Maayong Panig-ingnan​—Pablo

Si apostol Pablo matinud-anon sa iyang gibati. Siya walay lipodlipod nga miadmitir: “Sa dihang buot nakong buhaton ang maayo, ang daotan ania kanako.” Si Pablo matarong ug kasingkasing. ‘Nahimuot ako sa balaod sa Diyos sumala sa pagkatawo sa sulod nako,’ siya misulat. Nan, unsa may iyang problema? Si Pablo miingon: ‘Nakita ko . . . ang laing balaod nga nakig-away sa balaod sa akong hunahuna ug naghimo kanako nga ulipon sa balaod sa sala nga ania kanako.’ Naguol si Pablo sa iyang kasaypanan. Siya miingon: “Alaot ako nga tawo!”​—Roma 7:21-24.

Maguol ka ba kon masayop ka? Kon mao, hinumdomi nga ingon pod niana si Pablo. Pero nahibalo sab siya nga namatay si Kristo alang sa mga tawong sama niya mao nga siya nakaingon: “Salamat sa Diyos pinaagi kang Jesu-Kristo nga atong Ginoo!” (Roma 7:25) Giisip ni Pablo ang lukat ingong personal nga gasa sa Diyos alang kaniya. Siya misulat: ‘Ang Anak sa Diyos . . . nahigugma kanako ug nagtugyan sa iyang kaugalingon alang kanako.’ (Galacia 2:20) Palandonga ang lukat dihang maguol ka. Ug kon maguol ka tungod sa imong kasaypanan, ayawg kalimot nga si Kristo namatay alang sa mga makasasala, dili alang sa mga hingpit.