa ilang mga materyales nga gamiton sa pag-ayo sa balay, sila nakamatikod nga ang koral sa usa sa mga silingan naguba, ug mitanyag sila sa pag-ayo niini. “Mapasalamaton kaayo ko,” miingon ang silingan diha sa iyang sulat ngadto sa hedkuwarter sa mga Saksi ni Jehova sa tibuok kalibotan. “Sila mao ang kinabuotan nga akong nahibalag sukad.” Kay mapasalamaton, siya mihatag ug dakong kontribusyon nga magamit nianang iyang gitawag ug talagsaong buluhaton sa mga Saksi.

Nadiskobrehan sa panukiduki sa siyensiya nga “daw kinaiyahan na sa tawo ang pagkamatinabangon sa uban.” Matod pa sa pagtuon, ang mga bata “may kinaiya na nga mahunahunaon sa uban bisag dili pa makamaong mosulti.” Ngano? Ang Bibliya nagtubag dihang kini miingon nga ang tawo gilalang sumala sa “larawan sa Diyos,” sa ato pa, ang tawo dunay mga kinaiya nga sama sa Diyos.—Genesis 1:27.

Lakip sa katingalahang mga hiyas sa atong Maglalalang, si Jehova nga Diyos, mao ang pagkamahinatagon. Kita iyang gihatagan ug kinabuhi ug sa tanang butang nga atong gikinahanglan aron magmalipayon. (Buhat 14:17; 17:26-28) Mahimo kitang masuod sa atong langitnong Amahan ug sa iyang mahigugmaong mga katuyoan alang kanato pinaagi sa pagtuon sa iyang Pulong, ang Bibliya. Gipadayag usab niana nga libro nga ang Diyos naghimog tagana alang sa atong malipayong umaabot. * (1 Juan 4:9, 10) Kay mahinatagon man si Jehova ug gilalang ka nga may mga kinaiya nga sama kaniya, dili ikatingala nga ang paghatag—agig pagsundog sa Diyos—makaayo nimo ug mapalipay nimo siya.—Hebreohanon 13:16.

Nahinumdom ka ba kang Alexandra nga gihisgotan sa sinugdan niini nga artikulo? Unsa may nahitabo sa ulahi? Bisag giingnan siya sa iyang kaubang pasahero nga nag-usik-usik lang siyag kuwarta, gikontak sa batan-ong Insek ang iyang mga higala sa siyudad nga gihunongan sa bus, ug ang utang nga $20 gibayran dayon. Gisunod usab sa batan-on ang sugyot ni Alexandra ug nagtuon kinig Bibliya. Nalipay kaayo si Alexandra sa pagkakita kaniya paglabayg tulo ka bulan diha sa Ininsek ug pinulongan nga kombensiyon sa mga Saksi ni Jehova sa Peru. Agig pagpasalamat sa gihimo ni Alexandra, gidapit sa batan-on si Alexandra ug ang iyang mga kauban sa pagpangaon diha sa iyang restawran.

Ang paghatag ug pagtabang sa uban makapalipay kaayo. Pero mas malipay ka kon makatabang kag tawo sa pagbatog dugang kahibalo bahin sa Tuboran sa tanang maayong mga gasa—si Jehova nga Diyos! (Santiago 1:17) Nagaani na ba sab ka sa mga bunga sa pagkamahinatagon?