Gusto sa Diyos nga ang mga tawo malipayng magkinabuhi sa yuta. Iyang gilalang ang yuta ug ang tanang butang diha niini kay gihigugma niya ang tawo. Hapit na siyang molihok sa pagtaganag maayong kaugmaon alang sa katawhan sa tanang kanasoran. Iyang wagtangon ang mga hinungdan sa pag-antos sa tawo.​—Basaha ang Jeremias 29:11.

Wala pa gayoy gobyerno nga nakawagtang sa kapintasan, sakit, o kamatayon. Apan adunay maayong balita. Sa dili madugay, ang tanang tawhanong gobyerno pulihan na sa gobyerno sa Diyos. Ang mga sakop niini makapahimulos unyag kalinaw ug maayong panglawas.​—Basaha ang Isaias 25:8; 33:24; Daniel 2:44.

Ang pag-antos mahanaw lamang sa dihang wagtangon sa Diyos ang daotang mga tawo. (Sofonias 2:3) Kanus-a kini mahitabo? Gitagna sa Pulong sa Diyos ang mga kahimtang nga nagpameligro karon sa kinabuhi sa tawo. Ang daotang mga panghitabo sa atong panahon nagpaila nga hapit nang molihok ang Diyos.​—Basaha ang 2 Timoteo 3:1-5.

Angay tang magtuon bahin sa Diyos gikan sa iyang Pulong, ang Bibliya. Kini samag sulat gikan sa usa ka mahigugmaong amahan. Gitudlo niini kon sa unsang paagi makatagamtam kitag maayong kinabuhi karon ug walay kataposang kinabuhi sa yuta sa umaabot. Tinuod, ang uban dili tingali gusto nga dunay motabang kanimo sa pagkat-on sa Bibliya. Apan ayawg palabya ang kahigayonan nga makabaton kag maayong kaugmaon.​—Basaha ang Proverbio 29:25; Pinadayag 14:6, 7.