LEKSIYON 01
Sa Unsang Paagi ang Bibliya Makatabang Kanimo?
Kitang tanan naay mga pangutana bahin sa kinabuhi, pag-antos, kamatayon, ug sa umaabot. Naghunahuna pod ta sa normal nga mga butang sa kinabuhi, sama sa pagpangitag kuwarta o kon unsaon nga magmalipayon ang pamilya. Nakita sa daghang tawo nga ang Bibliya dili lang makatabang sa pagtubag sa dagkong pangutana sa kinabuhi, kondili makahatag pod nig praktikal nga tambag sa adlaw-adlawng pagkinabuhi. Para nimo, ang Bibliya makatabang kaha sa mga tawo?
1. Unsa nga mga pangutana ang matubag sa Bibliya?
Ang Bibliya nagtubag niining importante nga mga pangutana: Sa unsang paagi nagsugod ang kinabuhi? Unsay katuyoan sa kinabuhi? Nganong nag-antos man ang mga tawo? Unsay mahitabo dihang mamatay ang tawo? Kon ang tanan gustog kalinaw, nganong naa may mga giyera? Unsay mahitabo sa yuta sa umaabot? Ang Bibliya nagdasig nato nga pangitaon ang tubag niini nga mga pangutana, ug minilyon ang makapamatuod nga makapatagbaw gyod ang tubag sa Bibliya.
2. Sa unsang paagi ang Bibliya makatabang nga malipay ta sa adlaw-adlawng pagkinabuhi?
Ang Bibliya naay maayong mga tambag. Pananglitan, kini nagtudlo kon sa unsang paagi ang mga pamilya tinuod nga magmalipayon. Naa ni tambag kon unsay himoon dihang ma-stress ta ug kon unsaon nga mag-enjoy ta sa atong trabaho. Samtang hisgotan nato kini nga publikasyon, imong mahibaloan kon unsay gitudlo sa Bibliya bahin niini nga mga topiko ug sa daghang uban pa. Makaingon gyod ka nga “ang tibuok Balaang Kasulatan [ang tanan diha sa Bibliya] . . . mapuslanon.”—2 Timoteo 3:16.
Kini nga publikasyon dili kapuli sa Bibliya. Hinuon, dasigon ka niini sa pagsusi sa Bibliya. Busa palihog basaha ang mga teksto diha sa mga leksiyon ug ikomparar kini sa mga butang nga imong makat-onan.
TUN-IG DUGANG
Sayra kon sa unsang paagi ang Bibliya nakatabang sa mga tawo, kon unsaon nga mag-enjoy ka sa pagbasa niini, ug kon nganong maayo nga magpatabang ka sa uban aron masabtan kini.
3. Ang Bibliya makagiya nato
Ang Bibliya samag hayag kaayo nga flashlight. Makatabang ang Bibliya nga atong makita kon sa unsang paagi makahimog hustong desisyon ug kon unsay mahitabo sa umaabot.
Basaha ang Salmo 119:105, ug dayon hisgoti kini nga mga pangutana:
-
Unsay hunahuna sa magsusulat niini nga salmo bahin sa Bibliya?
-
Unsay imong hunahuna bahin sa Bibliya?
4. Ang Bibliya makatubag sa atong mga pangutana
Nahibaloan sa usa ka babaye nga ang Bibliya naay tubag sa mga pangutana nga dugay na niyang gihunahuna. I-play ang VIDEO, ug dayon hisgoti ang mosunod nga mga pangutana:
-
Sa video, unsay mga pangutana sa babaye?
-
Sa unsang paagi ang pagtuon sa Bibliya nakatabang niya?
Gidasig ta sa Bibliya nga mangutana. Basaha ang Mateo 7:7, ug dayon hisgoti ang mosunod:
-
Unsay imong mga pangutana nga puwedeng matubag sa Bibliya?
5. Mag-enjoy ka sa pagbasa sa Bibliya
Daghan ang nag-enjoy sa pagbasa sa Bibliya, ug nakabenepisyo sila niana. I-play ang VIDEO, ug dayon hisgoti ang mosunod nga mga pangutana:
-
Sa video, unsay giingon sa mga batan-on bahin sa pagbasa?
-
Pero nganong ganahan na man silang mobasa ug Bibliya?
Ang Bibliya nag-ingon nga ang gitudlo niini makapahupay nato ug makahatag natog paglaom. Basaha ang Roma 15:4, ug dayon hisgoti kini nga pangutana:
-
Ganahan ba kang makakat-on bahin sa gisaad sa Bibliya nga kahupayan ug paglaom?
6. Ang uban makatabang nato nga masabtan ang Bibliya
Gawas sa personal nga pagbasa sa Bibliya, daghan ang miingon nga nakatabang nila ang pagpakighisgot sa uban bahin sa Bibliya. Basaha ang Buhat 8:26-31, ug dayon hisgoti kini nga pangutana:
-
Sa unsang paagi nato masabtan ang Bibliya?—Tan-awa ang bersikulo 30 ug 31.
Ang Etiopianhon nagkinahanglag tabang aron masabtan ang Kasulatan. Karon, nakita sa daghang tawo nga makatabang ang pagpakighisgot sa uban bahin sa Bibliya
ANG UBAN MOINGON: “Usik-usik ra sa panahon ang pagtuon ug Bibliya.”
-
Unsay imong isulti? Nganong kanay imong isulti?
SUMARYO
Ang Bibliya naghatag ug tambag para sa adlaw-adlawng pagkinabuhi, nagtubag sa importanteng mga pangutana, ug naghatag sa mga tawo ug kahupayan ug paglaom.
Review
-
Unsa nga mga tambag ang naa sa Bibliya?
-
Unsa nga mga pangutana ang matubag sa Bibliya?
-
Unsay gusto nimong makat-onan sa Bibliya?
SUSIHA
Sayra kon sa unsang paagi praktikal karon ang tambag sa Bibliya.
“Ang mga Gitudlo sa Bibliya—Kaalam nga Walay Paglubad” (Ang Bantayanang Torre Num. 1 2018)
Tan-awa kon sa unsang paagi ang Bibliya nakatabang sa usa ka tawo nga naay problema sa emosyon sukad sa pagkabata.
Kon sa Unsang Paagi Nagsugod ang Akong Malipayong Kinabuhi (2:53)
Susiha ang praktikal nga tambag sa Bibliya para sa pamilya.
“12 Ka Sekreto sa Malamposong Pamilya” (Pagmata! Num. 2 2018)
Sayra ang klarong giingon sa Bibliya bahin sa kon kinsa gyoy nagmando sa kalibotan.
Basin Ganahan Pod Ka
KOMON NGA MGA PANGUTANA
Unsa ang Bible Study Program nga Gina-offer sa mga Saksi ni Jehova?
Sa libreng interactive program nga gina-offer sa mga Saksi ni Jehova, puwede nimong gamiton ang bisan unsang bersiyon sa Bibliya. Puwede nimong paapilon ang tibuok pamilya o mga amigo o amiga.
