LEKSIYON 48
Piliag Maayo ang Imong mga Higala
Ang atong suod nga mga higala makadugang sa atong kalipay sa maayong mga panahon, ug makapalig-on sila nato sa lisod nga mga panahon. Pero gipasidan-an ta sa Bibliya nga dili tanan maayong higala. Busa unsaon nimo pagpilig maayong mga higala? Konsideraha ang mosunod nga mga pangutana.
1. Unsay epekto kanimo sa imong pilion nga mga higala?
Naa tay tendensiya nga maparehas sa mga tawo nga atong makauban. Puwede ning makaayo nato o dili—ug tinuod ni, nakig-uban man ta nila sa personal o sa social media. Sumala sa giingon sa Bibliya, “ang naglakaw uban sa mga maalamon mahimong maalamon, apan ang makig-uban sa mga buangbuang [kadtong wala mahigugma kang Jehova] masugamak sa kadaot.” (Proverbio 13:20) Ang mga higala nga nahigugma ug nagsimba kang Jehova makatabang nimo sa pagpabiling suod kaniya ug sa paghimog maayong mga desisyon. Pero ang suod nga mga higala nga wala mahigugma kang Jehova makapalayo nato gikan kaniya. Kanay hinungdan nga gidasig ta sa Bibliya nga piliog maayo ang atong mga higala. Kon ang atong mga higala nahigugma sa Diyos, makahatag nig kaayohan kanato ug kanila. Makahimo ta sa ‘pagdinasigay ug paglig-onay.’—1 Tesalonica 5:11.
2. Unsay epekto kang Jehova sa imong pilion nga mga higala?
Piliog maayo ni Jehova ang iyang mga higala. “Makigsuod Siya sa matul-id.” (Proverbio 3:32) Unsa kahay bation ni Jehova kon mopili tag mga higala nga wala mahigugma niya? Maguol gyod siya! (Basaha ang Santiago 4:4.) Pero malipay si Jehova ug pilion ta niya nga higala kon likayan nato ang dili maayong mga kauban ug makigsuod ta niya ug niadtong nahigugma niya.—Salmo 15:1-4.
TUN-IG DUGANG
Susiha kon nganong importante kaayo kon kinsay pilion nato nga mga higala, ug sayra kon unsaon nimo pag-ugmad ug panaghigalaay nga makahatag gyod nimog kaayohan.
3. Pag-amping sa dili maayong mga higala
Ang mga tawo nga wala mahigugma sa Diyos ug sa iyang mga sukdanan dili maayong higala. I-play ang VIDEO, ug dayon hisgoti ang mosunod nga pangutana:
-
Sa unsang paagi dili ta makamatikod nga nakig-uban na diay ta sa dili maayong mga tawo?
Basaha ang 1 Corinto 15:33, ug dayon hisgoti kini nga mga pangutana:
-
Unsang klase sa mga tawo ang dili maayong kauban? Ngano?
Basaha ang Salmo 119:63, ug dayon hisgoti kini nga pangutana:
-
Unsay angay nimong pangitaon sa usa ka higala?
Kon daot ang usa ka mansanas, madaot pod ang uban. Unsay epekto kanimo sa dili maayong higala?
4. Puwede natong mahimong maayong higala ang mga tawo nga lahi sa atoa
Gihisgotan sa Bibliya si David ug Jonatan, nga nabuhi sa panahon sa karaang Israel. Dako kaayog diperensiya ang ilang edad ug kahimtang, pero nindot kaayo ang ilang panaghigalaay. Basaha ang 1 Samuel 18:1, ug dayon hisgoti kini nga pangutana:
-
Nganong dili kinahanglang parehas natog edad o kahimtang sa kinabuhi ang mahimo natong higala?
Basaha ang Roma 1:11, 12, ug dayon hisgoti kini nga pangutana:
-
Sa unsang paagi magkadinasigay ang managhigala nga nahigugma kang Jehova?
Niini nga video, tan-awa kon sa unsang paagi ang batan-ong brader nakakitag amigo nga wala niya damha. I-play ang VIDEO, ug dayon hisgoti ang mosunod nga mga pangutana:
-
Sa video, nganong nabalaka ang ginikanan ni Akil bahin sa iyang mga higala sa eskuwelahan?
-
Sa primero, nganong ganahan kaayo siya sa iyang nahimong mga higala?
-
Unsay iyang gihimo aron mawala ang iyang gibating kamingaw?
5. Kon unsay himoon aron makakitag maayong mga higala
Sayra kon sa unsang paagi makakita kag tinuod nga mga higala—ug kon sa unsang paagi pod ka mahimong tinuod nga higala. I-play ang VIDEO.
Basaha ang Proverbio 18:24 ug 27:17, ug dayon hisgoti kini nga mga pangutana:
-
Sa unsang paagi magtinabangay ang tinuod nga managhigala?
-
Naa ba kay mga higala nga ingon ana? Kon wala, unsay imong himoon?
Basaha ang Filipos 2:4, ug dayon hisgoti kini nga pangutana:
-
Aron makakita kag maayong mga higala, kinahanglan nga maayo pod ka nga higala. Unsaon nimo na paghimo?
Aron makakita kag maayong mga higala, kinahanglan nga maayo pod ka nga higala
ANG UBAN MOINGON: “Bahala na lag bisan kinsa akong mahigala, basta naa.”
-
Unsay imong isulti?
SUMARYO
Kon pilion natog maayo ang atong mga higala, mapalipay nato si Jehova ug makahatag nig kaayohan nato.
Review
-
Nganong importante kang Jehova kon kinsay pilion nato nga mga higala?
-
Unsa nga mga higala ang angay natong likayan?
-
Unsay imong himoon aron makakita kag maayong mga higala ug molig-on ang inyong panaghigalaay?
SUSIHA
Basaha kon sa unsang paagi ang maayong mga higala makatabang nato sa lisod nga mga panahon.
Sayra kon unsay praktikal nimong himoon aron makakita kag maayong mga higala.
Unsay kinahanglan nimong mahibaloan bahin sa pagpakighigala online?
Sa estorya nga “Nangandoy Kog Amahan,” sayra kon nganong ang usa ka lalaki nangitag bag-ong mga higala.
“Ang Bibliya Makabag-o sa Kinabuhi” (Ang Bantayanang Torre, Abril 1, 2012)
Basin Ganahan Pod Ka
KOMON NGA MGA PANGUTANA
Unsa ang Bible Study Program nga Gina-offer sa mga Saksi ni Jehova?
Sa libreng interactive program nga gina-offer sa mga Saksi ni Jehova, puwede nimong gamiton ang bisan unsang bersiyon sa Bibliya. Puwede nimong paapilon ang tibuok pamilya o mga amigo o amiga.
