Kapitulo 13

Unsay Akong Himoon Aron Molampos Ako sa Pag-eskuyla?

 HANDURAWA nga nasaag ka sa baga ug mangiob nga lasang. Halos walay hayag sa adlaw nga nakalusot sa mga dahon sa dagkong kahoy. Lugos kang makalihok kay gilibotan ka sa baga nga kakahoyan. Aron makagawas ka, kinahanglan nimong pamutlon ang mga sanga-sanga.

Ang uban moingon nga susama niini ang kahimtang diha sa eskuylahan. Tibuok adlaw ka nga dili makagawas sa klasehanan ug magabii mapondo ka sa balay tungod sa imong homwork. Mibati ka ba nga mora kag hinigtan? Isulat kon unsang subject sa eskuylahan ang kinalisdan para nimo.

․․․․․

Tingali gidasig ka sa imong ginikanan ug mga magtutudlo sa pagtuon ug maayo niining maong subject. Apan wala kini magpasabot nga gilisod-lisod ka nila! Gusto lang nila nga imong himoon ang labing maayo. Busa unsay imong himoon kon kasurenderon ka na kay dili gyod nimo makab-ot ang ipahimo kanimo? Molampos ka sa imong pag-eskuyla kon mohimo kag mga pamaagi. Unsa kini nga mga pamaagi?

● Pamaagi 1: Kinahanglang interesado kang makakat-on. Dili ka ganahang magtuon kon dili ka interesadong makakat-on. Busa tan-awa ang tibuok situwasyon. Ang Kristohanong apostol Pablo misulat: “Ang nagdaro kinahanglan magdaro nga may paglaom ug ang maggiok kinahanglan maggiok nga may paglaom sa pag-ambit sa abot.”​—1 Corinto 9:10, Bag-ong Hubad nga Binisaya.

Ang magdadaro magkugi pag-ayo kay nahibalo siya nga may maani siya. Apan alang sa usa ka estudyante lisod kaayong sabton kon nganong kugihan pa man ug tuon ang pipila ka subject kay tingali sa pagkakaron morag dili kini importante. Bisan pa niana, ang pagtuon sa nagkalainlaing subject makapalambo sa imong pagsabot sa mga butang sa imong palibot. Kini makatabang kanimo nga ‘mahimong  tanang butang ngadto sa tanang matang sa tawo,’ sa ato pa makakat-on ka kon unsaon pagpakigsulti sa nagkalainlaing matang sa tawo. (1 Corinto 9:22) Ang imong pagtuon sa nagkalainlaing subject makapauswag sa imong katakos sa paghunahuna​—katakos nga imo ra unyang mapahimuslan.

● Pamaagi 2: Kinahanglang positibo kag tinamdan sa imong mga katakos. Diha sa eskuylahan madayag ang imong tinagoang mga abilidad. Si Pablo misulat ngadto kang Timoteo: ‘Pasigaha ang gasa sa Diyos nga anaa kanimo.’ (2 Timoteo 1:6) Kini nagpakita nga si Timoteo gihatagan ug linaing katungdanan diha sa Kristohanong kongregasyon. Apan ang iyang hinatag sa Diyos nga katakos​—ang iyang “gasa”—​kinahanglang ugmaron aron kini mapuslan. Sa laing bahin, ang imong pagkahawod sa klase dili direktang tinuga sa Diyos. Apan, duna kay mga katakos nga lahi sa uban. Ang pag-eskuyla makatabang kanimo sa pag-ugmad ug sa pagpalambo niini.

Kon negatibo kag tinamdan, nan dili gyod ka mouswag. Busa kon sa imong tan-aw kulang kag katakos, magmapositibo. Pananglitan, sa dihang ang katakos ni Pablo sa paghatag ug  pakigpulong gisaway sa mga tawo, siya miingon: “Bisan kon ako dili batid sa pagsulti, tino nga ako dili ingon niana labot sa kahibalo.” (2 Corinto 10:10; 11:6) Si Pablo nahibalo sa iyang mga kahuyangan. Apan nahibalo usab siya nga duna pod siyay mga katakos.

Ikaw komosta? Unsay imong mga abilidad? Kon wala kay mahunahunaan, pangutana sa usa ka mahigugmaong hamtong. Siya makatabang kanimo sa pag-amgo nga duna diay kay mga katakos ug sa pagpahimulos usab niini.

● Pamaagi 3: Maayong batasan sa pagtuon. Dili ka molampos sa pag-eskuyla kon magtinapol ka. Kinahanglang magtuon gyod ka. Tingali bug-at kaayo kini sa imong buut. Apan mapuslanon ang pagtuon. Gani, bisan sa gamayng paningkamot, sa ngadto-ngadto ganahan ka rang magtuon.

Aron maugmad ang maayong batasan sa pagtuon, kinahanglang imong ieskedyul ang imong panahon. Hinumdomi nga samtang nag-eskuyla ka, kinahanglang unahon gayod nimo ang pagtuon. Tinuod, ang Bibliya nag-ingon nga adunay “panahon sa pagkatawa” ug “panahon sa paglukso.” (Ecclesiastes  3:1, 4; 11:9) Busa, sama sa ubang mga batan-on, gusto pod kang maglingaw-lingaw. * Apan ang Ecclesiastes 11:4 nagpasidaan: “Siya nga nagapaniid sa hangin dili makapugas ug binhi; ug siya nga nagalantaw sa mga panganod dili makaani.” Ang leksiyon? Unaha ang pagtuon, unya ra kanang paglingaw-lingaw. Ayawg kabalaka, kay makapanahon ka ra alang niining duha!

Tabang sa Imong Paghimog Homwork

Komosta kon daghan kaayo kag homwork? Tingali sama ka usab ug kahimtang sa 17-anyos nga si Sandrine, kinsa miingon: “Maghimo kog homwork kada gabii sulod sa duha ngadto sa tulo ka oras, bisan sa Sabado ug Dominggo.” Unsay  imong himoon aron matapos nimo ang imong mga homwork? Sulayi ang mga sugyot sa panid 119.

Paghawan sa Agianan

Kon bahin sa pagpauswag sa espirituwalidad, si Pablo miingon kang Timoteo: “Ihatag ang bug-os mong pagtagad, ang bug-os mong kusog niining mga butanga, aron ang imong pag-uswag dayag nga makita sa tanan.” (1 Timoteo 4:15, Phillips) Sa susama, pinaagi sa pagtuon ug maayo, makita ang imong pag-uswag.

Palandonga ang ilustrasyon nga gihisgotan sa sinugdanan niini nga kapitulo. Aron makagawas ka sa lasang kinahanglang mohimo kag pamaagi—imong hawanan ang agianan. Ingon usab niini ang pagtungha. Imbes moangka tungod sa kadaghan sa ginapakab-ot kanimo sa imong ginikanan ug mga magtutudlo, gamita ang tulo ka pamaagi nga gihisgotan niining kapituloha aron molampos ka sa imong pagtungha. Sa dihang makita nimo nga mitaas-taas ang imong grado, magpasalamat gyod ka nga imong gisunod kini nga mga pamaagi!

BASAHA ANG DUGANG PA BAHIN NIINI NGA ULOHAN DIHA SA TOMO 1, KAPITULO 18

SA SUNOD NGA KAPITULO

Ang imong mga problema sa eskuylahan nadugangan kay ginahasi ka. Unsay imong himoon bahin niana?

[Footnote]

TEKSTO

“Siya nga nagapaniid sa hangin dili makapugas ug binhi; ug siya nga nagalantaw sa mga panganod dili makaani.”​—Ecclesiastes 11:4.

SUGYOT

Dihang magtuon, susiha una ang pagatun-an aron duna kay ideya niana. Sunod, paghimog mga pangutana nga matubag sa matag sub-ulohan. Dayon basaha ang pagatun-an ug pangitaa ang mga tubag. Unya tan-awa kon imo bang mahinumdoman ang imong nabasa.

NAHIBALO KA BA . . . ?

Kon mangopya ka, dili ka kasaligan ug dili ka usab makakat-on. Labaw sa tanan, madaot ang imong relasyon sa Diyos.​—Proverbio 11:1.

ANG AKONG PLANONG HIMOON!

Sa sunod higayon nga ihatag ang among kard, gusto nako nga ________ ang akong grado niini nga subject ․․․․․

Kini ang akong himoon aron motaas ang akong grado niining maong subject ․․․․․

Kon unsay akong gustong ipangutana sa akong ginikanan bahin niini ․․․․․

UNSAY IMONG HUNAHUNA?

● Nganong kinahanglang magtuon kag maayo?

● Kanus-a ka maayong magtuon ug maghimog homwork?

● Asa sa imong balay maayong magtuon ug maghimog homwork?

● Unsay imong himoon aron ang imong grado dili maapektohan sa imong paglingaw-lingaw?

[Blurb sa panid 117]

“Akong nakita nga kon unsay batasan sa ubang mga batan-on sa ilang pagtuon sa tunghaan mao usay ilang batasan sa pagtuon sa espirituwal nga mga butang. Kadtong dili ganahang magtuon sa eskuylahan dili usab kaayo ganahang magbasa ug magtuon ug Bibliya.”​—Sylvie

 [Kahon/​Hulagway sa panid 119]

Pangitag lugar nga makatuon ka. Kinahanglang walay makadisturbo nimo. Kon mahimo pagtuon diha sa lamesa. Ayaw paandara ang TV.

Unaha ang importanteng mga butang. Sanglit importante ang pag-eskuyla, ayaw gayod pagtan-aw ug TV kon dili pa mahuman ang imong homwork.

Ayaw paglangay-langay. Kinahanglan duna kay eskedyul sa paghimo sa imong homwork, ug sunda gayod kini.

Pagplano. Hunahunaa kon unsang homwork ang imong unahon ug unsay isunod. Ilista kini sa papel ug isulat usab kon unsa ka kadugay magtuon sa matag subject. Markahi ang matag homwork nga imong mahuman.

Pahulay pod. Kon dili ka na makapamensar ug maayo, pahulay usa. Apan baliki dayon ang imong homwork kon mahimo.

Hunahunaa nga makasarang ka. Hinumdomi nga ang estudyante kasagaran taas ug grado dili tungod kay utokan siya kondili tungod kay nagtuon siyag maayo. Mahimo kang molampos sa imong pagtuon. Busa, pagtuon ug maayo kay mabaslan ra ang imong pagkugi.

[Hulagway sa panid 116]

Ang pagbuntog sa mga babag sa pag-eskuyla nahisamag paghawan ug agianan diha sa baga nga lasang​—molampos ka kon mogamit kag hustong mga pamaagi