Si Noe, iyang pamilya, ug ang mga hayop misulod sa arka. Dayon gisirad-an ni Jehova ang pultahan ug misugod pag-ulan. Kusog kaayo ang ulan ug milutaw ang arka. Napuno sa tubig ang tibuok yuta. Ang tanang daotan nahurot ug kalaglag. Pero si Noe ug ang iyang pamilya wala maunsa. Seguradong malipayon sila kay ilang gisunod si Jehova!

Mihunong ang ulan human sa 40 ka adlaw ug 40 ka gabii. Anam-anam nga mihubas ang tubig ug napatong ang arka sa bukid. Pero dili dayon makagawas si Noe ug iyang pamilya kay daghan gihapog tubig.

Hinayhinay nga miuga ang yuta. Kapin sa usa ka tuig nga didto si Noe ug ang iyang pamilya sa arka. Dayon si Jehova miingon nga puwede na silang mogawas. Nagpasalamat gyod sila kang Jehova kay iya silang giluwas, maong naghalad sila.

Nalipay kaayo si Jehova sa ilang halad. Siya misaad nga dili na niya laglagon ang tawo pinaagig lunop. Ingong ilhanan sa iyang saad, gipakita ni Jehova ang unang rainbow. Nakakita na kag rainbow?

Dayon giingnan ni Jehova si Noe ug ang iyang pamilya nga manganak ug pun-on ang yuta.